តាមរយៈគេហទំព័រ The Quint World បានឱ្យដឹងថា កាលដែលមានទម្លាប់ធ្វើលំហាត់ប្រាណវាបានបង្ហាញប្រាប់អំពីចំណែកវិជ្ជមាន នៃការប្រើប្រាស់ជីវិតរស់នៅ ជាពិសេសខណៈយើងចង់ថែររក្សារាងកាយ­­ឱ្យល្អនិងមាំទាំ ហើយដើម្បីទទួលបាននូវផលជះដ៏ល្អ គឺកាអនុវត្តទៀតទាត់ជាប្រចាំថ្ងៃ។ ជាទូទៅតម្រូវការនៃការធ្វើចលនារបស់មនុស្សម្នាក់ៗ គឺមានភាពខុសប្លែកគ្នា ដូច្នេះមានតែបុគ្គលខ្លួនឯងនោះទេ ទើបដឹងច្បាស់ថាតើពេលណាទើបវាមានប្រសិទ្ធភាព។

យ៉ាងណាក៏ដោយ ការមានទម្លាប់ធ្វើលំហាត់ប្រាណនៅពេលព្រឹក មានគុណប្រយោជន៍យ៉ាងច្រើនអនេកទៅកាន់រាងកាយ, មានរឿងមួយដែលជំរុញឱ្យការហាត់ប្រាណនៅពេលព្រឹកបានជាប់លាប់គឺ ការសម្រេចចិត្តចូលវគ្គហាត់ប្រាណមិនថាក្រុមដែលមានមនុស្សតិច ឬច្រើននោះទេ ដោយហេតុថា ការហាត់នៅទីកន្លែងដែលមានមនុស្សនិងមានការតម្រង់ទិសដើម្បីជួយរំឮកនិងណែនាំ វាបានជំរុញឱ្យយើងមានកម្លាំងចិត្ត រួមទាំងទទួលបាននូវភាពរីករាយផងដែរ។ បន្ថែមពីនោះ វាក៏បង្កើនសន្ទុះចិត្តឱ្យមានថាមពលជាងមុន ដែលវាជាចំណុចមួយជួយឱ្យការចាប់ផ្តើមថ្ងៃថ្មីប្រកបដោយផលិតភាព។ ខាងក្រោមមាន៣ចំណុចបន្ថែមដែលបង្ហាញអំពីអត្ថប្រយោជន៍នៃការធ្វើលំហាត់ប្រាណនៅពេលព្រឹកព្រលឹម។

១. អភិវឌ្ឍន៍ចិត្ត និងកាយ ៖  លំហាត់ប្រាណនៅពេលព្រឹកគឺផ្តោតទៅលើគ្រប់សកម្មភាពទាំងអស់ដែលនាំឱ្យរាងកាយរបស់អ្នកមានចលនា និងជះផលវិជ្ជមានឬឆ្លើយតបទៅកាន់តម្រូវការខួរក្បាល រាងកាយ និងស្មារតី។ ហើយវានឹងជួយឱ្យអ្នកកាន់តែសម្រេចបាននូវការបែងចែក និងគ្រប់គ្រងពេលវេលាក្នុងរយៈពេលពេញមួយថ្ងៃ។ ហើយវាក៏ជួយពង្រឹងអំពីការរក្សាវិន័យ មិនថាក្នុងដំណើរជីវិតខ្លួន ឬកិច្ចការអាជីពវិជ្ជាជីវៈនោះទេ។

២. សម្រួលប្រព័ន្ធរំលាយអាហារ ៖ លំហាត់ប្រាណនៅពេលព្រឹក វាជួយឱ្យប្រព័ន្ធរំលាយអាហារកាន់តែមានភាពងាយស្រួលច្រើនជាងមុន ហើយការហាត់ប្រាណ ក៏មានរួមបញ្ចូលនូវការបរិភោគអាហារដែលមានសារធាតុចិញ្ចឹមផងដែរ ហើយអាហារទៀតសោធគឺវាមានភាពពាក់ព័ន្ធយ៉ាងសំខាន់កំឡុងពេលដែលយើងត្រូវយកចិត្តទុកដាក់នឹងការហាត់ប្រាណ ដោយសារតែនឹងជួយទ្រទ្រង់ក្នុងការបង្កើនថាមពលក្នុងរយៈពេលពេញមួយថ្ងៃ។ ញ៉ាំអាហារល្អ រក្សារាងកាយឱ្យមានសារធាតុទឹកតាមរយៈការគិតគូរអំពីទម្លាប់បរិភោគឱ្យបានច្រើន ព្រោះទឹកវាជំរុញបាននូវថាមពលបន្ថែមទាំងរាងកាយ និងស្មារតី។

៣. ការបែងចែកពេល ៖  ការក្រោកពីគេងនៅពេលព្រឹកព្រលឹម ជាចំណែកជំរុញឱ្យលោកអ្នកកាន់តែមានពេលវេលាច្រើន រួមទាំងមានឱកាសក្នុងការបំពេញកិច្ចការផ្សេងដែលជាចំណូលចិត្តផ្ទាល់ខ្លួន នេះក៏ដោយសារការមានទម្លាប់គេងល្អ និងការក្រោកធ្វើលំហាត់ប្រាណនៅពេលព្រឹកព្រលឹ​ម ព្រោះវាជួយឱ្យអ្នករក្សាតុល្យភាពនៃរាងកាយក្នុងការបំពេញកិច្ចការក្នុងរយៈពេលមួយថ្ងៃពេញ។ បន្ថែមពីនោះ វាក៏ជំរុញបាននូវការធ្វើកិច្ចការបានលឿន និងជំរុញទឹកចិត្តឱ្យចង់ចូលគេងឱ្យបានលឿនជាងមុន ដែលចំណុចទាំងនេះហើយវាជួយឱ្យមនុស្សមានអារម្មណ៍ល្អ រួមទាំងជាចំណែកបង្កើនភាពស្រស់ស្រាយ៕