ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
និស្សិតវិទ្យាស្ថានបច្ចេកវិទ្យាកម្ពុជាចំនួន៧រូប បានជាប់អាហារូបករណ៍ថ្នាក់បរិញ្ញាបត្រជាន់ខ្ពស់ទៅសិក្សានៅប្រទេសបារាំង ឆ្នាំសិក្សា២០២៤-២០២៥ ខាងមុខនេះ ក្រោយពីត្រូវបានជ្រើសរើសដោយសាកលវិទ្យាល័យ Université Grenoble Alpes នៃសាធារណរដ្ឋបារាំង។
សម្រាប់កម្មវិធីអាហារូបករណ៍សិក្សាថ្នាក់បរិញ្ញាបត្រជាន់ខ្ពស់ ផ្ដោតលើមុខជំនាញផ្សេងៗដែលក្នុងនោះ និស្សិតចំនួន០៦រូប សិក្សាលើជំនាញបច្ចេកវិទ្យា Smart Grids and Buildings និងនិស្សិត ០១រូប សិក្សាលើជំនាញបច្ចេកវិទ្យា Mobile Autonomous and Robotic Systems។
ក្នុងជំនួបសម្តែងការគួរសមកាលពីពេលថ្មីៗនេះ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ដោយផ្តាំផ្ញើទៅដល់និស្សិតអាហារូបករណ៍ទាំងអស់ត្រូវប្រឹងប្រែងយកចិត្តទុកដាក់ផ្ដោតលើការសិក្សាទាំងទ្រឹស្តី និងការអនុវត្ត។ ទន្ទឹមគ្នានេះ តស៊ូព្យាយាមរៀនសូត្រឱ្យបានពូកែ និងចាប់យកជំនាញឱ្យបានច្បាស់លាស់ មានភាពអត់ធ្មត់ក្នុងការរស់នៅ យកចិត្តទុកដាក់លើរបបអាហារ ចេះគ្រប់គ្រងហិរញ្ញវត្ថុ និងពេលវេលាឱ្យបានល្អ ទាំងការកម្សាន្ត និងការរៀនសូត្រ។ ឯកឧត្ដមបណ្ឌិតសភាចារ្យ ក៏បានលើកទឹកចិត្តនិស្សិតអាហារូបករណ៍ឱ្យចេះសហការគ្នា ជួយយកអាសារគ្នាក្នុងគ្រាលំបាក ទាំងក្នុងការរស់នៅ និងការរៀនសូត្រ។
រដ្ឋមន្ត្រីក្រសួងអប់រំ យុវជន និងកីឡា ក៏បានជូនពរដល់និស្សិតទាំងអស់ ឱ្យមានសុខភាពល្អ និងទទួលជោគជ័យក្នុងការសិក្សានាពេលខាងមុខនេះ ត្រូវខិតខំប្រឹងប្រែងក្រេបជញ្ជក់ចំណេះដឹង កសាងសមត្ថភាពដើម្បីអភិវឌ្ឍន៍ខ្លួនឱ្យទៅជាអ្នកជំនាញច្បាស់លាស់ក្នុងអាជីព ហើយយកចំណេះជំនាញត្រឡប់មកចូលរួមចំណែកអភិវឌ្ឍន៍ប្រទេសជាតិឱ្យកាន់តែរីកចម្រើនបន្ថែមទៀត។
ជាមួយគ្នានេះ និស្សិតអាហារូបករណ៍ជ័យលាភីទាំង០៧រូប បានថ្លែងអំណរគុណដល់ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ដែលបានអនុញ្ញាតិទទួលជួប និងផ្តល់អនុសាសន៍ណែនាំពាក់ព័ន្ធនឹងការសិក្សានៅបរទេស ដូចជា ការត្រៀមខ្លួនរស់នៅ ការរៀនសូត្រ សម្របខ្លួនទៅតាមវប្បធម៌ របៀបនៃការទំនាក់ទំនងបរទេស ការថែទាំសុខភាពក្នុងអាកាសធាតុត្រជាក់ ដែលជាផែនទីបង្ហាញផ្លូវដល់និស្សិតឱ្យទទួលបានជោគជ័យក្នុងបេសកកម្មសិក្សានាពេលខាងមុខ៕
