ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អង្គការសម្រាប់ការអភិវឌ្ឍ និងកិច្ចសហប្រតិបត្តិការសេដ្ឋកិច្ច ហៅកាត់ថា (OECD) បានព្រមានថា បញ្ហាអវត្តមានសិស្សពីសាលារៀនកំពុងកើនឡើងនៅទូទាំងពិភពលោក ដោយអត្រាអវត្តមាននៅក្នុងប្រទេសមួយចំនួនបានកើនឡើងជិតទ្វេដង បើធៀបនឹងអំឡុងពេលមុនការរាតត្បាតជំងឺកូវីដ-១៩។
យោងតាមរបាយការណ៍ថ្មីរបស់ OECD ដែលទទួលការគាំទ្រពីសហភាពអឺរ៉ុបចេញផ្សាយក្នុងខែមិថុនា ឆ្នាំ២០២៦នេះ ថា បញ្ហាអវត្តមានសិស្សបានក្លាយជាបញ្ហាប្រឈមធំមួយសម្រាប់ប្រព័ន្ធអប់រំស្ទើរតែគ្រប់ប្រទេស។ របាយការណ៍នេះបានសិក្សាពីនិន្នាការអន្តរជាតិ មូលហេតុ និងផលប៉ះពាល់ នៃការអវត្តមាន ព្រមទាំងដំណោះស្រាយដែលអាចជួយឱ្យសិស្សត្រឡប់មកសិក្សាវិញបានប្រសើរឡើង។
របាយការណ៍បង្ហាញថា មូលហេតុនៃការអវត្តមាន មានទាំងកត្តាខាងក្នុង និងខាងក្រៅសាលា រួមមានបញ្ហាសុខភាព ផ្លូវចិត្ត ស្ថានភាពគ្រួសារ ភាពក្រីក្រ និងបញ្ហាសុវត្ថិភាព។ សិស្សដែលអវត្តមានរយៈពេលយូរ ជាញឹកញាប់មានអារម្មណ៍ថាមិនសូវជាប់ពាក់ព័ន្ធជាមួយសាលា ទទួលរងការគំរាមកំហែង ឬការបៀតបៀនពីមិត្តភក្តិ ហើយទទួលបានលទ្ធផលសិក្សាទាបជាងសិស្សដទៃ។
ទិន្នន័យបង្ហាញថា នៅប្រទេសប៉េរូ ម៉ាល់តា និងនូវែលសេឡង់ មានសិស្សច្រើនជាង ១០ភាគរយ បានខកខានការសិក្សារយៈពេលបីខែ ឬច្រើនជាងនេះ។ អ្នកជំនាញអប់រំចាត់ទុកថា អវត្តមានជាប្រចាំគឺជាកត្តាគំរាមកំហែងធ្ងន់ធ្ងរដល់ការរៀនសូត្រ សុខុមាលភាព និងឱកាសជោគជ័យរយៈពេលវែងរបស់កុមារ។
OECD បានបញ្ជាក់ថា ការដោះស្រាយបញ្ហាអវត្តមានមិនអាចពឹងផ្អែកលើវិធានការបង្ខំ ឬការដាក់ទណ្ឌកម្មតែប៉ុណ្ណោះទេ។ ផ្ទុយទៅវិញ សាលារៀនត្រូវបង្កើតបរិយាកាសដែលធ្វើឱ្យសិស្សមានអារម្មណ៍ថា មានសុវត្ថិភាព ទទួលបានការគាំទ្រ និងចូលរួមយ៉ាងសកម្មក្នុងការសិក្សា។
របាយការណ៍នេះ ក៏បានដាក់ចេញអនុសាសន៍សំខាន់ៗចំនួន ៧ ដើម្បីជួយកាត់បន្ថយអវត្តមានសិស្ស ដែលរួមមាន ការឆ្លើយតបចំពោះមូលហេតុនៃការអវត្តមានតាមរយៈវិធីសាស្ត្រចម្រុះ និងមានការគាំទ្រ, ការកសាងទំនាក់ទំនងរឹងមាំក្នុងសាលារៀន, ការពង្រឹងភាពជាដៃគូជាមួយគ្រួសារ និងសិស្ស, ការធ្វើអន្តរាគមន៍ឱ្យបានឆាប់រហ័ស មុនពេលបញ្ហាអវត្តមានក្លាយជាទម្លាប់, ការប្រើវិធានការអនុវត្តច្បាប់ដោយប្រុងប្រយ័ត្នក្នុងក្របខណ្ឌគាំទ្រ, ការពង្រឹងសមត្ថភាពសាលារៀន និងការវាយតម្លៃជាប្រចាំលើវិធានការដែលបានអនុវត្ត។
OECD សន្និដ្ឋានថា ការធ្វើឱ្យសិស្សចូលរៀនទៀងទាត់ឡើងវិញ ទាមទារឱ្យមានកិច្ចសហការរវាងសាលារៀន គ្រួសារ សហគមន៍ និងអាជ្ញាធរអប់រំ ដើម្បីធានាថា កុមារគ្រប់រូបទទួលបានឱកាសសិក្សាប្រកបដោយគុណភាព និងបរិយាកាសសិក្សាដែលជួយឱ្យពួកគេរីកចម្រើន៕
