ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ឪពុកម្តាយ អ្នកអាណាព្យាបាល ពិតជាដើរតួនាទីសំខាន់ណាស់ក្នុងការជួយគាំទ្រកូនៗក្នុងការសិក្សារបស់ពួកគេ។ ដូច្នេះដើម្បីបង្កើនប្រសិទ្ធភាពក្នុងការអប់រំបុត្រធីតា ឪពុកម្តាយ អ្នកអាណាព្យាបាល ត្រូវសហការជាមួយសាលារៀនឱ្យបានជាប់លាប់។
ក្នុងពិធីប្រគល់សញ្ញាបត្របញ្ចប់ភូមិសិក្សាដល់សិស្សថ្នាក់មត្តេយ្យ នៃសាលារៀនសហគមន៍២១ សាខាសន្ទុក ខេត្តកំពង់ធំ កាលពីពេលថ្មីៗនេះ លោកឧកញ៉ា ប៉ិច បូឡែន អគ្គនាយកក្រុមហ៊ុនវេសឡាញ អេឌូខេសិន គ្រុប លើកឡើងថា ការអប់រំ គឺមិនអាចធ្វើតែពីសាលារៀន ដែលមានតែលោកគ្រូអ្នកគ្រូនោះទេ តែក៏ត្រូវទាមទារឱ្យមានការចូលរួមពីឪពុកម្តាយ អ្នកអាណាព្យាបាលផងដែរ ដើម្បីបង្កើនប្រសិទ្ធិភាពក្នុងការអប់រំដល់បុត្រធីតារបស់យើង។ លោកថា ពេលបញ្ជូនកូនមកសាលារៀន ឪពុកម្តាយ អ្នកអាណាព្យាបាល ចាំបាច់ត្រូវស្វែងយល់ឱ្យបានដឹងថា តើកូនមករៀនអ្វី ហើយត្រូវតាមដានកូននៅផ្ទះ ជួយពិនិត្យកិច្ចការដែលសាលាបានដាក់ឱ្យ ដូច្នេះទាមទារឱ្យឪពុកម្តាយ អ្នកអាណាព្យាបាលត្រូវសហការណ៍ជិតស្និទ្ធជាមួយសាលារៀន ដើម្បីដឹងពីអ្វីដែលសាលាបានបង្រៀនទៅដល់កូនៗ។
“…យើងខំអប់រំកូនឱ្យមានទម្លាប់ល្អ ប៉ុន្តែបើឪពុកម្តាយអត់ដឹងថា ទម្លាប់ល្អជាអ្វីទេ នឹងរត់បញ្រ្ចាស់ជាមួយអ្វីដែលសាលាបង្រៀន”
ដើម្បីជួយឪពុកម្តាយឱ្យមានបំណិនអាចជួយគាំទ្រដល់កូនៗបាន សម្រាប់សាលារៀនសហគមន៍២១ ក៏ដូចជាបណ្តាញសាលារៀនវេសឡាញ គឺតែងតែមានរៀបចំជាការបង្រៀនទៅដល់ឪពុកម្តាយ និងអ្នកអាណាព្យាបាល ដោយឥតគិតថ្លៃទៅលើមុខវិជ្ជាសំខាន់ៗដូចជាទម្លាប់ល្អទាំង៧ ការប្រាស្រ័យទាក់ទង ការធ្វើផែនការ ភាពម្ចាស់ការជាដើម ក្នុងគោលបំណងកុំឱ្យសាលារៀនបង្រៀនផ្សេង ហើយឪពុកម្តាយធ្វើផ្សេងជាមួយកូន។ មួយទៀត សាលាក៏នឹងបង្រៀនឱ្យឪពុកម្តាយមានគំនិតខ្លះៗទៅលើការគ្រប់គ្រងហិរញ្ញវត្ថុ ក៏ដូចជាបំណិនជាឪពុកម្តាយផងដែរ។ «នៅក្នុងប្រព័ន្ធការងារអប់រំរបស់យើង យើងមានជាគោលគំនិតមួយ ចុះឈ្មោះកូនម្នាក់ ក៏រៀនបានមួយគ្រួសារដែរ»។
លោកឧកញ៉ា ប៉ិច បូឡែន ក៏បានបញ្ជាក់ដែរថា វត្តមានរបស់សាលារៀនសហគមន៍២១ គឺមិនមែនគ្រាន់តែការអប់រំទៅលើមុខវិជ្ជាគិតលេខ អាន សរសេរសំណេរនោះទេ តែយើងក៏នឹងបង្រៀនសិស្សទៅលើអត្តចរិត ការទំនាក់ទំនង ចេះគ្រប់គ្រងហិរញ្ញវត្ថុ ជំនាញបច្ចេកវិទ្យាមួយចំនួន ដូច្នេះត្រូវមានការចូលរួមពីឪពុកម្តាយ ហើយការចូលរួមនោះ គឺតាមរយៈឪពុកម្តាយចូលរៀនដែរ៕
