ក្នុងពិធីប្រគល់សញ្ញាបត្រជូនដល់និស្សិត នៃសាកលវិទ្យាល័យ ពុទ្ធិសាស្ត្រ នៅព្រឹកថ្ងៃទី៦ ខែសីហា ឆ្នាំ២០២៤ សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រ​កម្ពុជា មានប្រសាសន៍ថា “មនុស្ស” នៅតែជាកត្តាស្នូលនៃគោលនយោបាយរបស់កម្ពុជា ដូច្នេះហើយ​ការ​អប់រំ និង​ការ​បណ្តុះបណ្តាលមូលធន​មនុស្ស គឺជាយុទ្ធសាស្រ្តវិនិយោគវែងឆ្ងាយរបស់រាជរដ្ឋាភិបាលដើម្បីបង្កើតមូលដ្ឋានសង្គមសេដ្ឋកិច្ច និង​ឧស្សាហកម្ម​ដែលផ្តោត​លើជំនាញ និងចំណេះដឹង ដើម្បីធានាថា កម្ពុជានឹងមិនធ្លាក់ចូលទៅក្នុងអន្ទាក់ជាប្រទេសមានចំណូលមធ្យមនៅក្នុងដំណើរការដ៏វែងឆ្ងាយ ឈានឆ្ពោះទៅជាប្រទេសមានចំណូលខ្ពស់នៅឆ្នាំ២០៥០។

សម្តេចធិបតីគូសបញ្ជាក់ថា រាជរដ្ឋាភិបាលអាណត្តិទី៧ នៃរដ្ឋសភា បានផ្តោតការយកចិត្តទុកដាក់ខ្ពស់ ចំពោះកត្តាមនុស្សនៅក្នុងការអភិវឌ្ឍប្រទេសជាតិ ឆ្ពោះទៅកាន់ប្រទេសដែលមានចំណូលខ្ពស់ ស្របតាមចក្ខុវិស័យកម្ពុជាឆ្នាំ២០៥០ ជាមួយនិងបាវចនា ៥ គឺ កំណើន ការងារ សមធម៌ ប្រសិទ្ធភាព និងចីរភាព ដោយក្នុងនោះយុទ្ធសាស្ត្របញ្ចកោណដំណាក់កាលទី១ បានកំណត់យកវិធានគន្លឹះចំនួន ៥ រួមមាន មនុស្ស ផ្លូវ ទឹក ភ្លើង និងបច្ចេកវិទ្យា។

យ៉ាងណាក៏ដោយ បើតាម​ប្រសាសន៍របស់សម្តេចធិបតីនាយករដ្ឋមន្រ្តី ក្នុងការ​ជំរុញការ​អនុវត្តគោលនយោបាយនេះ រាជរដ្ឋាភិបាល​តែងតែចាត់ទុកស្ថាប័នឧត្តមសិក្សាជាដៃគូសហការដ៏ជិតស្និទ្ធ និង​មិន​អាចខ្វះបានក្នុងការតម្រង់ទិសអនាគតមូលធនមនុស្សឱ្យចំគោលដៅ ដោយផ្អែក​លើចក្ខុវិស័យរួមប្រកបដោយមហិច្ឆតារបស់កម្ពុជា។

“ស្ថាប័នឧត្តមសិក្សា​គឺជាតួអង្គពាក់ព័ន្ធដ៏សំខាន់ក្នុងការធានាថា យុវជនជំនាន់ក្រោយរបស់កម្ពុជាមានជំនាញសម្រាប់អនាគត មានភាពធន់ និង​សមត្ថភាពសម្របសម្រួលបានឆាប់រហ័ស តាមទាន់ការវិវឌ្ឍន៍ជឿនលឿន នៃបរិកាសង្គម និង​បច្ចេកវិទ្យា”

សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា

ក្នុងស្មារតីនេះ សម្តេចធិបតី ស្មើ​ដល់ស្ថាប័នឧត្តមសិក្សា​ទាំងអស់ បន្តពង្រឹងការអភិវឌ្ឍស្ថាប័ន ទាំងផ្នែករឹង ផ្នែកទន់ ដើម្បីបង្កើនទំនុកទុកចិត្ត និងឧត្តមភាព និងការ​ប្រកួតប្រជែងលើឆាកអន្តរជាតិ, ​ចូលរួមប្រើប្រាស់​ឱ្យអស់លទ្ធភាពនូវយន្តការ និង​ប្រព័ន្ធអេកូឡូហ្ស៊ី គាំទ្រដល់សហគ្រិនភាព ដែលរាជរដ្ឋាភិបាលបានបង្កើតឡើងដើម្បីចូលរួមចំណែកបង្កើតការងារ និង ពង្រឹង ពង្រីកមូលដ្ឋាន សេដ្ឋកិច្ចក្នុងប្រទេស ឱ្យកាន់តែទូលំទូលាយ។

ជាមួយគ្នានេះ សម្តេចធិបតី ក៏​ស្នើ​ដល់​សិស្សនិស្សិត​ដែលទើបបញ្ចប់ការសិក្សា​ទាំងអស់ សូម​ខិតខំបន្តអភិវឌ្ឍខ្លួន ស្រាវជ្រាវបន្ថែមជានិច្ច និងត្រូវប្រែក្លាយខ្លួនជាតួអង្គដែលចូលរួមគិត ចូលរួមធ្វើ ចូលរួមដោះស្រាយ និងជំរុញ​ការអភិវឌ្ឍស្ថាប័នជារួម ឱ្យស្របតាមគោលនយោបាយ​ដែលរាជរដ្ឋាភិបាលបានខិងខំជំរុញអនុវត្ត។ «ខ្ញុំពិតជាចង់ឃើញក្មួយៗក្លាយទៅជាសមាសភាពសង្គមប្រកបដោយការទទួលខុសត្រូវ និងអាចដើរតួនាទីជាអ្នកផ្តល់ ជាជាងអ្នកទទួលពីសង្គម»៕