ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
Ambivert ជាចរិតលក្ខណៈរបស់មនុស្សដែលមានទាំងចរិត introvert និង extrovert នៅក្នុងខ្លួន។ ពួកគេមានសមត្ថភាពភាពសម្របនឹងកាលៈទេសៈផ្សេងៗក្នុងការរស់នៅ អាស្រ័យលើបរិបទជាក់ស្ដែង។ គេអាចលើកជាឧទាហរណ៍ជាក់ស្ដែងបានថា ខណៈមនុស្ស introvert ចូលចិត្តស្ដាប់ ហើយមនុស្ស extrovert ចូលចិត្តជជែក មនុស្ស ambivert អាចស្ដាប់ក៏បាន ជជែកក៏បាន។ ទំនោររបស់មនុស្ស ambivert អាចម្ដងជា introvert ម្ដងជា extrovert អាស្រ័យលើបុគ្គល ឬស្ថានភាពដែលគេកំពុងជួបប្រទះ។ យោងតាមការស្រាវជ្រាវបែបចិត្តសាស្ត្រ បានបង្ហាញថា មានសញ្ញាចំនួន ៦ ដែលបញ្ជាក់ថា អ្នកជាមនុស្ស មានចរិតលក្ខណៈ ambivert ៖
១. មានអារម្មណ៍ថា ទាំង “introversion” និង “extroversion” គឺមានក្នុងខ្លួនអ្នក៖ មនុស្ស Ambivert មានគុណសម្បត្តិរបស់ introvert ដូចជា រីករាយនឹងពេលវេលានៅម្នាក់ឯង ជាអ្នកស្ដាប់ដ៏ល្អ និងមិនចង់ចេញទៅខាងក្រៅ ប៉ុន្តែពួកគេក៏ចូលចិត្តចំណាយពេលជាមួយអ្នកដទៃ មានទំនុកចិត្តខ្ពស់ និងពូកែខាងទំនាក់ទំនងដូច extrovert ដែរ។
២. អ្នកត្រូវការតុល្យភាពសម្រាប់ «ពេលវេលាផ្ទាល់ខ្លួន» និង «ការចូលរួមក្នុងសង្គម» ៖ Ambivert ទទួលបានថាមពលទាំងពេលដែលនៅក្បែរអ្នកដទៃ និងចំណាយពេលនៅម្នាក់ឯង។ ប៉ុន្តែ ការទទួលបានថាមពលនេះ គឺអាស្រ័យលើស្ថានភាពជាក់ស្ដែង ដែលអ្នកកំពុងជួប ហើយបុគ្គលិកលក្ខណៈទាំងពីរនេះ គឺសុទ្ធតែមានពេលវេលា និងដែនកំណត់ សម្រាប់ Ambivert។ មានន័យថា អ្នកមិនអាចនៅម្នាក់ឯងយូរពេក ហើយក៏មិនអាចជួបជុំជាមួយអ្នកដទៃយូរពេក។ ឬម្យ៉ាងទៀត អ្នកក៏ប្រហែលជាធ្លាប់មានបទពិសោធន៍ចង់នៅម្នាក់ឯងច្រើន ហើយក៏ធ្លាប់ចំណាយពេលវេលាជួបជុំក្នុងសង្គមច្រើន។
៣. ចង់មានតុល្យភាព រវាង «ការបំពេញការងារតែម្នាក់ឯង និងធ្វើជាក្រុម» ៖ មនុស្ស Ambivert ចូលចិត្តនិយាយពីតុល្យភាព។ ពួកគេមានទំនោរមើលឃើញពីគុណតម្លៃ នៃរបៀបធ្វើការទាំងពីរ មិនថា ធ្វើការតែម្នាក់ឯង ឬធ្វើការជាក្រុមនោះទេ គឺពួកគេអាចសម្របខ្លួនបានទាំងពីរ។
៤. នៅម្នាក់ឯងច្រើនពេក ឬជួបអ្នកដទៃច្រើនពេក មានអារម្មណ៍ថា ហត់ ៖ ទោះបីជាមនុស្សជាមនុស្សភាពបត់បែនខ្ពស់ក៏ដោយ ប៉ុន្តែពួកគេត្រូវការទាំងពេលវេលានៅម្នាក់ឯង និងទំនាក់ទំនងជាមួយអ្នកដទៃ ហើយពេលវេលានោះគឺស្ថិតនៅក្នុងកម្រិតកំណត់ណាមួយ។ មានន័យថា តុល្យភាពគឺជាគន្លឹះនៃការរស់នៅរបស់មនុស្ស Ambivert ។
៥. ចូលចិត្តការសន្ទនាមានលក្ខណៈស៊ីជម្រៅ ប៉ុន្តែក៏អាចនិយាយលេងធម្មតាបាន ៖ ជាទូទៅមនុស្ស Introvert មិនចូលចិត្តនិយាយលេងសើចច្រើន ប៉ុន្តែចូលចិត្តជជែករឿងសាច់ការ ឬការសន្ទនាស៊ីជម្រៅ។ ចំណែក Extrovert មានទំនោរនិយាយស្ដីគ្រប់រឿងទាំងអស់ ដែលគេបានជួប ដោយមិនគិតថា ជារឿងធម្មតា ឬរឿងស៊ីជម្រៅនោះទេ។ ដោយសារតែមានលក្ខណៈទាំងពីរនេះ Ambivert ចូលចិត្តទាំងការនិយាយលេងសើច និងការជជែកសាច់ការ ។
៦. មានមិត្តភក្ដិច្រើន និងមិត្តជិតស្និទ្ធមួយក្ដាប់តូច ៖ Extroverts មានទំនោរមានមិត្តភ័ក្តិច្រើន ចំណែក introverts ទំនងជាមានមិត្តជិតស្និទ្ធមួយចំនួនតូចដែលពួកគេចំណាយពេលជាមួយពួកគេ។ ប៉ុន្តែ Ambivert គឺមានទាំងពីរ, ពួកគេមានបណ្ដាញមិត្តភក្ដិច្រើន ទន្ទឹមនឹងនេះ ពួកគេក៏មានមិត្តជិតស្និទ្ធ ដើម្បីចំណាយពេលជាមួយដូចគ្នាដែរ៕
