ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
“ការខ្វះខាតថវិកា ឬហិរញ្ញវត្ថុ មិនមែនជាកត្តាកំណត់ជោគវាសនារបស់យុវជនណាមួយឡើយ” នេះជាប្រសាសន៍លើកឡើងរបស់លោកជំទាវបណ្ឌិត ពេជ ចន្ទមុន្នី ប្រធានសមាគមសិស្សនិស្សិតអាហារូបករណ៍ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត (អ.ម.ត) ក្នុងពិធីចុះអនុស្សរណៈ នៃការយោគយល់គ្នា រវាងក្រសួងអប់រំ យុវជន និងកីឡា និង អ.ម.ត កាលពីថ្ងៃទី២ ខែសីហា ឆ្នាំ២០២៦។
អនុស្សរណៈ នៃការយោគយល់គ្នានេះ ក្នុងគោលបំណងផ្តល់ឱកាសឱ្យនិស្សិត និងយុវជនកម្ពុជា ទទួលបានការសិក្សានៅកម្រិតឧត្តមសិក្សា ជាពិសេស យុវជននិងនិស្សិតមានការលំបាកមកពីខេត្តនានាទូទាំងប្រទេស។
ក្នុងប្រសាសន៍សំណេះសំណាល លោកជំទាវ ពេជ ចន្ទមុន្នី លើកឡើងថា អនុស្សរណៈនៃការយោគយល់គ្នានេះ ពិតជាបានឆ្លុះបញ្ចាំងឱ្យឃើញពីការប្រសព្វគ្នានៃមនសិការស្នេហាជាតិ និងការប្ដេជ្ញាចិត្តរួមគ្នា ក្នុងការជួយលើកកម្ពស់សមត្ថភាពយុវជនកម្ពុជាជំនាន់ក្រោយ ដែលជាធនធានដ៏សំខាន់សម្រាប់កសាងអនាគតប្រទេសជាតិ។ លោកជំទាវមានប្រសាសន៍ថា យុវជនទាំងអស់មានសិទ្ធិស្មើៗគ្នា ទទួលបាននូវការអប់រំ ការបណ្ដុះបណ្ដាល ដើម្បីក្លាយជាមូលធនមនុស្សដ៏មានតម្លៃសម្រាប់សង្គមជាតិនាពេលបច្ចុប្បន្ន និងអនាគត។
”បេសកកម្មរបស់ អ.ម.ត មិនមែនត្រឹមតែជាការផ្ដល់នូវអាហារូបករណ៍ប៉ុណ្ណោះទេ ថែមទាំងបានបង្កើតនូវយន្តការតាមដាន គ្រប់គ្រង ការជ្រោមជ្រែង និងធានាថា សិស្សនិស្សិតដែលទទួលបាននូវអាហារូបករណ៍នេះ អាចបញ្ចប់នូវការសិក្សាដោយជោគជ័យ និងជាកម្លាំងចលករចូលរួមចំណែកជំរុញដល់ការអភិវឌ្ឍសង្គមជាតិយ៉ាងពិតប្រាកដ”
ក្នុងឱកាសនោះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា លើកឡើងថា សមាគមសិស្ស-និស្សិតអាហារូបករណ៍ អ.ម.ត បានដើរតួនាទីយ៉ាងសកម្មក្នុងការគាំទ្រដល់គោលនយោបាយ និងសកម្មភាពស្នូលនានារបស់ក្រសួងអប់រំ យុវជន និងកីឡា តាមរយៈការគ្រប់គ្រង និងបែងចែកអាហារូបករណ៍ដល់សិស្សនិស្សិតក្រីក្រ ការរៀបចំវគ្គបណ្តុះបណ្តាលជំនាញទន់ ព្រមទាំងការចូលរួមក្នុងសកម្មភាពសង្គម និងការងារយុវជន ស្ថាប័នទាំងពីរបានក្លាយជាដៃគូយុទ្ធសាស្ត្រដ៏រឹងមាំ ក្នុងការជួយដល់យុវជនឱ្យទទួលបានកាលានុវត្តភាពសិក្សាប្រកបដោយសមធម៌។
ឯកឧត្តមរដ្ឋមន្រ្តីក៏បានរំលឹកដែរថា ចាប់តាំងពីមានការផ្ទុះអាវុធ នៅតាមព្រំដែនកម្ពុជា-ថៃ នាថ្ងៃទី២៤ ខែកក្កដា ឆ្នាំ២០២៥ ក្រសួងអប់រំ បានសម្របសម្រួលឱ្យនិស្សិត វិលត្រឡប់មកពីប្រទេសថៃ ចូលរៀនដោយមិនបង់ថ្លៃ ក្រោមឈ្មោះថា “អាហារូបករណ៍សម្តេចតេជោ” ចំនួន៩លើក សរុបចំនួន ១២៦០នាក់។ ក្នុងនោះមាននិស្សិតចំនួន ៦៧១នាក់ (ស្រី ៣២៣នាក់ ព្រះសង្ឃ ១៣អង្គ) បានចុះឈ្មោះចូលរៀនជាក់ស្តែង និងមានក្នុងប្រព័ន្ធទិន្នន័យ អ.ម.ត មានតាំងពីកម្រិតបរិញ្ញាបត្ររង រហូតដល់ថ្នាក់បណ្ឌិត និងវេជ្ជបណ្ឌិតឯកទេស។
សូមបញ្ជាក់ថា អនុស្សរណៈនៃការយោគយល់គ្នា ស្តីពី កិច្ចសហប្រតិបត្តិការលើការអភិវឌ្ឍធនធានមនុស្ស រវាង ក្រសួងអប់រំ យុវជន និងកីឡា និង សមាគមសិស្ស-និស្សិតអាហារូបករណ៍ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត (អ.ម.ត) ត្រូវបានបង្កើតឡើង ក្នុងគោលបំណង៖ (១) លើកកម្ពស់ការបណ្តុះបណ្តាលធនធានមនុស្ស តាមរយៈការបណ្តុះបណ្តាល តម្រង់ទិសជ្រើសរើស ជំនាញ ចែករំលែកបទពិសោធតាមរយៈវេទិកានៃការសិក្សារបស់សិស្សរៀនពូកែទាំងក្នុង និងក្រៅប្រទេស និងចែករំលែកបទពិសោធក្នុងការត្រៀមលក្ខណៈក្នុងការសិក្សានៅក្រៅប្រទេស និងការអភិវឌ្ឍសមត្ថភាពជំនាញនានាសម្រាប់យុវជនក្នុងសតវត្សទី២១ (២) បង្កើតយន្តការសហការក្នុងការបណ្តុះបណ្តាល ស្រាវជ្រាវ ផ្សព្វផ្សាយ និងផ្លាស់ប្តូរព័ត៌មាន។ ភាគីទាំងពីរ បានឯកភាពគ្នាបង្កើត “គណៈកម្មការចំពោះកិច្ច” ដើម្បីតាមដាន និងវាយតម្លៃការអនុវត្តអនុស្សរណៈនេះ ដោយបង្កើត “គោលការណ៍ណែនាំ និងរចនាសម្ព័ន្ធ” ដើម្បីតម្រង់ទិសសម្រាប់សមាគមក្នុងការធ្វើប្រតិបត្តិការឱ្យមាននិរន្តរភាព, រៀបចំកិច្ចប្រជុំត្រីមាស ដើម្បីពិនិត្យវឌ្ឍនភាព និងលើកកម្ពស់កិច្ចសហប្រតិបត្តិការជាមួយដៃគូ, ចងក្រង និងផ្សព្វផ្សាយព័ត៌មានស្តីពីសមិទ្ធកម្មនៃកិច្ចសហប្រតិបត្តិការ៕
