ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កញ្ញា កៅ ម៉េងហ័ង និស្សិតឆ្នាំទី១ ផ្នែកវិទ្យាសាស្ត្រទិន្នន័យ និងបញ្ញាសប្បនិម្មិត គឺជាយុវតីកម្ពុជាមួយរូប ដែលបានឈ្នះជ័យលាភីលេខ១ នៅក្នុងកម្មវិធីប្រកួតប្រជែងនិស្សិតពហុជំនាញអន្តរជាតិ (IMSC) ក្រោមប្រធានបទ “នវានុវត្តនៅក្នុងវិស័យសុខាភិបាល និងបរិស្ថាន” នៅសាកលវិទ្យាល័យ Brawijaya ប្រទេសឥណ្ឌូនេស៊ី កាលពីពេលថ្មីៗនេះ។
កញ្ញា កៅ ម៉េងហ័ង បានចូលរួមកម្មវិធីនេះជាតំណាងឱ្យយុវជនកម្ពុជា និងបានបកស្រាយទៅលើប្រធានបទ បញ្ញាសិប្បនិម្មិតនៅក្នុងវិស័យសុខាភិបាល។ ទន្ទឹមគ្នានេះ កញ្ញា ម៉េងហ័ង ក៏បានចូលរួមនៅក្នុងសន្និសិទអន្តរជាតិលើកទី៦ ផ្នែកទន្តសាស្ត្ររបស់សាកលវិទ្យាល័យ Brawijaya និងបានចូលរួមកម្មវិធីផ្លាស់ប្តូរការសិក្សារយៈពេល៨ថ្ងៃផងដែរ។
ម៉េងហ័ង បានប្រាប់ AMS Education ថា កម្មវិធីប្រកួតប្រជែងនិស្សិតពហុជំនាញអន្តរជាតិ (IMSC) នេះ មានយុវជនចូលរួមមកពី ៥ប្រទេសផ្សេងគ្នា រួមមាន កម្ពុជា ឥណ្ឌូនេស៊ី វៀតណាម យេមែន និងហ្សកដានី។ ក្នុងនោះ កញ្ញាគឺជាយុវជនតែម្នាក់ប៉ុណ្ណោះដែលបានតំណាងឱ្យប្រទេសកម្ពុជាចូលរួមក្នុងកម្មវិធីនេះ។
និស្សិតឆ្នាំទី១ ផ្នែកវិទ្យាសាស្ត្រទិន្នន័យ និងបញ្ញាសប្បនិម្មិត រូបនេះ បន្ថែមថា កត្តាដែលជំរុញឱ្យរូបនាងអាចជាប់ជ័យលាភីលេខ១ ក្នុងការប្រកួតនេះ គឺដោយសារការធ្វើបទបង្ហាញមានភាពច្បាស់លាស់ ជាពិសេស ការពន្យល់អំពីរបៀបប្រើប្រាស់បញ្ញាសិប្បនិម្មិតដើម្បីជួយដល់វិស័យសុខាភិបាល ក៏ដូចជាការឆ្លើយសំណួរបានល្អ និងការនិយាយភាសាអង់គ្លេសបានល្អផងដែរ។
កញ្ញា កៅ ម៉េងហ័ង បន្ថែមទៀតថា ពេលបានជាប់ជ័យលាភីនាងពិតជារំភើបជាខ្លាំង ព្រោះនាងមិនធ្លាប់រំពឹងថាអាចទទួលបានជ័យលាភីលេខ១ឡើយ ដោយសារគិតថាមានសិស្សពូកែជាច្រើនផ្សេងទៀតដែលចូលរួម ប៉ុន្តែនាងបានខិតខំព្យាយាមឱ្យអស់ពីសមត្ថភាព។
សម្រាប់កម្មវិធីថ្នាក់អន្តរជាតិមួយនេះ កញ្ញា កៅ ម៉េងហ័ង ឱ្យដឹងថា នាងទទួលបានចំណេះដឹងពីកម្មវិធីនេះជាច្រើន ដោយរូបនាងបានសិក្សារៀនសូត្រអំពីបរិបទនៃប្រទេសផ្សេងៗទៀត ជាពិសេសនៅក្នុងវិស័យសុខាភិបាល។ លើសពីនេះ ចូលរួមការផ្លាស់ប្ដូរការសិក្សា និងការអនុវត្តក្នុងបន្ទប់ពិសោធន៍។ ម៉េងហ័ង បន្តថា សម្រាប់គម្រោងនៅថ្ងៃមុខ នាងនឹងព្យាយាមស្វែងយល់ពីវិស័យសុខាភិបាលឱ្យបានច្រើន ហើយប្រើប្រាស់ជំនាញបញ្ញាសប្បនិម្មិតដែលកំពុងរៀនសព្វថ្ងៃទៅជួយដល់វិស័យសុខាភិបាលបន្ថែមទៀត។
ម្ចាស់ជ័យលាភីលេខ១ រូបនេះ ក៏បានលើកទឹកចិត្តយុវជនទាំងអស់ត្រូវផ្ដល់ឱកាសដល់ខ្លួនឯងក្នុងការដាក់ពាក្យចូលរួមការផ្លាស់ប្ដូរការសិក្សាទៅក្រៅប្រទេស ឬកម្មវិធីប្រកួតប្រជែងផ្សេងៗ ដើម្បីទទួលបានចំណេះដឹងថ្មីៗ និងផ្នត់គំនិតថ្មីបន្ថែមទៀត។ លើសពីនេះ យុវជនអាចសាកល្បង ហើយខិតខំឱ្យអស់ពីសមត្ថភាពបើទោះជាចូលរួមការប្រកួតកម្រិតអន្តរជាតិក៏ដោយ៕
