ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ពីបុរាណកាលមក ការរៀបគ្រឿងរណ្ដាប់ទទួលទេវតាឆ្នាំថ្មីត្រូវគេធ្វើឡើងតែនៅក្នុងព្រះបរមរាជវាំងប៉ុណ្ណោះ ។ បន្ទាប់រៀងមកថ្នាក់ដឹកនាំ ឬមន្រ្តីដែលមានសទ្ធាជ្រះថ្លាក្នុងការគោរពបដិបត្ត បូជាពលីការ ក៏បានរៀបចំដែរ រហូតមកដល់ប្រជាជនខ្មែរដែលមានជីវភាពមធ្យម និងប្រជាពលរដ្ឋខ្មែរភាគច្រើន។ នេះបើតាមប្រសាសន៍លើកឡើងរបស់ ឯកឧត្ដម ឆាត សុឆេត អ្នកនាំពាក្យក្រសួងធម្មការ និងសាសនា។
ក្នុងកិច្ចសម្ភាសន៍ជាមួយ AMS Education ឯកឧត្តម ឆាត សុឆេត លើកឡើងថា គ្រឿងរណ្ដាប់សម្រាប់ថ្វាយទេវតាជារៀងរាល់ឆ្នាំគឺសុទ្ធតែដូចគ្នា ប៉ុន្តែអាស្រ័យទៅលើលទ្ធភាព និងជីវភាពរបស់ប្រជាពលរដ្ឋខ្មែរតែប៉ុណ្ណោះ ។ ឯកឧត្តមបន្តថា ប្រសិនបើគ្រួសារដែលមិនមានលទ្ធភាពក្នុងការទិញសម្ភារៈធំដុំទេគ្រាន់តែមាន ទៀនប្រាំ ធូបប្រាំ កូនដើមចេកមួយគូរ ឬដូងមួយផ្លែពីរផ្លែ ផ្លែឈើ៥មុខ គ្រឿងក្រអូប និងទឹកស្អាតពីរកែវ ក៏បានដែរ ព្រោះអាចជាការធ្វើតាមលទ្ធភាព ឱ្យតែមានចិត្តជ្រះថ្លាក្នុងការទទួលទេវតាជាការប្រសើរហើយ។
«ការរៀបចំគ្រឿងរណ្ដាប់ទាំងអស់មិនបានកំណត់ថាត្រូវតែរៀបចំបែបនេះ បែបនោះទេ ព្រោះប្រជាពលរដ្ឋមានបន្ទុកធុរៈ និងជីវភាពផ្សេងគ្នាដូចនេះការរៀបចំគឺអាចរៀបចំទៅតាមលទ្ធភាពដែលអាចធ្វើបាន»
ឯកឧត្ដម ឆាត សុឆេត អ្នកនាំពាក្យក្រសួងធម្មការ និងសាសនា
ទាក់ទងទៅនឹងការលើកឡើងដែរថា គ្រឿងរណ្តាប់នៅឆ្នាំនេះ ត្រូវមានសាច់សត្វព្រៃដើម្បីថ្វាយទទួលទេវតាឆ្នាំថ្មី អ្នកនាំពាក្យក្រសួងធម្មការ និងសាសនា លើកឡើងថា បងប្អូនប្រជាពលរដ្ឋខ្មែរគួរយល់ដឹង និងចងចាំថា ទេវតាមានអាហាររបស់ទេវតារួចហើយ ទ្រង់មិនសោយនូវអាហារដែលមានក្លិនឆ្អាប ឬមានឈាមឡើយ ដូច្នេះការលើកឡើងថា ត្រូវមានសាច់សត្វ ឬការសម្លាប់សត្វផ្សេងៗសម្រាប់បូជាគ្រាន់តែជាការសន្មត់ប៉ុណ្ណោះ។
ឆ្លៀតក្នុងឱកាសនេះ ឯកឧត្តម ឆាត សុឆេត សំណូមពរដល់ប្រជាពលរដ្ឋខ្មែរគួរមានជំនឿដែលសមហេតុផល និងមិនបង្កជាការបំពានជីវិតគេជាដើម។ ជាក់ស្ដែង ការសម្លាប់សត្វ ឬប៉ះពាល់ជីវិតគេដើម្បីអ្វីមួយសុទ្ធតែជាអំពើដែលធ្វើឱ្យបុគ្គលនោះមិនមានក្ដីសុខទាំងផ្លូវកាយ និងផ្លូវចិត្តឡើយ៕
