ភ្នំពេញ – ក្រសួងធម្មការ និងសាសនា បានបើកវគ្គបណ្តុះបណ្តាលស្តីអំពីតួនាទី ភារកិច្ច និងក្រមសីលធម៌អាចារ្យខ្មែរ លើកទី៤១ នៅក្នុងគោលបំណងលើកទឹកចិត្តឱ្យសិក្ខាកាមអាចារ្យអនុវត្តតួនាទី និងភារកិច្ចអាចារ្យឱ្យបានត្រឹមត្រូវតាមក្បួនច្បាប់ដែលក្រសួងបានដាក់ឱ្យអនុវត្ត ។ ឯកឧត្តមបណ្ឌិត សេង សុមុនី រដ្ឋលេខាធិក្រសួងធម្មការ និងសាសនា មានប្រសាសន៍ថា អាចារ្យជាបុគ្គលថែរក្សាតម្លៃវប្បធម៌ជាតិ និងផ្សព្វផ្សាយប្រពៃណីជាតិ ហើយការបណ្តុះបណ្តាលអាចារ្យឱ្យមានក្រមសីលធម៌នឹងជួយលើកតម្លៃវិជ្ជាជីវៈអាចារ្យខ្មែរ ។

ជាមួយគ្នាឯកឧត្តមបណ្ឌិត សេង សុមុនី រដ្ឋលេខាធិកាក្រសួងធម្មការ និងសាសនា មានប្រសាសន៍បន្ថែមថា ការបណ្តុះបណ្តាលអាចារ្យ គឺជាការតម្រង់ទិសអាចារ្យឱ្យអនុវត្តបញ្ញត្តិរួមគ្នា (ច្បាប់ទម្លាប់) ចៀសវាងអនុវត្តការងារឃ្លាតឆ្ងាយពីគោលប្រតិបត្តិតាមទម្លាប់រៀងៗខ្លួន ។ ទន្ទឹមគ្នានេះដែរ ក្រសួងធម្មការ និងសាសនា ក៏មិនតម្រូវឱ្យអាចារ្យដែលបានចូលវគ្គសិក្សា បោះបង់ការប្រតិបត្តិប្រពៃណីតាមតំបន់នីមួយៗទាំងស្រុងនោះដែរ ប៉ុន្តែអាចារ្យត្រូវថ្លឹងថ្លែងឱ្យបានសមស្រប ព្រមទាំងស្វែងយល់ឱ្យបានស៊ីជម្រៅលើវិជ្ជាជីវៈរបស់ខ្លួន និងជាអ្នកបម្រើព្រះសង្ឃឱ្យរីកចម្រើន ។

ឯកឧត្តមបណ្ឌិត សេង សុមុនី រដ្ឋលេខាធិកាក្រសួងធម្មការ និងសាសនា មានប្រសាសន៍បញ្ជាក់ថា

“កាលណាលោកអាចារ្យបានចូលរួមចំណែកអប់រំសីលធម៌សង្គមដល់យុវជន នោះនឹងជួយឱ្យភូមិឃុំមានសុវត្ថិភាព ដែលជាចំណែកមួយនៃការអប់រំមនុស្សនៅក្នុងសង្គម ហើយពេលដែលសង្គមមានស្ថេរភាព នោះនឹងមានសុវត្ថិភាព និងចូលរួមការពារសន្តិភាពនៃសង្គមជាតិរបស់យើង”

ចំណែកអ្នករៀបចំកម្មវិធីបណ្តុះបណ្តាលអាចារ្យ លោក កែវ ហេង ប្រធាននាយកដ្ឋានស្រាវជ្រាវ និងផ្សព្វផ្សាយពុទ្ធសាសនាផ្សារភ្ជាប់សង្គម នៃក្រសួងធម្មការ និងសាសនា មានប្រសាសន៍ថា ក្នុងនាមជាអ្នកដឹកនាំពិធីកម្មផ្សេងៗ អាចារ្យត្រូវធើ្វយ៉ាងណាអនុវត្តភារកិច្ចឱ្យបានត្រឹមត្រូវតាមក្បួនច្បាប់ពីបុរាណដែលដូនតាបានបន្សល់ទុក ហើយការអនុវត្តនោះត្រូវឱ្យស្របគ្នាពីតំបន់មួយទៅតំបន់មួយ ចៀសវាងការអនុវត្តផ្ទុយគ្នាដែលបណ្តាលមកពីការអនុវត្តខុសពីក្បួនច្បាប់ពីបុរាណ ព្រមទាំងចម្លងយកទៅអនុវត្តខុសតៗគ្នាទៀត ។

ជុំវិញរឿងការអនុវត្តតួនាទី និងភារកិច្ចអាចារ្យនេះ លោក កែវ ហេង បានបញ្ជាក់បន្ថែមទៀតថា ៖ “ឧទាហរណ៍ជាក់ស្តែងកន្លងទៅពិធីភ្ជាប់ពាក្យ គឺអ្នកថតរូប និងភ្នួងជាចំណែកនាំឱ្យការអនុវត្តក្រឹត្យក្រមប្រពៃណីឃ្លាតបន្តិចម្តងៗ ព្រោះអ្នកថតរូបចង់បានរូបកៀកកើយ ហើយភ្នួងចង់ចំណេញពេលវេលា ។ រូបភាពនេះ មិនត្រឹមត្រូវនោះទេ ការពិតពិធីភ្ជាប់ពាក្យមិនមែនមានន័យថា កូនប្រុសកូនស្រីក្លាយជាស្វាមីភរិយាដែលត្រូវនៅកៀកកើយគ្នាក្នុងពេលនេះឡើយ…” ។ 

តាមកាលវិភាគនៃវគ្គបណ្តុះបណ្តាលតួនាទី ភារកិច្ច និងក្រមសីលធម៌អាចារ្យខ្មែរ បានបង្ហាញថា មេរៀនសំខាន់ៗដែលអាចារ្យត្រូវសិក្សារួមមាន ១១មេរៀន មានដូចជា ១. ទស្សនៈទានព្រះពុទ្ធសាសនា, ២. នីតិគ្រួសារ និងអាពាហ៍ពិពាហ៍, ៣. ទម្រង់អាពាហ៍ពិពាហ៍ខ្មែរ, ៤. ប្រវត្តិគម្ពីព្រះត្រៃបិដកនៅកម្ពុជា, ៥. វិជ្ជាហោរាសាស្ត្រ, ៦. ការគ្រប់គ្រងគរុភណ្ឌវត្ត និងការដោះស្រាយអធិករណ៍, ៧.ពិធីពុទ្ធាពិសេក, ៨. វិធីសាស្ត្រគ្រប់គ្រងវត្ត, ៩. ពិធីបុណ្យសពខ្មែរ, ១០. ប្រវត្តិអាចារ្យក្នុងសង្គមខ្មែរ, និង ១១. ក្រមសីលធម៌អាចារ្យខ្មែរ ។ 

សូមជម្រាបថា វគ្គបណ្តុះបណ្តាលតួនាទី ភារកិច្ច និងក្រមសីលធម៌អាចារ្យខ្មែរ លើកទី៤១ មានសិក្ខាកាមព្រះសង្ឃ និងអាចារ្យចំនួន ១៨០អង្គ/នាក់ ។ ចាប់ពីឆ្នាំ២០១០ ក្រសួងធម្មការ និងសាសនា បានសម្របសម្រួលរៀបចំវគ្គបណ្តុះបណ្តាល ចំនួន ៤០វគ្គរួចមកហើយ មានសិក្ខាកាមចំនួន ១១ ៥៧៣អង្គ/នាក់ ដោយក្នុងនោះមានសិក្ខាកាមព្រះសង្ឃជាង ៨០០អង្គ និងអាចារីនីជាង ១៤០នាក់ ។ កម្មវិធីបណ្តុះបណ្តាលអាចារ្យរៀបចំឡើងដោយមិនគិតថ្លៃសម្រាប់សិក្ខាកាមមកពី២៥រាជធានី-ខេត្ត ៕