ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានផ្តល់អាហារូបករណ៍ដ៏ថ្លៃថ្លារបស់ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត (អ.ម.ត) នៅសាកលវិទ្យាល័យ ពាណិជ្ជសាស្ត្រ អេស៊ីលីដា សម្រាប់ឆ្នាំសិក្សា ២០២៥-២០២៦ ចំនួន៥០កន្លែង។
ជំនាញដែលអាហារូបករណ៍ផ្ដល់ជូនរួមមាន ៖ ធនាគារ និងហិរញ្ញវត្ថុ, ពាណិជ្ជកម្មអន្តរជាតិ, គណនេយ្យ, ទីផ្សារ, សេដ្ឋកិច្ចពាណិជ្ជកម្ម, នីតិសាស្ត្រ, ភាសាអង់គ្លេសទំនាក់ទំនងធុរកិច្ច, ភាសាអង់គ្លេសបំណិនបកប្រែ, ការបង្រៀនភាសាអង់គ្លេស, វិទ្យាសាស្ត្រ និងវិស្វកម្មកុំព្យូទ័រ, បច្ចេកវិទ្យាព័ត៌មានធុរកិច្ច, បច្ចេកវិទ្យាហិរញ្ញវត្ថុ, គ្រប់គ្រងធុរកិច្ច និងសហគ្រាសគ្រប់គ្រងបណ្ដាញផ្គត់ផ្គង់ និងចលនូបត្ថម្ភ។ សម្រាប់វេនសិក្សា នឹងធ្វើការតាមកំណត់របស់សាកលវិទ្យាល័យ ដោយផ្អែកលើជំនាញដែលបានជ្រើសរើស។
លក្ខខណ្ឌនៃការជ្រើសរើស ៖ ជាសិស្សនិទ្ទេស A ដែលបានប្រឡងជាប់សញ្ញាបត្រមធ្យមសិក្សាទុតិយភូមិឆ្នាំ២០២៤-២០២៥។ មានឆន្ទៈពិតប្រាកដក្នុងការបន្តការសិក្សា ខិតខំរៀនសូត្រ, គោរពតាមការណែនាំ និងព្រមទទួលយកលក្ខខណ្ឌដែលមានចែងរបស់គណៈកម្មាធិការអាហារូបករណ៍សិស្ស-និស្សិតក្រីក្រ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត និងសាកលវិទ្យាល័យ ពាណិជ្ជសាស្ត្រ អេស៊ីលីដា។
ដើម្បីធ្វើការដាក់ពាក្យ បេក្ខជនត្រូវដាក់ពាក្យស្នើសុំជាមួយគណៈកម្មាធិការអាហារូបករណ៍តាមរយៈប្រព័ន្ធអនឡាញដោយចូលទៅកាន់គេហទំព័រផ្លូវការរបស់អាហារូបករណ៍ អ.ម.ត ឬចូលទៅកាន់សាកលវិទ្យាល័យតាមរយៈ https://t.me/+JWPGsTZxuHM0MTZl ។ បេក្ខជនត្រូវភ្ជាប់រូបថតទំហំ ៤x៦ ផ្ទៃខាងក្រោយពណ៌ស ឬផ្ទៃមេឃ (ជាFile.JPG) អត្តសញ្ញាណបណ្ណសញ្ជាតិខ្មែរ ឬសេចក្ដីចម្លងសំបុត្រ (ជាFile PDF) សៀវភៅគ្រួសារ ឬសៀវភៅស្នាក់នៅ (ជាFile PDF) វិញ្ញាបនបត្របណ្ដោះអាសន្នមធ្យមសិក្សាទុតិយភូមិ មានការបញ្ជាក់ទទួលស្គាល់ផ្លូវការ ឬបញ្ជីរាយនាមបេក្ខជនប្រឡងជាប់សញ្ញាបត្រមធ្យមសិក្សាទុតិយភូមិមានលំដាប់ពិន្ទុ (ជាFile PDF)។
ចាប់ទទួលពាក្យពីថ្ងៃទី២៥ ខែកញ្ញា ឆ្នាំ២០២៥ រហូតដល់ ដល់ថ្ងៃទី១៥ ខែតុលា ឆ្នាំ២០២៥ វេលាម៉ោង ១៧:០០ នាទី ជាកំហិត។
សម្រាប់ព័ត៌មានបន្ថែម សូមទំនាក់ទំនងការិយាល័យអាហារូបករណ៍ មានទីតាំងស្ថិតនៅផ្ទះលេខ៤ ផ្លូវ៥២២ សង្កាត់បឹងកក់១ ខណ្ឌទួលគោក រាជធានីភ្នំពេញ រៀងរាល់ថ្ងៃចន្ទ-សុក្រ វេលាម៉ោង៨ព្រឹក-៥ល្ងាច៕
