ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យុវជន សិស្ស និស្សិត ដែលបានចូលរួមក្នុងពិព័រណ៌ការងារ និងផលិតភាពជាតិ ២០២៤ បានលើកឡើងថា វេទិកាមួយនេះ ពិតជាមានសារៈសំខាន់ដោយផ្តល់នូវចំណេះដឹង និងបទពិសោធន៍ជាច្រើនដល់ពួកគេ ដូច្នេះ យុវជន សិស្ស និស្សិត ដែលមិនទាន់បានចូលរួម គួរតែចូលរួមកម្មវិធីនេះ។
កញ្ញា សុខ លី ជានិស្សិតឆ្នាំទី១ ផ្នែកព័ត៌មានវិទ្យា នៃវិទ្យាស្ថានពាណិជ្ជសាស្រ្ត និយាយថា រូបនាងចូលរួមក្នុងកម្មវិធីពិព័រណ៍ការងារ និងផលិតភាពជាតិឆ្នាំ២០២៤ ដោយសារចង់ដឹងកម្មវិធីនេះ ធ្វើពីអ្វីខ្លះ និងមានការងារអ្វីខ្លះនៅទីនេះ និងចង់ដឹងពីរបៀបដាក់ពាក្យការងារ ដើម្បីត្រៀមខ្លួនជាមុន។
និស្សិតឆ្នាំទី១ ផ្នែកព័ត៌មានវិទ្យា នៃវិទ្យាស្ថានពាណិជ្ជសាស្រ្ត រូបនេះ បញ្ជាក់បន្ថែមថា កម្មវិធីពិព័រណ៍ការងារ និងផលិតភាពជាតិ ឆ្នាំនេះ រៀបចំបានល្អ ដោយមានឃើញស្តង់តាំងបង្ហាញរបស់ក្រសួង ស្ថាប័ន ក្រុមហ៊ុន ជាច្រើន។ ជាពិសេស ការស្វែងរកព័ត៌មានអំពីជំនាញដែលកំពុងមានតម្រូវការទីផ្សារការងារ។
ខ្ញុំមិនធ្លាប់មកកម្មវិធីនេះពីមុនទេ ហើយនៅពេលបានមកដល់ គឺជួបអ្វីថ្មីៗច្រើន។
កញ្ញា សុខ លី លើកទឹកចិត្តយុវជន ដែលជាសិស្ស និស្សិត គួរចូលរួមកម្មវិធីពិព័រណ៍ការងារយ៉ាងហោចណាស់ឱ្យបានម្ដង ដោយសារតែនៅពេលយើងចូលរួមកម្មវិធីនេះ នឹងទទួលបានចំណេះដឹងថ្មីៗ និងបទពិសោធន៍ថ្មិៗច្រើន។
សម្រាប់ លោក យ៉ុន ណេន ជានិស្សិតឆ្នាំទី១ ផ្នែករដ្ឋបាលសាធារណៈ នៃសាកលវិទ្យាល័យធនធានមនុស្ស លើកឡើងដែរថា នេះជាលើកទីមួយដែលលោកចូលរួមកម្មវិធីពិព័រណ៍ការងារនេះ ធ្វើឱ្យលោកបានស្គាល់មនុស្សជាច្រើន និងទទួលចំណេះដឹងថ្មីៗ ក៏ដូចជាការណែនាំពីថ្នាក់ដឹកនាំក្នុងកម្មវិធីផងដែរ។
និស្សិតឆ្នាំទី១ ផ្នែករដ្ឋបាលសាធារណៈ នៃសាកលវិទ្យាល័យធនធានមនុស្ស រូបនេះ បន្ថែមថា លោកសង្កេតឃើញថា នៅទីនេះមានការងារមួយចំនួនដែលទាមទារឱ្យសិស្ស និស្សិត មានចំណេះដឹង និងបទពិសោធន៍ ដើម្បីទទួលបានឱកាសការងារ។ លោក យ៉ុន ណេន បន្តថា សម្រាប់រូបលោក គឺនៅបន្តអភិវឌ្ឍសមត្ថភាពបន្ថែមទៀត ដើម្បីត្រៀមខ្លួនឱ្យរួចរាល់សម្រាប់ឱកាសការងារដែលលោកពេញចិត្ត និងត្រូវតាមជំនាញដែលបានរៀននៅសាកលវិទ្យាល័យ។
លោក យ៉ុន ណេន ក៏បានលើកទឹកចិត្តយុវជន ជាពិសេសនិស្សិតផ្នែកភាសាបរទេស និងបច្ចេកវិទ្យា មកចូលរួមកម្មវិធីពិព័រណ៍ការងារនេះ ដើម្បីដឹងអំពីឱកាសការងារដែលក្រុមហ៊ុនធំៗកំពុងមានតម្រូវការ។
គួរជម្រាបជូនថា ពិព័រណ៍ការងារ និងផលិតភាពជាតិឆ្នាំ២០២៤ ប្រារព្ធឡើង រយៈពេលពីរថ្ងៃ គឺថ្ងៃទី២៦-២៧ ខែតុលា ឆ្នាំ២០២៤ ប្រធានបទ “បង្កើនផលិតភាព៖ ជំនាញ និងកំណើនប្រកបដោយចីរភាព”៕
