ការរស់នៅដែលប្រឈមមុខនឹងវិបត្តិ និងបញ្ហាច្រើន តម្រូវឱ្យមនុស្សមានភាពធន់ និងវិន័យផ្លូវចិត្ត។ ការរក្សាភាពស្ងប់ស្ងាត់ នៅអំឡុងពេលមានវិបត្តិ នឹងផ្ដល់ឱកាសឱ្យអ្នកគិត និងដឹងពីរបៀបឆ្លើយតបនឹងស្ថានការណ៍ប្រកបដោយភាពឆ្លាតវៃ ។ ទស្សនវិទូ ស្ដូអ៊ីកបុរាណ បានបង្កើតគោលការណ៍មួយ ដែលជួយអ្នកគ្រប់គ្រងខ្លួនឯង មានសមត្ថភាពវែកញែកប្រកបដោយហេតុផល និងដឹងសក្តានុពលខ្លួនឯង ។ តាមរយៈការអនុវត្តសកម្មភាពមូលដ្ឋាននៃគោលការណ៍ ស្ដូអ៊ីក ចំនួន ៤ អ្នកនឹងអាចឆ្លងកាត់ស្ថានការណ៍ ដែលតានតឹងបានល្អ។

១. មិនអនុញ្ញាតឱ្យមជ្ឈដ្ឋានខាងក្រៅមកឥទ្ធិពលមកលើ ៖ ស្ដូអ៊ីក បានទទួលស្គាល់ថា ព្រឹត្តិការណ៍ដែលកើតមានក្នុងមជ្ឈដ្ឋានខាងក្រៅ គឺជាដំណើរដែលមិនអាចឃាត់បាន ប៉ុន្តែការវិនិច្ឆ័យ និងប្រតិកម្មរបស់យើង គឺស្ថិតក្រោមការគ្រប់គ្រងរបស់យើង។ ឧទាហរណ៍ មានបុគ្គលម្នាក់បើកបរ កាត់មុខអ្នក ស្ទើរតែបង្ករគ្រោះថ្នាក់ដល់អ្នក អំឡុងពេលបើកបរ។ សភាវគតិ នឹងធ្វើឱ្យអ្នកមានអារម្មណ៍ខឹង និងឃ្នាសចិត្តនឹងបុគ្គលម្នាក់នោះ ដោយសារកាយវិការមិនប្រុងប្រយ័ត្នរបស់គេ ដែលអាចជំរុញឱ្យអ្នកមានកំហឹង ឬបង្ករជម្លោះ។ ប៉ុន្តែ ស្តូអ៊ីក ណែនាំឱ្យអ្នកថយក្រោយមួយជំហាន ដើម្បីទទួលស្គាល់នូវអ្វីដែលបានកើតឡើង ព្រោះតែស្ថានការណ៍ជាក់ស្ដែង ត្រូវឱ្យអ្នកបើកបរនោះត្រូវប្ដូរគន្លងបើកបរភ្លាមៗ។ ដូច្នេះ អ្នកច្បាស់ជាអាចគ្រប់គ្រង របៀបឆ្លើយតបរបស់អ្នកបាន។

២. ផ្ដោតតែលើអ្វីដែលអាចគ្រប់គ្រងបាន ៖ ការព្យាយាមគ្រប់គ្រងអ្វី ដែលមិនស្ថិតក្រោមឥទ្ធិពលរបស់អ្នក គឺជាប្រភពនៃសេចក្ដីទុក្ខ។ ស្ដូអ៊ីក ណែនាំឱ្យអ្នកទទួលស្គាល់ ភាពឥតប្រយោជន៍នៃការព្រួយបារម្ភអំពីទិដ្ឋភាពនៃជីវិត ដែលមិនស្ថិតនៅក្រោមការគ្រប់គ្រងរបស់អ្នក។ ផ្ទុយទៅវិញ សកម្មភាពនេះ បែរជានាំឱ្យខ្ជះខ្ជាយថាមពល មានវិបត្តិផ្លូវចិត្ត និងការថប់បារម្ភទៅវិញ។ អ្វីដែលអ្នកអាចគ្រប់គ្រងបាន មានដូចជា ការគិត អាកប្បកិរិយា ចេតនា និងការខិតខំប្រឹងប្រែង គឺជារឿងសំខាន់ ដែលអ្នកត្រូវផ្ដោត និងយកចិត្តទុកដាក់។ ឧទាហរណ៍ ត្រឡប់ទៅរឿងចរាចរណ៍វិញ អ្នកអាចគ្រប់គ្រងលើការសម្រេចចិត្តអំឡុងពេលបើកបរ របស់អ្នកបាន ប៉ុន្តែអ្នកមិនអាចបង្ខំឱ្យអ្នកដទៃ បើកបរតាមរបៀបអ្នកបាននោះទេ។

៣. បន្ស៊ី ការរំពឹងទុកជាមួយទិដ្ឋភាពជាក់ស្ដែង ៖ ស្តូអ៊ីក កម្រិតការរំពឹងទុក និងការសន្មត់ លើលទ្ធផលអ្វីមួយ ត្រូវផ្អែកលើភាពជាក់ស្ដែង ជាជាងក្ដីសង្ឃឹមដែលមិនសមហេតុផល។ នៅពេលដែលការរំពឹងទុក ស្របគ្នាជាមួយនឹងលទ្ធផលជាក់ស្តែង នឹងជួយឱ្យអ្នកជៀសផុតពីការខកចិត្ត។ ការទទួលស្គាល់លទ្ធផល ធ្វើឱ្យអ្នកមានចិត្តស្ងប់ និងអាចរស់នៅជាមួយសេចក្ដីសុខផ្លូវចិត្ត។

៤. លត់ដំខ្លួន តាមរយៈការមានវិន័យ ៖ គោលការណ៍ស្នូលនៃទស្សនវិជ្ជា ស្តូអ៊ីក គឺការដាក់វិន័យលើខ្លួន​ឯង ព្រោះវិន័យនាំមកនូវ ជំនាញ និងភាពប៉ិនប្រសប់ លើកិច្ចការអ្វីមួយ, ជាពិសេស នាំឱ្យអ្នកក្លាយជាបុគ្គល ដែលមានតម្លៃ និងសេចក្ដីថ្លៃថ្នូរ។ ការរស់នៅជាមួយវិន័យ នឹងធ្វើឱ្យអ្នកក្លាយជាបុគ្គល មានភាពចាស់ទុំ។ ដោយឡែក វិន័យក្នុងការគិត និងសម្រេចចិត្ត នឹងធ្វើឱ្យអ្នកដឹងអំពី វិធីក្នុងការឆ្លើយតបនឹងស្ថានការណ៍ជីវិតបានល្អ ព្រោះអ្នកមានជំហរ និងលំនឹងចិត្ត ដែលអាចឆ្លើយតបនឹងស្ថានការណ៍បានត្រឹមត្រូវ៕