ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ យុវជន និងកីឡា ប្រកាសជ្រើសរើសសិស្សនារីអាយុពី៨ ដល់១៨ឆ្នាំ ចូលរួមប្រកួតកម្មវិធីតិចណូវេសិន កម្ពុជា ឆ្នាំ២០២៥ ដើម្បីបង្កើនបរិមាណក្មេងស្រីបញ្ចប់ការសិក្សាលើជំនាញកុំព្យូទ័រ ។ កម្មវិធីនេះ ជំរុញលើកទឹកចិត្តកុមារីឱ្យក្លាយជាអ្នកអភិវឌ្ឍកម្មវិធី អ្នកច្នៃប្រតិដ្ឋ បង្កើតដំណោះស្រាយថ្មីដោយប្រើប្រាស់បច្ចេកវិទ្យា ដើម្បីចូលរួមដោះស្រាយបញ្ហាក្នុងសហគមន៍ និងបង្ហាញពីការសម្រេចបានរបស់កុមារីកម្ពុជា ។
កម្មវិធីតិចណូវេសិនជាកម្មវិធីប្រកួតប្រជែងលំដាប់ថ្នាក់អន្តរជាតិ ផ្តល់ឱកាសឱ្យក្មេងស្រីដែលមានអាយុចាប់ពី៨ ទៅ ១៨ឆ្នាំ ទទួលបានបទពិសោធន៍ទាក់ទងនឹងបចេ្ចកវិទ្យា និងសហគ្រិនភាពដោយបម្លែងគំនិតអាជីវកម្មរបស់ពួកគេទៅជាកម្មវិធីទូរស័ព្ទដៃ ដែលអាចដោះស្រាយបញ្ហានៅក្នុងសហគមន៍របស់ពួកគេបាន។
កម្មវិធីនេះ នឹងប្រព្រឹត្តទៅចាប់ពីខែធ្នូ ឆ្នាំ២០២៤ រហូតដល់ខែសីហា ឆ្នាំ២០២៥ ឆ្លើយតបទៅនឹងបរិបទនៃការអប់រំបែបឌីជីថល។ លើសពីនេះ វគ្គបណ្តុះបណ្ដាលមានរយៈពេល ១២សប្តាហ៍នឹងប្រព្រឹត្តទៅតាមប្រព័ន្ធអនឡាញ ចាប់ផ្តើមពីខែមករា ដល់ខែមេសា ឆ្នាំ២០២៥ លើជំនាញសរសេរកូដ បង្កើតកម្មវិធីទូរស័ព្ទដៃ និងសហគ្រិនភាព។ មុខវិជ្ជាសំខាន់ៗត្រូវសិក្សា រួមមាន Ideation, Coding, Entrepreneurship, Pitching និង Artificial Intelligence (AI)។
លក្ខខណ្ឌចូលរួម ៖ បេក្ខជនត្រូវតែជាក្មេងស្រីមានអាយុចាប់ពី៨ ដល់ ១៨ឆ្នាំ, ត្រូវបង្កើតជាក្រុមដែលមានសមាជិកចាប់ពី ៣ទៅ៥នាក់, ជាសិស្សដែលកំពុងរៀននៅតាមគ្រឹះស្ថានសិក្សាសាធារណៈ ឬឯកជន, មានការប្ដេជ្ញាចិត្តខ្ពស់ក្នុងការប្រើប្រាស់បច្ចេកវិទ្យា និងការសិក្សាស្រាវជ្រាវ, ត្រូវចូលរួមវគ្គបណ្តុះបណ្តាលរយៈពេល ១២សប្តាហ៍ និងមានការគាំទ្រពីគណៈគ្រប់គ្រងសាលារៀន អាណាព្យាបាលឱ្យចូលរួមកម្មវិធីប្រកួតប្រជែង។
អត្ថប្រយោជន៍ទទួលបាន រួមមាន អភិវឌ្ឍជំនាញបច្ចេកវិទ្យា ភាពច្នៃប្រឌិត ការរចនា និងសហគ្រិនភាព ផ្តល់ជំនាញដល់កុមារីកម្ពុជាដើម្បីត្រៀមខ្លួនក្នុងការដោះស្រាយបញ្ហាជុំវិញការអភិវឌ្ឍសហគមន៍ បង្ហាញពីសក្តានុពលនៃភាពជោគជ័យរបស់ស្ត្រីវ័យក្មេង លើផ្នែកបច្ចេកវិទ្យា និងសហគ្រិនភាព ចេះធ្វើការងារជាក្រុម ទទួលបានពានរង្វាន់ជ័យលាភី លិខិតសរសើរពីក្រសួងអប់រំ យុវជន និងកីឡា និងសហគមន៍តិចណូវេសិនកម្ពុជា។
គួរជម្រាបជូនថា បន្ទាប់ពីបញ្ចប់វគ្គបណ្តុះបណ្តាលក្រុមកុមារីត្រូវផ្ញើកម្មវិធីទូរស័ព្ទដៃ ដែលបានអភិវឌ្ឍគម្រោងអាជីវកម្ម និងវីដេអូខ្លីទៅក្នុងគេហទំព័រ Technovation Global ដើម្បីចូលរួមប្រកួតប្រជែងនៅថ្នាក់ជាតិ និងថ្នាក់អន្តរជាតិ។
កុមារី និងយុវនារី ដែលមានចំណាប់អារម្មណ៍ចង់ចូលរួមកម្មវិធីប្រកួតប្រជែង Technovation កម្ពុជា អាចដាក់ពាក្យស្នើសុំតាមរយៈតំណភ្ជាប់ https://my.technovationchallenge.org/signup ចាប់ពីថ្ងៃផ្សាយដំណឹងនេះ រហូតដល់ថ្ងៃទី៣១ ខែមករា ឆ្នាំ២០២៥។ សម្រាប់ព័ត៌មានបន្ថែមសូមទំនាក់ទំនងតាមរយៈអ៊ីម៉ែល technovation@moeys.gov.kh ៕
