ដោយចង់ឃើញប្រជាជនកម្ពុជា ងាក​មក​ចាប់អារម្មណ៍ការអានសៀវភៅ ដែលជាសកម្មភាពសំខាន់មានឥទ្ធិពលលើការពង្រឹងបញ្ញា ស្មារតី និងការគិត យុវជនវ័យ២៣ឆ្នាំ ថេង ធី បានពួតដៃគ្នាជាមួយមិត្តភក្តិរបស់ខ្លួន៣នាក់ផ្សេង​ទៀត បង្កើតជាបណ្ណាល័យសាធារណៈ “តស់អាន” នៅមាត់ទន្លេក្រុងកំពង់ចាម។

ជានិស្សិតឆ្នាំទី៣ សិក្សាជំនាញគ្រប់គ្រងទូទៅ នៅសាកលពុទ្ធិកសម្ដេចអគ្គមហាសេនាបតីតេជោ ហ៊ុន សែន, ថេង ធី ដែលជាអ្នកផ្ដួចផ្ដើមគំនិតនេះឡើង បានប្រាប់ AMS Education ថា សកម្មភាពដាក់តាំង​សៀវភៅ​សម្រាប់​សាធារណជនអាន​នៅ​សួរមាត់ទន្លេ​ក្រុងកំពង់ចាម គឺដំណើរការជារៀងរាល់ចុងសប្ដាហ៍ថ្ងៃសៅរ៍-អាទិត្យ ដោយ​គិត​មក​ទល់ពេលនេះ មានរយៈពេល ១ឆ្នាំ ១ខែហើយ ដោយ​ទទួលបានការគាំទ្រយ៉ាងខ្លាំង ពីសំណាក់ប្រជាជនក្នុងតំបន់ អ្នកមកដើរលេងកម្សាន្ត និងអ្នក​ហាត់ប្រាណពេលល្ងាច ជាពិសេស កុមារ យុវជន សិស្ស-និស្សិត ដែលស្រឡាញ់អំណាន។ ជាមធ្យម​បណ្ណាល័យសាធារណៈ “តស់អាន” មានអ្នកចូល​មកអានសៀវភៅ​ប្រមាណ ៥០នាក់ជារៀងរាល់ថ្ងៃ។

សកម្មភាពនេះរៀបចំឡើង ចាប់ពីម៉ោង ៥ ដល់ម៉ោង ៨យប់ និងមានសៀវភៅសម្រាប់អានជាង ៥០០ក្បាល ដោយសៀវភៅទាំងនោះ ភាគច្រើនជាសៀវភៅទស្សនវិជ្ជា សៀវភៅសាសនា សៀវភៅអភិវឌ្ឍផ្នត់គំនិត ប្រលោមលោក និងសៀវភៅសម្រាប់កុមារ ដែលមានទាំងភាសាខ្មែរ អង់គ្លេស កូរ៉េ និងភាសាថៃ។ ថេង ធី និយាយថា “បណ្ណាល័យសាធារណៈ តស់អាន មានសៀវភៅចាស់ៗ ប៉ុន្តែបណ្ដុំទៅដោយគំនិតថ្មីៗ”។

យ៉ាងណាក៏ដោយ​សម្រាប់​គោលគំនិតសំខាន់ នៃការ​បង្កើត​បណ្ណាល័យ “តស់អាន” យុវជន ថេង ធី លើកឡើងថា បណ្ណាល័យ “តស់អាន” ត្រូវ​បង្កើតឡើងដើម្បីជាការជំរុញការអាននៅទីសាធារណៈឱ្យបានទូលំទូលាយ និងបង្វែងផ្នត់គំនិតប្រជាជនឱ្យយល់ថា ការអាននៅទីសាធារណៈ គឺជារឿងល្អ មិនមែនជាសកម្មភាពចម្លែក ឬសម្ដែងនោះទេ។

“គោលបំណងក្រុមយើង ចង់ឱ្យមានការអានសៀវភៅនៅទីសាធារណៈកាន់តែទូលំទូលាយ និងប្ដូរផ្នត់គំនិតមនុស្សឱ្យយល់ថា អំណាននៅទីសាធារណៈគឺជារឿងដែលប្លែក មើលទៅខុសពីគេឯង ដែលអ្នកខ្លះនិយាយថា ជាការអានសៀវភៅ ដែលសម្ដែង មកជាគិតថា ការអានសៀភៅ គឺជារឿងល្អ”

ដោយឡែកមូលហេតុក្នុងការ​ជ្រើសរើសសួនច្បារនៅមាត់ទន្លេ ធ្វើជាកន្លែងសម្រាប់បោះទីតាំង បណ្ណាល័យ “តស់អាន” យុវជន ថេង ធី បញ្ជាក់ថា ព្រោះទីនោះជាកន្លែងមានមនុស្សច្រើន ដែលអាចទាក់ទាញចំណាប់អារម្មណ៍ឱ្យមនុស្សចង់អានច្រើន, ម្យ៉ាងទៀត ក្រុមរបស់គេក៏​យល់ដែរថា ទីតាំងនេះ អាចជាកន្លែងល្អសម្រាប់ផ្សព្វផ្សាយវប្បធម៌អំណាន ព្រោះក៏មានអ្នកដំណើរមកពីតំបន់ ឬខេត្តផ្សេងមកច្រើនដែរ។

បើតាមការបញ្ជាក់របស់ យុវជន ថេង ធី សកម្មភាពជំរុញវប្បធម៌អំណាននេះ មានសប្បុរសជន នៅក្នុងខេត្ត និងតំបន់ផ្សេងៗ ចូលរួមបរិច្ចាគថវិកា និងសម្ភារៈជាបន្តបន្ទាប់ ដែលសកម្មភាពនេះ បានក្លាយជាកម្លាំងចិត្តដ៏ធំសម្រាប់ក្រុមខ្លួន​ក្នុង​ការបន្តការងារនេះទៀត។ ចំពោះថវិកា និងសម្ភារ ដែលបានទទួលសប្បុរសជន ហើយ​នៅសល់ យុវជនមួយក្រុមនេះ បានរៀបចំជាកម្មវិធីសរសេរតាមអាន ដើម្បីលើកកម្ពស់អក្សរសាស្ត្រជាតិ និងបរិច្ចាគសម្ភារៈសិក្សាទៅឱ្យ​កុមារ ដែលមានជីវភាពខ្វះខាតនៅខេត្តត្បូងឃ្មុំ។

ថេង ធី បន្ថែមថា ប្រតិបត្តិការការងារនេះ មិនស្មុគស្មាញ ឬពិបាកខ្លាំងទេ ដោយគ្រាន់តែ ត្រូវដឹកសៀវភៅមកទីតាំង និងចំណាយថវិកាលើការចាក់សាំង មួយសប្ដាហ៍ ២ ទៅ៣លីត្រប៉ុណ្ណោះ។ ខណៈឧបសគ្គ ក៏អាចមានតិចតួចដែរ ជុំវិញកម្លាំងមនុស្សដែល​ត្រូវ​មើលការខុសត្រូវ ដោយសារ មួយរយៈចុងក្រោយនេះ សមាជិកក្រុមម្នាក់បានសម្រាក ដោយ​សារ​មានភារកិច្ចផ្ទាល់ខ្លួន។

យ៉ាងណាក៏ដោយ ចំពោះអនាគតនៃការរៀបចំបណ្ណាល័យ “តស់អាន” យុវជន ថេង ធី មិនទាន់ប្រាកដថា នឹងមាននិរន្តរភាព ឬយ៉ាងនោះទេ ព្រោះបច្ចុប្បន្នខ្លួននៅជានិស្សិតឆ្នាំទី៣ នៅឡើយ។ ប៉ុន្តែ ថេង ធី បានបង្ហាញការប្តេជ្ញាចិត្តថា នឹងប្រឹងប្រែងឱ្យអស់ពីលទ្ធភាព ដើម្បីបំពេញការងារនេះ។

លោក ហុក សុទ្ធិ នាយក​អង្គការ​ស៊ីប៉ា និង​ជាប្រធាន​សមាគម​បណ្ណារក្ស​កម្ពុជា មាន​ប្រសាសន៍ថា​ លោកសូមបង្ហាញការគាំទ្រ ចំពោះគំនិតផ្តួចផ្ដើមឱ្យមានសកម្មភាពជំរុញការអានគ្រប់កន្លែងទាំងអស់ ទាំងនៅទីសាធារណៈ កន្លែងធ្វើការ និងសហគមន៍ ព្រោះបច្ចុប្បន្នប្រជាជនកម្ពុជានៅខ្វះទម្លាប់អាន ហើយខ្វះទម្លាប់អាន ធ្វើឱ្យមានការលំបាកក្នុងការអភិវឌ្ឍធនធានមនុស្សប្រកបដោយគុណភាព និងចីរភាព។ លើសពីនេះ លោកចង់ឃើញមានការបង្កើតបណ្ណាល័យសាធារណៈ នៅតាមខេត្ត និងទីប្រជុំជនកាន់តែច្រើន ដើម្បីបម្រើសាធារណៈកម្ពុជាបន្ថែមទៀត៕