នៅវិទ្យាល័យនេតយ៉ង់ក្នុងខេត្តបាត់ដំបងមានបញ្ចូលកម្មវិធី មគ្គុទ្ទេសក៍អាជីពនិងការផ្តល់ប្រឹក្សាជូនសិស្សានុសិស្សដែលរៀននៅទីនោះ ។ កម្មវិធីនេះ ចាប់ផ្តើមអនុវត្តន៍សកម្មភាពនៅឆ្នាំ២០១៨ ដោយផ្តោតលើបីចំណុចសំខាន់ៗ ដូចជា ប្រឹក្សាទល់មុខ ប្រឹក្សាជាក្រុម និងមគ្គុទ្ទេសក៍អាជីព។

កម្មវិធីមគ្គុទ្ទេសក៍អាជីព របស់វិទ្យាល័យនេតយ៉ង់នេះ មានគោលបំណង ជួយដោះស្រាយបញ្ហារបស់សិស្សានុសិស្ស, បង្រៀនឱ្យពួកគាត់ស្គាល់ជំនាញសិក្សា, កាត់បន្ថយភាពភ័យខ្លាចពេលផ្លាស់ប្តូរថ្នាក់រៀន, ស្វែងយល់ពីជំនាញវិជ្ជាជីវៈ និងបញ្ហាចម្រុះផ្សេងៗគ្នាដទៃទៀតរបស់សិស្ស។ ចំពោះអ្នកដែលចូលរួមដោះស្រាយបញ្ហា ក៏ដូចជាអ្នកផ្តល់ការប្រឹក្សាផ្ទាល់ គឺជាគ្រូៗដែលបង្រៀននៅទីនោះផ្ទាល់តែម្តង។ ហើយកម្មវិធីនេះ ទទួលបន្ទុកដោយ នាយកដ្ឋានតម្រង់ទិសវិជ្ជាជីវៈ  គាំទ្រដោយព្រះវិហារហ្វាំងឡង់ ប្រទេសស៊ុយអែត។ នេះជាការលើកឡើងរបស់លោក គ្រូ ឡាំង សុខឈៀង បង្រៀនផ្នែករូបវិទ្យា និងជាអ្នកប្រឹក្សានៅក្នុងកម្មវិធីមគ្គុទ្ទេសក៍អាជីព។

កម្មវិធីនេះ ធ្វើឱ្យសិស្សយល់ដឹងច្រើនទៅលើ ជំនាញដែលគាត់ចង់បាន បើគិតកាលពីដើមឡើយ ភាគច្រើសសិស្សរៀនតាមរយៈមិត្តរបស់គាត់ទេ ប៉ុន្តែក្រោយពីគាត់ទទួលការណែនាំមគ្គុទ្ទេសក៍អាជីព គាត់យល់ដឹងច្រើន ថាតើអ្វីទៅជាតម្រូវការដែលគាត់ចង់បាន និងថាតើគួរធ្វើយ៉ាងម៉េច ដើម្បីឱ្យក្ដីស្រមៃរបស់គាត់ក្លាយជាការពិតបាន

លោក គ្រូ ឡាំង សុខឈៀង បង្រៀនផ្នែករូបវិទ្យា និងជាអ្នកប្រឹក្សានៅក្នុងកម្មវិធីមគ្គុទ្ទេសក៍អាជីព

លោក គ្រូ ឡាំង សុខឈៀង ឱ្យដឹងថា កត្តាដែលជំរុញឱ្យលោក បែងចែកពេលវេលាខ្លះមកទទួលភារកិច្ចជាអ្នកប្រឹក្សាអាជីព គឺដោយមើលឃើញអំពីអត្រានៃការបោះបង់ការសិក្សារបស់សិស្ស មានចំនួនច្រើនជាងមុន ទៅតាមសម័យកាល ធ្វើឱ្យលោកមានទស្សនៈថា សម្មភាពនេះសំខាន់ដើម្បីជួយដល់សិស្សៗទាំងឡាយ ហើយតាមរយៈសកម្មភាពផ្តល់ការប្រឹក្សាទៅកាន់ពួកគាត់ គឺបានជួយឱ្យសិស្ស មានការភ្ញាក់រលឹកបានច្រើនជាងមុន និងជំរុញឱ្យសិស្សចាប់អារម្មណ៍អំពីទីផ្សារការងារ ឬការគិតអំពីការរៀនជំនាញនៅថ្ងៃអនាគត។

ចំណែក លោក ឈាង សុកាយ៉ា ជាគ្រូបង្រៀនផ្នែកប្រវត្តិវិទ្យា និងអ្នកប្រឹក្សាក្នុងកម្មវិធីមគ្គុទ្ទេសក៍អាជីពនិងការផ្តល់ប្រឹក្សាផងដែរ ក៏បានឱ្យដឹងដែរថា  លើសពីការងារស្នូលរបស់ក្រុមប្រឹក្សាជាតិចំនួនបីដូចជា ប្រឹក្សាទល់មុខ ប្រឹក្សាជាក្រុម​ និងមគ្គុទេសក៍អាជីព ក្នុងនោះមានប្រឹក្សាសិស្សដែលគាត់មានវិបត្តិ មានបញ្ហា ហើយនឹងជួយតម្រង់ទិសនៅក្នុងកម្មវិធីសិក្សា ដើម្បីបង្ហាញឱ្យសិស្សគាត់យល់អំពីបទពិសោធន៍ថ្មីៗ នៅពេលដែលសិស្សចប់ពីការសិក្សា ដែលការពិភាក្សាទាំងនេះ គឺផ្តល់ជូនឱ្យសិស្ស ដោយមិនគិតកម្រៃឡើយ។ 

ចំពោះការប្រឹក្សា គឺផ្តល់ភាពសម្ងាត់ និងសុវត្តិភាពបំផុត។ ហើយយើងផ្សព្វផ្សាយទៅក្នុងសហគមន៍ ដើម្បីឱ្យបានដឹងទាំងអស់អំពីសេវាកម្មនេះ

លោក ឈាង សុកាយ៉ា ជាគ្រូបង្រៀនផ្នែកប្រវត្តិវិទ្យា និងអ្នកប្រឹក្សាក្នុងកម្មវិធីមគ្គុទ្ទេសក៍អាជីព

លោក សុខឈៀង បន្តថា ជាក់ស្ដែងទៅ ចំពោះសកម្មភាពប្រឹក្សាអាជីពមានសកម្មភាពចំនួនរហូតទៅដល់២០ចំណុច ពាក់ព័ន្ធនឹងការជ្រើសរើសជំនាញ។ ប៉ុន្តែដោយហេតុថាសាលាទើបចាប់ផ្តើម  ទើបបានជាអនុវត្តន៍បានត្រឹមតែបីសកម្មភាពធំៗប៉ុណ្ណោះ។  ចំណែកឯលទ្ធផលដែលទទួលបាន និងមើលឃើញតាមរយៈការអនុវត្តន៍សកម្មភាពទាំងនេះមានដូចជា ៖ ពិព័រណ៍ស្នាដៃសិស្ស ដោយជំរុញឱ្យសិស្សកែឆ្នៃរបស់របរ តាមរយៈជំនាញស្ទែម ដែលមុននឹងចេញអនុវត្តសកម្មភាព សិស្សានុសិស្សបានមកប្រឹក្សាជាមួយនឹងកម្មវិធីដែលមានអ្នកប្រឹក្សាជាមុនសិន និងមានគ្រូៗដែលមានជំនាញនៅក្នុងនេះដែរ ។

អ្នកប្រឹក្សារូបនេះបន្ថែមថា នៅពេលខាងមុខគម្រោងឬកម្មវិធីនេះ នឹងអនុវត្តន៍សកម្មភាពបន្តនូវចំណុចមួយចំនួនដូចជា ជួយបន្សាំសិស្សថ្មីកុំឱ្យមានភាពភ័យខ្លាចរាល់ពេលជួបបរិយាកាសសិក្សាថ្មីៗ និងបង្កើនទំនុកចិត្ត។ បើជារួមទៅមិនត្រឹមតែប្រឹក្សាលើការសិក្សាជំនាញនោះទេ ប៉ុន្តែក៏ផ្តោតអំពីជំនាញទន់ដែរ៕