ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងឱកាសអបអរសាទរ វិទ្យាល័យឥន្ទ្រទេវី ដែលបានក្លាយជាម្ចាស់ពានរង្វាន់ «ជើងឯកវិទ្យាល័យ» លើកទី៥ ឆ្នាំ២០២៥-២០២៦ នៅពហុកីឡដ្ឋានជាតិអូឡាំពិក កាលពីយប់ថ្ងៃទី១២ ខែឧសភា ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា មានប្រសាសន៍ថា ការប្រកួតពានរង្វាន់ «ជើងឯកវិទ្យាល័យ» បានរួមចំណែកអភិវឌ្ឍសមត្ថភាព និងបណ្តុះទម្លាប់ល្អ ការងារជាក្រុម និងភាពទទួលខុសត្រូវរបស់យុវជន។
បើតាមប្រធានសហភាពសហព័ន្ធយុវជនកម្ពុជា ព្រឹត្តិការណ៍ប្រកួតកីឡានេះ ក៏បានចូលរួមជំរុញសកម្មភាពកីឡាតាមគ្រឹះស្ថានសិក្សាកាន់តែរស់រវើក និងបន្តរួមចំណែកអភិវឌ្ឍកីឡាបាល់ទាត់ ស្របតាមទិសស្លោក «កូនល្អ សិស្សល្អ មិត្តល្អ កីឡាករគំរូ សាលារៀនស្អាត»។
ក្នុងព្រឹត្តិការណ៍ប្រកួតកីឡាដែលមានអ្នកចូលរួមទស្សនាប្រមាណ ៨ពាន់នាក់ ឯកឧត្តម ហ៊ុន ម៉ានី បានបង្ហាញមោទនភាពចំពោះស្មារតីកីឡាដែលប្អូនៗបានបង្ហាញ ពិសេសការប្រជែងគ្នាយ៉ាងស្វិតស្វាញក្នុងវគ្គផ្តាច់ព្រ័ត្ររវាង វិទ្យាល័យឥន្ទ្រទេវី និង វិទ្យាល័យជាស៊ីមសាមគ្គី ព្រមទាំងភាពកក់ក្តៅ នៃការគាំទ្រលើកទឹកចិត្ត។ ឯកឧត្តម បន្តថា កីឡាករគ្រប់រូប បានបង្ហាញនូវឆន្ទៈ ការតាំងចិត្តខ្ពស់ និងការគោរពវិន័យខ្ជាប់ខ្ជួន និងប្រកាន់នូវស្មារតីយោគយល់ អធ្យាស្រ័យ និងសាមគ្គីភាពជាមិត្តភាព។
“ប្អូនៗម្នាក់ៗ ពិតជាធ្វើបានយ៉ាងល្អ និងខិតខំអស់ពីសមត្ថភាព ក្នុងការប្រកួតនេះ”
ក្នុងឱកាសប្រគល់ពានរង្វាន់ «ជើងឯកវិទ្យាល័យ» ដល់ក្រុមបេក្ខជនមកពីវិទ្យាល័យឥន្ទ្រទេវី ក៏បានធ្វើឱ្យ ឯកឧត្តម ហ៊ុន ម៉ានី នឹកដល់អនុស្សាវរីយ៍កាលពីអតីតកាល ដែលគួររំលេចផងដែរថា «នៅពេលដែល ពុក បានចាកឆ្ងាយពីស្រុកកំណើត មករស់នៅរាជធានីភ្នំពេញ ដោយស្នាក់នៅវត្តនាគវ័ន គឺវិទ្យាល័យឥន្ទ្រទេវីនេះហើយ ជាកន្លែងដែលពុកបានបន្តការសិក្សា»។
ឯកឧត្តម ហ៊ុន ម៉ានី ក៏បានថ្លែងអំណរគុណ និងអបអរសាទរដល់ ស.ស.យ.ក. រាជធានីភ្នំពេញ និងដៃគូទាំងអស់ ចំពោះការរៀបចំ និងភាពជោគជ័យ នៃពិធីបិទព្រឹត្តិការណ៍ប្រកួតកីឡានេះ។
គួរជំរាបជូនថា ការប្រកួតពានរង្វាន់ ប៉ូការី ស្វេត ជើងឯកវិទ្យាល័យ លើកទី៥ ឆ្នាំ២០២៥-២០២៦ នេះ មិនត្រឹមតែជាការប្រកួតដើម្បីជ័យជម្នះប៉ុណ្ណោះទេ ប៉ុន្តែគឺជាវេទិកា នៃការបង្កើតភាពសប្បាយរីករាយ ការរឹតចំណងមិត្តភាព និងសាមគ្គីភាពយ៉ាងស្អិតរមួតរវាងសិស្សានុសិស្ស។ ក្រៅពីការប្រកួត កម្មវិធីក៏មានការសម្ដែងសិល្បៈ និងការសម្ដែងតេក្វាន់ដូរក្រុមកុមារយ៉ាងពិសេស ដែលបានញ៉ាំងឱ្យព្រឹត្តិការណ៍នេះកាន់តែមានភាពអធិកអធម៕
