ក្នុងពីធីសម្ពោធដាក់ឱ្យប្រើប្រាស់ជាផ្លូវការមន្ទីរពេទ្យ «តេជោសែនកោះធំ» ស្ថិតនៅក្នុងស្រុកកោះធំ ខេត្តកណ្តាល នាព្រឹកថ្ងៃទី១៣ ខែមីនា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា មានប្រសាសន៍ថា ការអប់រំ និងសុខាភិបាលគឺជាគន្លឹះសម្រាប់ការពារ និង​ពង្រឹងជាតិមួយ ព្រោះជាកត្តាតែមួយគត់ដែលអាចធ្វើ​ឱ្យ​​ប្រជាពលរដ្ឋយើង មនុស្ស​របស់យើងការពារទឹកដី បង្កើតសមិទ្ធផលផ្សេងៗ ការថែទាំនូវវប្បធម៌ សាសនា និងអ្វីទាំងអស់។

សម្តេចធិបតីមានប្រសាសន៍ថា ប្រទេសជាតិមួយមានទឹកដី មានវប្បធម៌ ប៉ុន្តែត្រូវការមនុស្សជាគោល ដោយមនុស្ស​គឺជាអ្នកថែរក្សាទឹកដី ជាអ្នកការពារ និង​អភិវឌ្ឍទឹកដី, មនុស្ស​ជាអ្នក​បង្កើតនូវវប្បធម៌ មនុស្ស​គឺជាអ្នកថែរក្សាប្រពៃណី ដូច្នេះមនុស្ស​គឺជាកត្តាសំខាន់ដែលធ្វើ​ឱ្យ​ប្រទេសជាតិរីកចម្រើនទៅមុខ។

សម្តេចនាយករដ្ឋមន្រ្តីបន្ថែមថា បើយើងនិយាយអំពីមនុស្ស យើង​និយាយអំពីកត្តា២ធំ ដែលយើងហៅថា មូលធនមនុស្ស គឺសុខភាព និង​សមត្ថភាព ហើយ​បើយើងនិយាយពីសុខភាព សមត្ថភាព យើងត្រូវនិយាយអំពីការអប់រំ និងសុខាភិបាល។

ដូច្នេះការអប់រំ និងសុខាភិបាលជាគន្លឹះសម្រាប់ការពារ និង​ពង្រឹងជាតិមួយ ព្រោះជាកត្តាតែមួយគត់ដែលអាចធ្វើ​ឱ្យ​​ប្រជាពលរដ្ឋយើង មនុស្ស​របស់យើងការពារទឹកដី បង្កើតសមិទ្ធផលផ្សេងៗ ថែទាំនូវវប្បធម៌ សាសនា និងអ្វីទាំងអស់។

សម្តេចធិបតី ហ៊ុន ម៉ាណែត នាយករដ្ឋមន្រ្តីមានប្រសាសន៍បញ្ជាក់ថា រាជរដ្ឋាភិបាលនីតិកាលទី៧ នៃរដ្ឋសភាបានដាក់ចេញនូវយុទ្ធសាស្រ្តបញ្ចកោណដំណាក់កាលទី១ ដោយកំណត់បញ្ចកោណទី១ គឺអាទិភាពទៅលើមូលធនមនុស្ស ដែលជាលក្ខខណ្ឌចាំបាច់មិនអាចខ្វះបានសម្រាប់ជំរុញពិព្រឹត្តិកម្ម និង​កំណើនសេដ្ឋកិច្ចប្រកបដោយបរិយាប័ន និងភាពធន់, សម្តេចបញ្ជាក់ថា មូលធន​មនុស្ស​មានសុខភាពល្អ និងគុណភាពខ្ពស់ គឺជាទ្រព្យសកម្មដ៏មានតម្លៃ និងជាមូលដ្ឋានគ្រឹះសម្រាប់ការអភិវឌ្ឍសង្គមជាតិ, ហើយការលើក​កម្ពស់សុខភាព និងសុខមាលភាពប្រជាជន គឺជាអាទិភាពមួយក្នុងចំណោមអាទិភាពទាំង៥ដែលរាជរដ្ឋាភិបាលបានផ្តោតលើសម្រាប់ការអភិវឌ្ឍមូលធនមនុស្ស ដោយ​មានគោលដៅយុទ្ធសាស្រ្តផ្តោតទៅលើការកាត់បន្ថយអត្រាឈឺ និងស្លាប់បណ្តាលមកពីជំងឺមិនឆ្លងចម្បងៗ និងការលើក​កម្ពស់សុខភាពបន្តពូជ សុខភាពទារក​ កុមារ និងមាតា។

ពាក់ព័ន្ធនឹងសុខាភិបាល សម្តេចធិបតីមានប្រសាសន៍ថា ការកសាងសុខភាពមនុស្សទាក់ទងផ្នែកសុខាភិបាល គឺផ្ដោតលើសេវា និងការផ្ដល់ឱ្យ ដើម្បីឈានទៅដល់ការបណ្ដុះធនធានមនុស្សដែលមានជំនាញ។ ក្នុងនោះ គ្រូពេទ្យត្រូវការបណ្ដុះបណ្ដាល ផ្ដល់សម្ភារៈ ផ្ដល់សិទ្ធិ និងការគាំទ្រដើម្បីបំពេញភារកិច្ច។

«ពេទ្យត្រូវមានជំនាញច្បាស់លាស់នៅក្នុងការសម្រេចចិត្ត ព្រោះជីវិតមនុស្សមិនអាចរង់ចាំបាន»។

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ។

សម្តេចនាយករដ្ឋមន្ត្រី មានប្រសាសន៍បន្ថែមថា ការបណ្ដុះបណ្ដាល ការអប់រំ ពុំមែនមាននៅតែនៅក្នុងវិស័យសុខាភិបាលប៉ុណ្ណោះទេ ប៉ុន្តែសាកលវិទ្យាល័យទាំងរដ្ឋ និងឯកជន ត្រូវធានាគុណភាពដើម្បីធ្វើយ៉ាងណាឱ្យដំណើរការល្អ ។ សម្តេចធិបតីបន្តថា ការពង្រឹងវិស័យសុខភិបាល គឺទាមទារពង្រឹងមន្ទីរពេទ្យ គុណភាពពេទ្យគ្រប់ជាន់ថ្នាក់ ស្របនឹងការដាក់ចេញគោលនយោបាលក្នុងការពង្រីកសេវាសុខភិបាលគ្របដណ្ដប់ទៅជាសកល។

ជាមួយគ្នានេះ សម្តេចធិបតី ហ៊ុន ម៉ាណែត ក៏បានបង្ហាញពីវិធានការគន្លឹះដើម្បីពង្រឹងវិស័យសុខាភិបាល ដោយមានគោលការណ៍ចំនួនបី រួមមាន ៖ ១. ពង្រឹងមូលដ្ឋានគ្រឹះគ្រូពេទ្យបង្អែក ស្រុក មណ្ឌលសុខភាព, ២. ពង្រឹង និងបង្កើនសមត្ថភាពពេទ្យគ្រប់ថ្នាក់ និង៣. បង្កើនភាពជាដៃគូជាមួយវិស័យឯកជន។ នាយករដ្ឋមន្ត្រីកម្ពុជា ក៏បានស្វាគមន៍ទាំងពេទ្យរដ្ឋ និងពេទ្យឯកជន សហការគ្នាដើម្បីបម្រើប្រជាពលរដ្ឋតាមរយៈការគាំទ្រ ផ្ដល់សិទ្ធិ រួមគ្នាគិត រួមគ្នាធ្វើ៕