ភ្នំពេញ- ក្រសួងមហាផ្ទៃប្រកាសជ្រើសរើសនិស្សិត២០០នាក់ សម្រាប់អាហារូបករណ៍សិក្សា​ថ្នាក់បរិញ្ញាបត្រវិទ្យាសាស្ត្រនគរបាលរយៈពេល៤ឆ្នាំនៅបណ្ឌិតសភានគរបាលកម្ពុជា ក្នុងក្របខណ្ឌមន្ត្រីនគរបាលកម្ពុជានៃក្រសួងមហាផ្ទៃ ។

ជំនាញដែលផ្ដល់ជូនសិក្សាមានថ្នាក់បរិញ្ញាបត្រវិទ្យាសាស្ត្រនគរបាលសម្រាប់ ជំនាញដឹកនាំបញ្ហា​ ជំនាញស៊ើបអង្កេតព្រហ្មទណ្ឌ ជំនាញសន្តិសុខ ជំនាញសណ្ដាប់ធ្នាប់សាធារណៈ ជំនាញអន្តោប្រវេសន៍ និងជំនាញប្រឆាំងបទល្មើសបច្ចេកវិទ្យា ។ ការផ្ដល់ពាក្យសុំអាហារូបករណ៍ត្រូវបានបែងចែកជាតំបន់នៃខេត្ត ដោយបេក្ខជនពីខេត្តកំពង់ធំ សៀមរាប ព្រះវិហារ និងឧត្ដរមានជ័យ នៅថ្ងៃទី៣ និង១១ ខែមករា ឆ្នាំ២០២៣ ។

បេក្ខជនពីខេត្តកំពង់ចាម ក្រចេះ ស្ទឹងត្រែង មណ្ឌលគិរី និងរតនៈគិរី នៅថ្ងៃទី៤ និង១២ ខែមករា ឆ្នាំ២០២៣ បេក្ខជនមកពីខេត្តព្រៃវែង កណ្ដាល ត្បូងឃ្មុំ និងស្វាយរៀងថ្ងៃទី៥ និង១៣ ខែមករា ឆ្នាំ២០២៣ ។ បេក្ខជនមកពីខេត្តកំពង់ឆ្នាំង បាត់ដំបង ពោធិ៍សាត់ បន្ទាយមានជ័យ និងប៉ៃលិនថ្ងៃទី៦ និង១៤ ខែមករា ឆ្នាំ២០២៣ បេក្ខជនមកពីខេត្តកំពង់ស្ពឺ កំពត់ កែប ព្រះសីហនុ និងកោះកុងថ្ងៃទី៩ និង១៦ ខែមករា ឆ្នាំ២០២៣ និងបេក្ខជនមកពីរាជធានីភ្នំពេញ និងខេត្តតាកែវថ្ងៃទី១០ និង១៧ ខែមករា ឆ្នាំ២០២៣ ។

ក្នុងករណីបេក្ខជនជ្រើសរើសជំនាញប្រឆាំងបទល្មើសបច្ចេកវិទ្យា អាចទទួលពាក្យរៀងរាល់ម៉ោងធ្វើការចាប់ពីថ្ងៃទី៣ ដល់ថ្ងៃទី១៧ ខែមករា ឆ្នាំ២០២៣ និងត្រូវឆ្លងកាត់ការធ្វើតេស្តភាសាអង់គ្លេសជាមុនសិន ។ បេក្ខជនត្រូវមានចំណេះដឹងភាសាអង់គ្លេសត្រឹមកម្រិតមធ្យម(Pre-intermediate level) និងទទួលពាក្យពីថ្ងៃទី៨ ដល់ថ្ងៃទី២៧ ខែមករា ឆ្នាំ២០២៣ ។

បេក្ខជនត្រូវភ្ជាប់ជាមួយឯកសារចាំបាច់មួយចំនួនដូចជា សញ្ញាបត្រឬលិខិតបញ្ជាក់សញ្ញាបត្រ(ច្បាប់ដើម) អត្តសញ្ញាណបណ្ណសញ្ជាតិខ្មែរ (ច្បាប់ដើម) សំបុត្រកំណើត(ច្បាប់ដើម) សៀវភៅគ្រួសារឬសៀវភៅស្នាក់នៅ(ច្បាប់ដើម) បណ្ណចាក់វ៉ាក់សាំងបង្ការជំងឺកូវីដ-១៩ និងលិខិតថ្កោលទោស(បើមានឬផ្ដល់ជូនក្រោយពេលប្រលង) ។ លើសពីនេះ បេក្ខជនដែលទើបប្រលងជាប់មធ្យមសិក្សាទុតិយភូមិឆ្នាំ២០២២ក៏អាចដាក់ពាក្យបានដែរ ដោយអាចថតយកលទ្ធផលប្រឡងជាប់បង្ហាញក្រុមការងារផ្ដល់ពាក្យ និងយកវិញ្ញាបនបត្របណ្ដោះអាសន្នជូនក្រុមការងារមុនពេលប្រឡង ។ គួរបញ្ជាក់ថាបេក្ខជនត្រូវត្រៀមសម្លៀកបំពាក់ និងស្បែកជើងកីឡាសម្រាប់ការរត់ចម្ងាយមុនពេលមានសិទ្ធទទួលបានពាក្យ ។

លក្ខខណ្ឌក្នុងការដាក់ពាក្យ បេក្ខជនទាំង២ភេទត្រូវមានសញ្ជាតិខ្មែរ សញ្ញាបត្រមធ្យមសិក្សាទុតិយភូមិឬសញ្ញាបត្រមានតម្លៃស្មើ អាយុក្រោម២៥ឆ្នាំ(គិតត្រឹមថ្ងៃប្រលង) បុរសមានកម្ពស់ចាប់ពី១.៧០ម៉ែត្រឡើង នារីមានកម្ពស់១.៦០ម៉ែត្រឡើង និងមានទម្ងន់សមាមាត្រនឹងកម្ពស់ ។ នៅលីវ (ចាប់ពីថ្ងៃដាក់ពាក្យប្រលង រហូតដល់បញ្ចប់ការសិក្សា) មានសុខភាពល្អ មានកាយសម្បទាគ្រប់គ្រាន់និងមាំមួន ព្រមទាំងគ្មានសាក់លើដងខ្លួន និងឆ្លងកាត់ការធ្វើតេស្តកាយសម្បទា(ពិនិត្យអវយវៈ ការនិយាយស្ដី ការស្ដាប់ ការមើល ដំណើរ) មុននឹងផ្ដល់ពាក្យប្រលង និងមិនធ្លាប់មានពិរុទ្ធភាពកន្លងមក ។

គួរបញ្ជាក់ថា សាលាបណ្ឌិតសភានគរបាលកម្ពុជាមានទីតាំងនៅភូមិស្ដៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្ដាល ផ្លូវជាតិលេខ១ ចម្ងាយ២៦គីឡូម៉ែត្រពីរាជធានីភ្នំពេញ ។ ដោយ​ឡែក​វិញ្ញាសារដែល​ប្រឡងអាហារូបករណ៍​រួមមាន ចំណេះដឹងទូទៅ និងចំណេះដឹងទូទៅនឹងកិច្ចការនគរបាល ដែលប្រឡងនៅថ្ងៃទី១១ ខែកុម្ភៈ ឆ្នាំ២០២៣ ៕