នៅក្នុងពិធីបុណ្យចូលឆ្នាំចិន ជាទម្លាប់ប្រជាជនចិន ឬប្រជាជនខ្មែរជាប់សែស្រឡាយចិន ច្រើនជួបជុំពិសាអាហារជាលក្ខណៈគ្រួសារ បងប្អូន សាច់ញាតិជាដើម។ ក្នុងន័យនេះ ពិធីបុណ្យចូលឆ្នាំចិន គឺជាឱកាសបង្កើតសុភមង្គលគ្រួសារពិតប្រាកដ ដោយ​គួរ​កុំផ្ដោតសំខាន់លើការទទួលទានគ្រឿងស្រវឹងខ្លាំងពេក។ នេះបើតាមប្រសាសន៍ការលើកឡើងរបស់ លោកបណ្ឌិត យង់ ពៅ អគ្គលេខាធិការ នៃរាជបណ្ឌិត្យសភាកម្ពុជា។

លោកបណ្ឌិត យង់ ពៅ មានប្រសាសន៍ថា ជាទូទៅឱ្យតែដល់រដូវកាលចូលឆ្នាំចិន តែងមានពាក្យលើកឡើងថា ចូលឆ្នាំចិនស្រវឹងខ្មែរ ។ ក្នុងន័យនេះ ជាឱកាសមួយធ្វើឱ្យប្រជាពលរដ្ឋស្ទើរតែគ្រប់ផ្ទះទាំងក្នុងរាជធានីភ្នំពេញ និងនៅបណ្ដាខេត្ត ជួបជុំពិសាអាហារជុំគ្នា ហើយក៏មានការទទួលទានគ្រឿងស្រវឹងជុំគ្នាដែរ។ ក្នុងនោះ ប្រជាជនខ្មែរដែលមិនជាប់សែស្រឡាយចិន ក៏ចូលរួមក្នុងកម្មវិធីចូលឆ្នាំចិន ដោយមានការអញ្ជើញពីបងប្អូន មិត្តភក្ដិជាដើម។

អគ្គលេខាធិការ នៃរាជបណ្ឌិត្យសភាកម្ពុជា មានប្រសាសន៍ថា ការប្រើប្រាស់គ្រឿងស្រវឹងនេះ ប្រសិនបើទទួលទានដោយមានការទទួលខុសត្រូវទាំងអស់គ្នានោះនឹងមិនមានបញ្ហាប្រឈមនោះទេ ប៉ុន្តែប្រសិនបើមិនទទួលខុសត្រូវ នោះជាបញ្ហាប្រឈមដែលនាំឱ្យមានគ្រោះថ្នាក់ចរាចរណ៍ បង្កអំពើហិង្សា ប៉ះពាល់សុខភាព និងផលិតភាពការងារជាដើម ។ លោកបណ្ឌិតបន្តថា ការទទួលទានគ្រឿងស្រវឹងដោយមានស្មារតីរឹងមាំ សុខភាពអាចទទួលយកបាន ហើយប្រសិនជាស្រវឹងកុំបើកបរដោយខ្លួនឯង ត្រូវសម្រាកឱ្យស្វាងស្រវឹង ឬមានអ្នកជូន។

សូមគិតថាសុវត្ថិភាពរបស់យើងពាក់ព័ន្ធនឹងសុវត្ថិភាពសង្គមទាំងមូល និងគ្រួសារទាំងមូល

លោកបណ្ឌិត យង់ ពៅ អគ្គលេខាធិការ នៃរាជបណ្ឌិត្យសភាកម្ពុជា។

ជាមួយគ្នានេះ លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លើកឡើងថា ទាក់ទងនឹងការប្រើប្រាស់គ្រឿងស្រវឹងក្នុងឱកាសពិធីបុណ្យចូលឆ្នាំចិនខាងមុខនេះ រាជរដ្ឋាភិបាលកម្ពុជា នឹងអនុវត្តតាមច្បាប់ក្នុងការពិនិត្យទៅលើជាតិអាល់កុលឱ្យបានតឹងរឹង ដែលរួមចំណែកកាត់បន្ថយគ្រោះថ្នាក់ដែលអាចកើតមាន។

អ្នកជំនាញសេដ្ឋកិច្ចរូបនេះបន្ថែមថា ការផឹកគ្រឿងស្រវឹងនៅតាមផ្ទះអំឡុងពេលបុណ្យចូលឆ្នាំចិន ជាសិទ្ធសេរីភាពរបស់ប្រជាពលរដ្ឋ ប្រសិនជាការជួបជុំម្ដងម្កាល នោះមិនជាបញ្ហាប្រឈមអ្វីឡើយ, ក៏ប៉ុន្តែប្រសិនបើទទួលទានគ្រឿងស្រវឹងជាប្រចាំ រៀងរាល់ថ្ងៃ មិនមានចំណូលថវិកាឱ្យកូនរៀន ហើយបែរជាយកថវិកាទៅទិញគ្រឿងស្រវឹង  នោះទើបជាកំហុសដែលសង្គមពិបាកទទួលយក និងជាគំរូមិនល្អដល់កូនចៅជំនាន់ក្រោយ។

លោកបណ្ឌិត គី សេរីវឌ្ឍន៍ បញ្ជាក់ថា ការប្រើប្រាស់គ្រឿងស្រវឹង សូមឱ្យមានទំនួលខុសត្រូវ ដោយមានន័យថា ទទួលទានគ្រឿងស្រវឹងក្នុងកម្រិតមួយដែលអាចគ្រប់គ្រងខ្លួនឯងបាន ជៀសវាងការទទួលទានធ្វើឱ្យញៀន កា្លយជាទម្លាប់មិនល្អក្នុងការទទួលទាន បង្កជាគ្រោះថ្នាក់ដល់មហាជន និងអ្នកដទៃ៕