ក្រសួងអប់រំ យុវជន និងកីឡា បាន​ប្រកាស​ពីប្រឡងប្រជែងជ្រើសរើសនិស្សិតអាហារូបករណ៍សិក្សាថ្នាក់បរិញ្ញាបត្រចំនួន១៥កន្លែង ទៅ​សិក្សា​នៅសាធារណរដ្ឋប្រជាមានិតឡាវ សម្រាប់​ឆ្នាំសិក្សា២០២៤-២០២៥។ អាហារូបករណ៍ផ្ដល់ជូនតាមរយៈ កិច្ចព្រមព្រៀងរវាងក្រសួងអប់រំ យុវជន និងកីឡា នៃព្រះរាជាណាចក្រកម្ពុជា និងក្រសួងអប់រំ​ យុវជន និងកីឡានៃសាធារណរដ្ឋប្រជាធិបតេយ្យប្រជាមានិតឡាវ ស្ដីពីវិស័យអប់រំសម្រាប់រយៈពេលពីឆ្នាំ២០១៩-២០២៣។

ជំនាញដែលអាហារូបករណ៍ផ្ដល់ជូនរួមមាន ថ្នាក់បរិញ្ញាបត្របរិស្ថាន បរិញ្ញាបត្រព័ត៌មានវិទ្យា បរិញ្ញាបត្រគ្រប់គ្រងឈើ បរិញ្ញាប័ត្រសណ្ឋាគារ និងទេសចរណ៍ បរិញ្ញាបត្រសេដ្ឋកិច្ចពាណិជ្ជកម្ម បរិញ្ញាបត្រស្ថាបត្យកម្ម បរិញ្ញាប័ប្រគ្រប់គ្រងធនធានទឹក និងឧតុនិយម។

លក្ខខណ្ឌ នៃការចុះឈ្មោះ បេក្ខជនទាំងពីរភេទមានសញ្ជាតិខ្មែរ មានសញ្ញាបត្រមធ្យមសិក្សាទុតិយភូមិ ឬសញ្ញាបត្រមានតម្លៃសមមូល មានអាយុមិនលើសពី៣៥ឆ្នាំ (គិតត្រឹមខែតុលាឆ្នាំ២០២៤) និងមានសុខភាពល្អទាំងកម្លាំងកាយ និងសតិបញ្ញា។ បេក្ខជននឹងតម្រូវប្រកួតប្រជែងលើវិញ្ញាសារពីរមុខរួមមាន វប្បធម៌ទូទៅ ៩០នាទី និង គណិតវិទ្យា ៩០នាទី។

ដើម្បីធ្វើការដាក់ពាក្យ បេក្ខជនត្រូវភ្ជាប់ឯកសារចាំបាច់មួយចំនួនដូចជា បង្កាន់ដៃដាក់ពាក្យសុំ១ច្បាប់ ពាក្យសុំអាហារូបករណ៍១ច្បាប់ ជីវប្រវត្តិសង្ខេប១ច្បាប់ កិច្ចសន្យា១ច្បាប់ សញ្ញាបត្រមានតម្លៃសមមូល (ច្បាប់ចម្លង១ច្បាប់) ដោយមានបញ្ជាក់ពីសាលារាជធានី ខេត្ត ក្រុង ស្រុក ខណ្ឌ (សូមភ្ជាប់ច្បាប់ដើមជាមួយដើម្បីពិនិត្យ និងផ្ទៀងផ្ទាត់)។ ជាមួយគ្នានេះ សូមភ្ជាប់សេចក្ដីបញ្ជាក់ពីគ្រឹះស្ថានសិក្សាចំពោះបេក្ខជនជានិស្សិតកំពុងសិក្សា រូបថត៤x៦ (រូបថតថ្មីចំពីមុខ មិនមានពាក់វែនតា និងមានផ្ទៃពណ៌ស) ចំនួន៤សន្លឹក និងវិញ្ញាបនបត្រពិនិត្យកាយសម្បទា០២ច្បាប់ (បំពេញក្រោយពេលប្រឡងជាប់)។

ចំពោះបេក្ខជនដែលមានចំណាប់អារម្មណ៍ក្នុងការដាក់ពាក្យអាចទៅទទួលពាក្យប្រឡងនៅការិយាល័យអាហារូបករណ៍ និងកម្មសិក្សា នៃនាយដ្ឋានសហប្រតិបត្តិការអន្តរជាតិ និងកិច្ចការអាស៊ានដែលមានអាសយដ្ឋាននៅ​អគារលេខ២៣ ផ្លូវលេខ៣៦០​ សង្កាត់បឹងកេងកង១ ខណ្ឌបឹងកេងកង រាជធានីភ្នំពេញ ។

សម្រាប់ព័ត៌មានបន្ថែមអាចទំនាក់ទំនងទៅកាន់ទូរស័ព្ទលេខ ០៩៨ ៩៨៩ ៧៨៩ ដោយចាប់ទទួលពាក្យពីថ្ងៃផ្សាយដំណឹងនេះរហូតដល់ថ្ងៃទី០៥ ខែសីហា ឆ្នាំ២០២៤៕