ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យុវជនដែលធ្វើការពីចម្ងាយ ធ្លាប់ទទួលបាននូវបទពិសោធន៍ឯកោ ទោះបីជាការ ធ្វើការម្នាក់ឯងជាចំណូលចិត្ត ឬមានភាពងាយស្រួលក្នុងការផ្តោតក៏ដោយ។ ភាពឯកោជាមួយការងារ គឺមានភាពពាក់ព័ន្ធនឹងសុខភាពផ្លូវចិត្ត ដូចជាផលិតភាពថយចុះ ឬមិនពេញចិត្តជាមួយលទ្ធផលការងារជាដើម។ តាមរយៈគេហទំព័រ Fast Company បានឱ្យដឹងថា ការពង្រឹងជំនាញភាពវៃឆ្លាតផ្នែកផ្លូវអារម្មណ៍ ជាកត្តាកាត់បន្ថយភាពឯកោជាមួយការងារ ឬនៅកន្លែងការងារ និងទំនាក់ទំនងជាមួយមនុស្សរួមអាជីពជាដើម។ ខាងក្រោមនេះ ជាការចង្អុលបង្ហាញ៤ចំណុច អំពីជំនាញតូចៗ តែមានលទ្ធភាពពង្រឹងភាពឆ្លាតវៃផ្នែកផ្លូវអារម្មណ៍។
១. ការស្វែងយល់ពីខ្លួនឯង ៖ ម្តងម្កាលអាចជួបប្រទះនឹងភាពឯកា គ្រាន់តែតិច ឬច្រើន យូរឬឆាប់តែប៉ុណ្ណោះ។ ក្នុងការដោះចំណោទបញ្ហានេះ ជាកិច្ចការដំបូង គឺ ផ្តោតការស្គាល់ខ្លួនឯងឱ្យកាន់តែច្បាស់មួយកម្រិតទៀត។ ការស្វែងយល់ទៀតសោត គឺសង្កេតចេញពីកំណត់ហេតុប្រចាំថ្ងៃ បុព្វហេតុដែលនាំឱ្យមានអារម្មណ៍មិនល្អ និងការសម្របខ្លួនទៅនឹងកាលៈទេសៈបច្ចុប្បន្ន សុទ្ធសឹងតែជាការរួមចំណែកដល់ការស្វែងយល់ពីខ្លួនឯង។
២. ការគ្រប់គ្រងអារម្មណ៍ ៖ ជាធម្មជាតិ នៃអារម្មណ៍មានឡើងចុះ ដូច្នេះការគ្រប់គ្រងអារម្មណ៍ គឺត្រូវការពេលវេលា និងជំនាញក្នុងការគ្រប់គ្រង ហើយវិធីសាមញ្ញៗ ដែលគេអនុវត្តន៍ជាទូទៅដោយខ្លួនឯង គឺ ការដកដង្ហើមវែងៗ ការផ្ចង់អារម្មណ៍ ការដើរចលនា នៅក្បែរធម្មជាតិ និងសកម្មភាពមួយចំនួនទៀតដែលជំរុញឱ្យអារម្មណ៍ស្ងប់។ ការអនុវត្តពុំចាំបាច់ត្រូវធ្វើតាមទាំងអស់នោះទេ ប៉ុន្តែជាការជ្រើសរើសថា តើមួយណា ដែលឆ្លើយតបនឹងស្ថានភាពជាក់ស្តែងរបស់ខ្លួនឯង។
៣. ការបង្កើនភាពស្និទ្ធស្នាល ៖ ការពង្រឹងភាពឆ្លាតវៃផ្នែកអារម្មណ៍ ដោយការបង្កើនភាពស្និទ្ធស្នាល ជាកត្តារួមចំណែកដល់ការកាត់បន្ថយភាពឯកោជាមួយការងារ។ ហើយវិធីមួយ ជួយឱ្យភាពស្និទ្ធស្នាលកើតឡើងបាន គឺការនិយាយសន្ទនាគ្នា ការសួរនាំគ្នា ការគាំទ្រគ្នា និងការសង្កេតស្វែងយល់ពីសុខទុក្ខគ្នាជាដើម។
៤. ការបង្កើនទំនាក់ទំនង ៖ មិនថា ធ្វើការពីចម្ងាយ ឬដោយផ្ទាល់នោះទេ ជៀសពុំរួចពីការមានទំនាក់ទំនងជាមួយមនុស្សឡើយ ដូច្នេះក្រៅតែពីការផ្តោតលើកិច្ចការផ្ទាល់ខ្លួន គួរចេញក្រៅដើម្បីស្តាប់រឿងរ៉ាវរបស់អ្នកដទៃ ជាពិសេសអ្នកធ្វើការពីចម្ងាយ ឬដាច់ដោយឡែកពីមនុស្សដទៃ។ យ៉ាងណា ចំពោះអ្នកមានការប្រជុំតាមអនឡាញញឹកញាប់ គួរចំណាយពេលខ្លះ ដើម្បីនិយាយគ្នាក្រៅការងារ ដូចជាបញ្ហាប្រឈម ការតស៊ូ និងរឿងរ៉ាវរីករាយជាដើម៕
