ថ្លែងក្នុងពិធី “ពិព័រណ៍ស្នាដៃសិស្សប្រចាំឆ្នាំសិក្សា២០២៤-២០២៥” នៅវិទ្យាល័យ ហ៊ុន សែន ពាមជីកង ស្ថិត​នៅ​ក្នុង​ស្រុកកងមាស ខេត្តកំពង់ចាម កាលពីពេលថ្មីៗនេះ ឯកឧត្តម វង ភិរុណ អនុរដ្ឋលេខាធិការនៃក្រសួងអប់រំ យុវជន និងកីឡា លើកឡើងថា ពិព័រណ៍ស្នាដៃនេះ នឹងជួយបណ្ដុះចំណេះដឹងសិស្សដោយការអនុវត្តជាក់ស្ដែងដើម្បីរៀបចំខ្លួនសម្រាប់ការសិក្សាវិជ្ជាជីវៈក្នុងពេលអនាគត។

ឯកឧត្តម វង ភិរុណ មានប្រសាសន៍ថា ការតាំងពិព័រណ៍នេះ ជាការបង្ហាញពីការយល់ដឹង និងអ្វីដែលសិស្សានុសិស្សបានរៀន ចូលរួមធ្វើសកម្មភាពលើអ្វីដែលគេបានរៀន និងជាការសហការគ្នាពីការយល់ដឹង ធ្វើឱ្យការរៀនសូត្រមានអត្ថន័យកាន់តែខ្លាំងក្លាឡើង។

អនុរដ្ឋលេខាធិការ នៃក្រសួងអប់រំ បន្ថែមថា ការប្រើប្រាស់បញ្ញាសិប្បនិម្មិតដែលមានម៉ាស៊ីនដើរតួនាទីជំនួសមនុស្ស និងមានភាពឆ្លាតវៃ ហើយការតាំងពិព័រណ៍នេះ នឹងជួយសិស្សឱ្យអនុវត្តចំណេះដឹងតាមសេណារីយ៉ូពិភពពិត ដោយបទពិសោធន៍ជាក់ស្ដែងទាំងនេះ នឹងជួយពួកគេឱ្យអនុវត្តចំណេះដឹងរបស់ខ្លួនតាមរបៀបដ៏មានប្រសិទ្ធភាព និងរៀបចំខ្លួនសម្រាប់ប្រកួតប្រជែងក្នុងការសិក្សាវិជ្ជាជីវៈ។

កាលពីឆ្នាំកន្លងទៅ វិទ្យាល័យ ហ៊ុន សែន ពាមជីកង បានកែប្រែមុខមាត់ថ្មី ក្លាយជាសាលារៀនជំនាន់ថ្មី ជាពិសេសបានជាប់ស្ដង់ដាសាលារៀនគំរូ។ ឯកឧត្តមបន្តថា សាលាជំនាន់ថ្មីនេះ គឺបានផ្តល់បច្ចេកទេស ចំណេះជំនាញយ៉ាងច្រើន ជាពិសេសនោះទេពកោសល្យតាមចំណូលចិត្តរបស់សិស្ស ដើម្បីស្វែងយល់ខ្លួនឯង និងត្រៀមខ្លួនចាប់យកអាជីពនៅពេលអនាគតផងដែរ។

ពិធីពិព័រណ៍នេះ ធ្វើឡើងក្នុងគោលបំណងដើម្បីបង្ហាញនូវសមិទ្ធផលដែលជាស្នាដៃកើតចេញពីការសិក្សារបស់សិស្សានុសិស្ស បង្កើនចំណងទំនាក់ទំនងរវាងសាលារៀន សហគមន៍ មាតាបិតាអាណាព្យាបាលសិស្ស និងជាការបង្ហាញបរិស្ថានសិក្សាដល់សហគមន៍ ជាពិសេសជាការផ្តល់ឱកាសឱ្យសិស្សបញ្ចេញសមត្ថភាព ទេពកោសល្យដល់សហគមន៍ឱ្យចាប់អារម្មណ៍លើការអប់រំបែបស្ទែម (STEM) ដែលឆ្លុះបញ្ចាំងពីបំណិនរបស់សិស្ស។

គួរជំរាបជូនថា ការរៀបចំពិធីពិព័រណ៍ស្នាដៃសិស្សវិទ្យាល័យ ហ៊ុន សែន ពាមជីកង ធ្វើឡើងរយៈពេលមួយថ្ងៃ ដោយបានរៀបចំតុបតែងស្តង់ចំនួន២៤១ស្តង់ ស្មើនឹង២៤១ប្រធានបទ ដែលបង្ហាញពីសមិទ្ធផលដែលសិស្សខិតខំធ្វើឡើង និងចែករំលែកដល់មិត្តរួមថ្នាក់។ ក្នុងឆ្នាំសិក្សា២០២៤-២០២៥នេះ វិទ្យាល័យ ហ៊ុន សែន ពាមជីកង មានសិស្សានុសិស្សចំនួន៣៨ថ្នាក់ មាន៦កម្រិត៕