ឪពុកម្ដាយជាទូទៅ តែងបារម្ភអំពីអនាគតរបស់កូនៗនៅពេលដែលពួកគេពេញវ័យ។ តើពួកគេនឹងធំឡើង មានសុភមង្គល មានការងារល្អ និងរស់នៅបានសុខស្រួលដែរឬទេ? នេះគឺជាសំណួរ ដែលអ្នកមានគុណគ្រប់រូប តែងតែចោទសួរ នឹងរកវិធី ជួយកូនឱ្យទទួលបានជីវិតមួយដែលល្អប្រសើរ។ យោងតាមអ្នកចិត្តសាស្ត្រ និងអ្នកជំនាញការផ្នែកចិញ្ចឹមកូនជាច្រើន បានបង្ហាញថា មានវិធីសាស្ត្រចំនួន ៥ ដែលអ្នកអាចជួយឱ្យកូនៗរបស់អ្នក ទទួលបានភាពជោគជ័យក្នុងជីវិតនៅថ្ងៃអនាគត។

១. ផ្ដោតលើការកសាងទំនុកចិត្តខ្លួនឯង ៖ ការស្រាវជ្រាវបង្ហាញថា ភាពមានទំនុកចិត្តលើខ្លួនឯង គឺជាកម្លាំងជំរុញដ៏សំខាន់ ដែលអាចបង្កើតភាពជោគជ័យនាពេលអនាគតសម្រាប់កុមារ ព្រោះវាជួយឱ្យកុមារមានជំនឿយ៉ាងមុតមាំថា ជំនាញ និងការខិតខំប្រឹងប្រែងរបស់ពួកគេ នឹងនាំពួកគេទៅរកភាពជោគជ័យ។ វិធីដែលឪពុកម្ដាយ អាចកសាងទំនុកចិត្តឱ្យកូនបានល្អបំផុត គឺអនុញ្ញាតឱ្យកូនធ្វើរឿងអ្វីមួយដោយខ្លួនឯង ដើម្បីពួកគេស្គាល់ទាំងអារម្មណ៍នៃភាពជោគជ័យ និងបរាជ័យ ហើយដឹងពីរបៀបប្រឈមមុខនឹងអារម្មណ៍ទាំងនោះ។

២. បង្រៀនកូនអំពីរបៀបគ្រប់គ្រងខ្លួនឯង ៖ ការគ្រប់គ្រងខ្លួនឯង អាចជួយកំណត់ពីភាពជោគជ័យនាពេលអនាគត។ នៅពេលដែលកុមារ អាចគ្រប់គ្រងខ្លួនឯងបាន ហើយមិនខ្វល់អំពីការរំខានពីខាងក្រៅ មានន័យថា ពួកគេនឹងធំឡើង ជាមួយនឹងភាពវៃឆ្លាត និងចេះលើកទឹកចិត្តខ្លួនឯង។ នេះបើយោងតាមការសិក្សាអស់រយៈពេលជាច្រើនទសវត្សរ៍ដោយអ្នកស្រាវជ្រាវនៅសាកលវិទ្យាល័យ Otago នៃប្រទេសនូវែលសេឡង់។

នៅពេលកុមារដែលទើបតែចេះដើរតេះតះ អាចចាប់ផ្ដើមពីបញ្ញាត្តិនៃពេលវេលា ម្ដាយឪពុកអាចពន្យល់ពួកគេអំពីសារៈសំខាន់នៃការគ្រប់គ្រងពេលវេលា ដើម្បីផ្ដោតលើសកម្មភាពអភិវឌ្ឍសំខាន់ៗ។ ទន្ទឹមនឹងនេះ កុមារក៏អាចរៀនអំពីរបៀបគ្រប់គ្រងខ្លួនឯង តាមរយៈការលេងហ្គេម ដូចជា freeze tag និង Red light Green light ជាដើម។

៣. ផ្តល់ឱ្យពួកគេនូវស្វ័យភាព ៖ កាលណាដែលអ្នកកាន់តែជឿជាក់លើសមត្ថភាពកូនរបស់អ្នក ពួកគេនឹងមានទំនុកចិត្ត និងជឿជាក់លើខ្លួនឯងខ្លាំងដូចគ្នា។ ភាពជឿជាក់លើខ្លួនឯង និងសមត្ថភាពក្នុងការលើកទឹកចិត្តខ្លួនឯង គឺពិតជាមានសារៈសំខាន់ ដែលជួយឱ្យកុមារ ជោគជ័យក្នុងការរស់នៅ នៅពេលដែលពួកគេពេញវ័យ។ សកម្មភាព ដែលឪពុកម្ដាយអាចផ្ដល់ឯករាជ្យភាពសម្រាប់កុមារ មានដូចជា ការរៀបចំខ្លួនទៅសាលា ការជ្រើសរើសសកម្មភាព ដើម្បីធ្វើក្រោយចេញពីរៀន និងផ្ដល់ឱកាសឱ្យពួកគេ ធ្វើអ្វីដែលគេចូលចិត្តជាដើម។

៤. មិនផ្ដោតលើភាពល្អឥតខ្ចោះ ៖ បើកឱកាសឱ្យកូនរបស់អ្នកភ្លក្សរសជាតិ នៃភាពបរាជ័យ ប៉ុន្តែអ្នកត្រូវឆ្លើយតបទៅនឹងកំហុសទាំងនោះដោយការយល់ចិត្ត និងលើកទឹកចិត្ត។ លើសពីនេះ អ្នកក៏អាចពន្យល់ពួកគេឱ្យមានទំនុកចិត្តលើខ្លួនឯង និងរៀនសូត្រពីកំហុស និងចាត់ទុកភាពបរាជ័យ ជាឱកាសសិក្សា។ ការស្រាវជ្រាវបានបង្ហាញថា ការទាមទារភាពល្អឥតខ្ចោះមិនធ្វើឱ្យកូនរបស់អ្នក មានភាពជោគជ័យនាពេលអនាគតនោះទេ ហើយទម្លាប់នេះ មានចំណែកជះឥទ្ធិពលដល់បញ្ហាផ្លូវចិត្ត ដូចជា ភាពថប់បារម្ភ និងការមិនឱ្យតម្លៃខ្លួនឯង។

ជំនួសឱ្យការផ្ដោតលើភាពល្អឥតខ្ចោះ អ្នកអាចបង្រៀនកូន ឱ្យពិភាក្សាដោយបើកចំហអំពីកំហុស ដែលគេបានធ្វើ បន្ទាប់មកបង្ហាញពីរបៀបដែលអ្នកបានដោះស្រាយបញ្ហា និងអ្វីដែលអ្នកបានរៀនពីបញ្ហា ដែលអ្នកបានជួប។

៥. ឧស្សាហ៍និយាយអំពីចំណេះដឹងហិរញ្ញវត្ថុ ៖ ចំណេះដឹងហិរញ្ញវត្ថុពិតជាមានសារៈសំខាន់ សម្រាប់មនុស្សគ្រប់វ័យ និងគ្រប់ស្រទាប់វណ្ណៈ។ ដូច្នេះ មិនលឿនពេកទេ ដែលអ្នកពិភាក្សា ឬជជែកអំពីបញ្ហានេះ ជាមួយកូនរបស់អ្នក ជាពិសេស គឺរបៀបរកលុយ ការចំណាយ ដែលត្រឹមត្រូវ ការសន្សំ និងការរៀបចំផែនការហិរញ្ញវត្ថុសម្រាប់ថ្ងៃអនាគត។ ការបង្រៀន និងបង្ហាញកូនរបស់អ្នក អំពីតម្លៃនៃចំណេះដឹងហិរញ្ញវត្ថុ នឹងជួយឱ្យពួកគេអាចរស់នៅក្នុងជីវិតមួយ ដែលគេចង់បាននាពេលអនាគត៕