ពីប្រជាជាតិមួយ ដែលមានស្មារតីខ្ពស់ក្នុងការខិតខំប្រឹងប្រែងធ្វើការលើសម៉ោង និងមានភាពស្មោះចំពោះនិយោជក អស់រយៈពេលជាយូរ, ពេលនេះ ប្រជាជនជប៉ុន កាន់តែច្រើន ជាពិសេសយុវជន ជំនាន់ Z កំពុងងាកមកគិតអំពីតុល្យភាពជីវិត និងការងារ។

ការស្រាវជ្រាវបានបង្ហាញថា ចំនួនជនជាតិជប៉ុន កំពុងជ្រើសរើសទម្លាប់ទៅធ្វើការឱ្យបានទាន់ម៉ោងកំណត់ និងចាកចេញពីកន្លែងធ្វើការឱ្យបានឆាប់បំផុត តាមដែលអាចធ្វើទៅបាន។

ពួកគេមិនចង់បានការសរសើរ និងការដំឡើងតំណែងពីសំណាក់ថ្នាក់លើរបស់គេទៀតនោះទេ។ ពួកគេមិនខ្វល់ខ្វាយពីការរំពឹងទុកនៃប្រាក់បៀវត្សរ៍ដែលអាចឡើងខ្ពស់ជាងមុនឡើយ បើទោះជាមានទំនួលខុសត្រូវការងារច្រើនជាងមុនក៏ដោយ ខណៈដែលប្រាក់រង្វាន់លើកទឹកចិត្ត ដែលជំរុញឱ្យពួកគេប្រឹងប្រែងធ្វើការ ក៏លែងមានប្រសិទ្ធភាពទៀតដែរ។

យោងតាមការសិក្សាលើបុគ្គលិកជាង ៣ពាន់នាក់ ដែលមានអាយុ ចាប់ពី ២០ ទៅ៥៩ឆ្នាំ ដែលធ្វើឡើងដោយ Mynavi Career Research Lab ជាទីភ្នាក់ងារស្រាវជ្រាវការងារមានមូលដ្ឋាននៅទីក្រុងតូក្យូ ប្រហែល ៤៥ភាគរយ និយាយថា ពួកគេកំពុងធ្វើការតិចបំផុត។ អ្វីដែលគួរឱ្យកត់សម្គាល់នោះ គឺយុវជនក្នុងវ័យ ២០ឆ្នាំ ចាប់ផ្ដើមគិតអំពី តុល្យភាពជីវិត និងការងារ ជាជាង ការធ្វើការលើសកម្រិត។

មានហេតុផលជាច្រើន ដែលធ្វើឱ្យបុគ្គលិកជនជាតិជប៉ុន លែងប្រឹងប្រែងធ្វើការខ្លាំង ដូចអ្នកជំនាន់មុន

សម្រាប់យុវជន Issei វ័យ ២៦ឆ្នាំ បដិសេធ មិនបញ្ជាក់ពីត្រកូលរបស់គាត់ បានផ្ដល់ចម្លើយដល់សារព័ត៌មានអាល្លឺម៉ង់ DW តាមត្រង់ថា គាត់ចង់មានពេលវេលាបន្ថែមទៀត ដើម្បីធ្វើរឿងដែលគាត់ចូលចិត្ត។ យុវជនរូបនេះ បញ្ជាក់ថា ខ្លួនមិនមែនស្អប់ការងារនោះទេ ហើយក៏ដឹងថា គាត់ត្រូវមានលុយសម្រាប់ចាយវាយ លើការចំណាយប្រចាំថ្ងៃ ការបង់ផ្ទះជួល និងវិក័យបត្រផ្សេងៗទៀត ប៉ុន្តែគាត់ត្រូវការពេលវេលាផ្ទាល់ខ្លួនខ្លះ ដើម្បីជួបជុំជាមួយមិត្តភក្តិ ធ្វើដំណើរកម្សាន្ត ឬសម្រាកស្ដាប់តន្ត្រីជាដើម។

ការសិក្សារបស់ Mynavi បានសន្និដ្ឋានថា យុវជនជប៉ុន ងាកមកឱ្យតម្លៃពេលវេលាផ្ទាល់ខ្លួនកាន់តែខ្លាំង ដែលនេះគឺជាការលើកទឹកចិត្តសម្រាប់មនុស្សភាគច្រើន មកគិតគូរអំពីតុល្យភាពជីវិត និងការងារ។

យុវជនផ្សេងទៀត បាននិយាយថា ពួកគេជឿថា ទំហំការងារ ដែលពួកគេកំពុងទទួលបាន គឺ​សមរម្យសម្រាប់ប្រាក់ឈ្នួល ដែលគេទទួលបាន ខណៈសមិទ្ធផលការងាររបស់ពួកគេនៅតែមាន។

លោក Sumie Kawakami សាស្ត្រាចារ្យវិទ្យាសាស្ត្រសង្គមនៅសាកលវិទ្យាល័យ Yamanashi Gakuin និងជាទីប្រឹក្សាអាជីពការងារ បានលើកឡើងថា យុវជនជាច្រើនបានឃើញឪពុកម្តាយរបស់ពួកគេលះបង់ពេលវេលាទៅឱ្យក្រុមហ៊ុនមួយ ដោយបានធ្វើការបន្ថែមម៉ោងជាច្រើនម៉ោង ហើយបានលះបង់ជីវិតឯកជនសម្រាប់តែការងារ និងក្រុមហ៊ុន ហើយនេះ មិនមែនជាអ្វី ដែលពួកគេចង់បាននោះទេ។

ជាមួយគ្នា ករណីអត្តឃាតដ៏ច្រើន ដោយសារការងារ ក្នុងចំណោមមនុស្សជំនាន់មុន ក៏ជាមូលហេតុ នាំឱ្យយុវជន​ងាកមក​គិតពីផ្លូវចិត្តរបស់គេដែរ។ នៅឆ្នាំ១៩៩៨ មានករណីធ្វើអត្តឃាតចំនួន ៣២,៨៦៣ករណីក្នងប្រទេសជប៉ុន ហើយមូលហេតុនៃការធ្វើអត្តឃាតទាំងនោះ គឺបណ្ដាលមកពីការធ្វើការងារលើសម៉ោងកំណត់ និងសម្ពាធការងារ។ ខណៈនៅឆ្នាំ២០២៤ ករណីអត្តឃាត នៅតែមានខ្ពស់ ដោយមានមនុស្សសម្លាប់ខ្លួន ប្រហែល ២០,៣២០នាក់៕