អ្នកជំនាញ ៦រូបមកពីវិស័យផ្សេងៗគ្នា មានដូចជា វិស័យអប់រំ អចលនទ្រព្យ ភាពជាអ្នកដឹកនាំ និងធនាគារ សុទ្ធតែជឿជាក់ថា នៅក្នុងបរិបទសង្គមបច្ចុប្បន្ន ភាពឈ្លាសវៃលើបញ្ញាទាំង បី ដែលមាន IQ, EQ និង CQ ពិតជាសំខាន់សម្រាប់ភាពជោគជ័យក្នុងអាជីព។

អ្នកឧកញ៉ា គួច ម៉េងលី វេជ្ជបណ្ឌិត និងជាស្ថាបនិក Mengly J. Quach Education លើក​ឡើង​នៅ​ក្នុងកិច្ចពិភាក្សា ស្ដីពី «អំពី IQ EQ និង CQ សម្រាប់ភាពជោគជ័យក្នុងអាជីពការងារ» ដែលរៀបចំឡើងដោយសាកលវិទ្យាល័យ AUPP កាលពីពេលថ្មីៗនេះថា IQ គឺជារង្វាស់នៃសមត្ថភាពរបស់មនុស្សក្នុងការវែកញែក និងដោះស្រាយបញ្ហា។ វាឆ្លុះបញ្ចាំងឱ្យយើងឃើញតាមរយៈបៀបដែលយើងធ្វើការងារណាមួយបានល្អ។ ចំណែក EQ ជាសមត្ថភាពក្នុងការយល់ ប្រើប្រាស់ គ្រប់គ្រងអារម្មណ៍ផ្ទាល់ខ្លួន និងស្វែងយល់ពីអ្នកដទៃបានល្អ។ រីឯ CQ ជាកម្រិតវប្បធម៌ ឬកម្រិតសង្គមវប្បធម៌។

លោកបានបន្ថែមថា មនុស្សដែលមាន IQ ខ្ពស់ អាចបំពេញការងារនៅក្នុងវិស័យវិទ្យសាស្ត្រ និងបច្ចេកវិទ្យាបានល្អ ព្រោះពួកគេពូកែខាងជំនាញរឹង។ យ៉ាង​ណា​ក៏ដោយ ជានិច្ចជាកាល នៅពេលជ្រើសរើសបុគ្គលិក ក្រុមហ៊ុននីមួយៗ ពិនិត្យមើលទាំង EQ និង IQ របស់បុគ្គលិក។

ចំណែកបណ្ឌិត លីន កន្និកា ប្រធានបុគ្គលិក និងសាស្រ្តាចារ្យផ្នែកច្បាប់នៃសាកលវិទ្យា AUPP បានលើកឡើងថា ទាំង IQ EQ និង CQ គឺសុទ្ធតែមានសារៈសំខាន់។ តាមប្រសាសន៍របស់លោកបណ្ឌិត IQ ជួយឱ្យយើងមានសមត្ថភាពក្នុងការចងចាំ ​ការគិត និងដោះស្រាយបញ្ហា ខណៈនៅពេលដែលត្រូវបំពេញការងារជាក្រុម ទាមទារឱ្យបុគ្គលម្នាក់ៗមាន EQ និង CQ ។

បច្ចុប្បន្ននេះ មនុស្សត្រូវបំពេញការងារជាក្រុមជាប្រចាំ ដូច្នេះ EQ ពិតជាមានសារៈសំខាន់សម្រាប់សមាជិកក្រុម និងអ្នកដឹកនាំក្រុម។

បណ្ឌិត លីន កន្និកា សាស្រ្តាចារ្យផ្នែកច្បាប់នៃសាកលវិទ្យាល័យ AUPP

ជាមួយគ្នានេះ លោកស្រី Qazreen Chan Abdullah នាយកប្រតិបត្តិនៃធនាគារ Maybank កម្ពុជា បានលើកឡើងថា ជាទូទៅ IQ និង EQ ត្រូវបានគេលើកមកនិយាយច្រើន ប៉ុន្តែមិនសូវមានការលើកឡើងអំពី CQ នោះទេ។ ខណៈ CQ សំដៅលើសមត្ថភាពរបស់មនុស្សក្នុងការបង្កើតទំនាក់ទំនង និងយល់ពីភាពខុសគ្នានៃវប្បធម៌ ដែលមានសារៈសំខាន់កាន់តែខ្លាំងនៅក្នុងពិភពលោក នៃសាកលភាវូនីយកម្ម។

សម្រាប់លោក ឡាង ទីលាង ស្ថាបនិកនៃបុរី ទីលាង បានបន្ថែមថា EQ ដើរតួនាទីយ៉ាងសំខាន់នៅក្នុងការធ្វើឱ្យអាជីពការងាររបស់យើងទទួលបានជោគជ័យ។ ប្រសិនបើមានតែ IQ មិនអាចធ្វើឱ្យយើងជោគជ័យខ្លាំងនៅក្នុងអាជីពការងារនោះទេ។ លោកបានបញ្ជាក់ថា ទាំង IQ និង EQ ត្រូវដើរទន្ទឹមគ្នា ហើយយើងមិនអាចប្រៀបធៀបថា មួយណាសំខាន់ជាងមួយណាឡើយ៕