មជ្ឈមណ្ឌលជាតិសិក្សាភាសាបារាំង (Centre National d’Apprentissage en français) មានទីតាំង​ស្ថិត​នៅ​ក្នុង​សាកលវិទ្យាល័យភូមិន្ទនីតិសាស្រ្ត និង​វិទ្យាសាស្រ្ត​សេដ្ឋកិច្ច ត្រូវ​បានដាក់​ឱ្យ​ដំណើរ​ការ​ជាផ្លូវ​ការ​នៅ​ព្រឹកថ្ងៃទី១៦ ខែធ្នូ ឆ្នាំ២០២៥ ដោយគេជឿថា វានឹង​ជួយ​លើកកម្ពស់ចំណេះដឹង និងពង្រឹងសមត្ថភាពភាសាបារាំងដល់និស្សិតគ្រប់កម្រិតនៅក្នុងសាកលវិទ្យាល័យដែលល្បីល្បាញ​ក្នុងការ​បណ្តុះបណ្តាលជំនាញច្បាប់មួយនេះ។

ឯកឧត្តម Olivier RICHARD ឯកអគ្គរដ្ឋទូតបារាំងប្រចាំនៅកម្ពុជា បានរំលេចនូវសារៈសំខាន់នៃការបង្កើតមជ្ឈមណ្ឌលជាតិសិក្សាភាសាបារាំង ដែលជាការរួមចំណែកសំខាន់មួយ នៃការពង្រឹងការចូលរួមបន្ថែមរបស់សាកលវិទ្យាល័យភូមិន្ទនីតិសាស្ត្រ និងវិទ្យាសាស្រ្តសេដ្ឋកិច្ច ក្នុងកិច្ចការហ្វ្រង់កូហ្វូនីនៃវិស័យអប់រំ ព្រមទាំងជាទីកន្លែងសំខាន់មួយក្នុងកិច្ចសហប្រតិបត្តិការជាមួយស្ថានទូតបារាំងប្រចាំនៅកម្ពុជា។

ជាមួយគ្នានេះដែរការបង្កើតមជ្ឈមណ្ឌលជាតិសិក្សាភាសាបារាំង ផ្ដល់នូវទីតាំងសំខាន់និងបរិយាកាសដ៏ល្អមួយក្នុងការលើកកម្ពស់ការរៀន និងបង្រៀនភាសាបារាំង ព្រមទាំងការអនុវត្តសកម្មភាពផ្សេងៗបន្ថែមទៀតដែលចូលរួមចំណែកក្នុងការពង្រឹងបន្ថែមនូវសមត្ថភាពរបស់និស្សិតសិក្សាភាសាបារាំង។

ក្នុងឱកាសនោះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្រ្តីក្រសួងអប់រំ យុវជន និងកីឡា បានថ្លែងអំណរគុណដល់ក្រុមការងារនៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ផ្នែកពាក់ព័ន្ធនានា និងដៃគូសហប្រតិបត្តិការទាំងឡាយដែលបានចូលរួមចំណែកផ្តួចផ្តើមគម្រោងនេះឡើង ដោយថានេះសបញ្ជាក់ពីការផ្តល់តម្លៃទៅលើឧត្តមភាព នៃការសិក្សា និងតួនាទីយូរអង្វែងរបស់ភាសាបារាំងនៅក្នុងព្រះរាជណាចក្រកម្ពុជា។

ឯកឧត្តមរដ្ឋមន្រ្តីមានប្រសាសន៍ថា មជ្ឈមណ្ឌលជាតិសិក្សាជាភាសាបារាំងនេះ មិនមែនគ្រាន់តែជាមជ្ឈមណ្ឌលធម្មតាមួយទេ តែជាមជ្ឈមណ្ឌលសំខាន់មួយដែលស្ថិតក្រោមសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច និងមានបេសកកម្មច្បាស់លាស់ ដែលបានកំណត់ដោយសេចក្តីសម្រេចរបស់ក្រសួងអប់រំ យុវជន និងកីឡា ពោលគឺការលើកកម្ពស់ចំណេះដឹង និងការពង្រឹងសមត្ថភាពភាសាបារាំងសម្រាប់និស្សិតគ្រប់កម្រិត។

ឯកឧត្តម ហង់ជួន ណារ៉ុន មានប្រសាសន៍ ដោយបញ្ជាក់ថា ការប្រើប្រាស់ភាសាបារាំង ជាពិសេសក្នុងវិស័យច្បាប់ និងវិទ្យាសាស្ត្រសេដ្ឋកិច្ច ក្លាយជាគុណសម្បត្តិប្រកួត ប្រជែងដ៏សំខាន់ សម្រាប់បណ្តុះបណ្តាលមន្ត្រីរាជការ អ្នកច្បាប់ និងសហគ្រិនជំនាន់ក្រោយ ដែលមានសមត្ថភាពប្រតិបត្តិការការងារលើឆាកតំបន់ និងអន្តរជាតិ។ ហើយថា សមិទ្ធផលនេះ គឺជាផ្លែផ្កានៃឆន្ទៈនយោបាយយ៉ាងរឹងមាំ និងការខិតខំប្រឹងប្រែងឥតឈប់ឈររបស់ក្រុមការងារនៃក្រសួងអប់រំ យុវជន និងកីឡា និងមានការគាំទ្ររបស់ស្ថានទូតបារាំងប្រចាំព្រះរាជាណាចក្រកម្ពុជា និងដៃគូសហប្រតិបត្តិការបារាំងនានា៕