ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អ្នកស្វែងរកការងារប្រមាណ ២ម៉ឺននាក់ បានចុះឈ្មោះ និងដាក់ប្រវត្តិរូបសង្ខេប (CV) ដើម្បីស្វែងរកឱកាសការងារ ក្នុងពិព័រណ៍ជាតិការងារ និងផលិតភាពការងារ ឆ្នាំ២០២៦ ដែលរៀបចំឡើងរយៈពេល ២ថ្ងៃ ខណៈអ្នកសម្ភាសជាប់ការងារមានជិត ៣ពាន់នាក់។
ពិព័រណ៍ជាតិការងារ និងផលិតភាពការងារ ឆ្នាំ២០២៦ លើកទី១៦ បានបញ្ចប់នៅថ្ងៃទី១៣ ខែកញ្ញា ឆ្នាំ២០២៦ នៅមជ្ឈមណ្ឌលសន្និបាត និងពិព័រណ៍កោះពេជ្រ ក្រោមប្រធានបទ «ជំនាញ និងការងារ ៖ ផលិតភាពការងារដើម្បីកំណើនសេដ្ឋកិច្ចប្រកបដោយចីរភាព»។
លោកស្រី អ៊ូច ជាច័ន្ទមល្លិកា ប្រធានទីភ្នាក់ងារជាតិមុខរបរ និងការងារ បានបង្ហាញថា អ្នកស្វែងរកការងារបានចុះឈ្មោះ និងដាក់ប្រវត្តិរូបសង្ខេបសុំការងារប្រមាណ ២ម៉ឺនប្រវត្តិរូប។ ជាមួយគ្នានេះ សហគ្រាស និងក្រុមហ៊ុននានា បានធ្វើការសម្ភាសអ្នកស្វែងរកការងារនៅនឹងកន្លែងប្រមាណ ៥ពាន់ដង ក្នុងនោះអ្នកសម្ភាសជាប់ការងារមានជិត ៣ពាន់នាក់។ ក្រុមហ៊ុននានានឹងបន្តដំណើរការជ្រើសរើសបុគ្គលិកជាបន្តបន្ទាប់ទៀត។
តាមរយៈពិព័រណ៍នេះ អ្នកស្វែងរកការងារអាចទទួលបានសេវាពាក់ព័ន្ធនឹងការងារនៅកន្លែងតែមួយ ចាប់ពីការរៀបចំ និងបោះពុម្ពប្រវត្តិរូបសង្ខេប ការផ្តល់ប្រឹក្សាយោបល់អាជីព ការដាក់ពាក្យ រហូតដល់ការសម្ភាសជ្រើសរើសការងារភ្លាមៗជាមួយនិយោជក។
ក្នុងពិធីបិទពិព័រណ៍ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានវាយតម្លៃខ្ពស់ចំពោះលទ្ធផលនៃការរៀបចំពិព័រណ៍នេះ ដោយបញ្ជាក់ថា ការរៀបចំ «សួនការងារ» គឺជាគំនិតច្នៃប្រឌិតថ្មី និងជាយន្តការបន្ថែមដែលផ្តល់សេវាការងារនៅកន្លែងតែមួយដល់អ្នកស្វែងរកការងារ និងសិស្សនិស្សិត។
លោកស្រី Helen Kirsch តំណាងអង្គការ ILO ប្រចាំកម្ពុជា ឡាវ និងថៃ បានអបអរសាទរចំពោះភាពជោគជ័យនៃការរៀបចំពិព័រណ៍នេះ និងលើកឡើងថា កម្លាំងពលកម្មនាពេលអនាគតត្រូវការជំនាញបច្ចេកទេស ជំនាញឌីជីថល និងជំនាញទន់។
លោកស្រីបានជំរុញឱ្យយុវជនបន្តរៀនសូត្រ សម្របខ្លួន និងលើកកម្ពស់ជំនាញជាប្រចាំ ដើម្បីឆ្លើយតបទៅនឹងតម្រូវការនៃទីផ្សារការងារ។
សូមជម្រាបថា ពិព័រណ៍ជាតិការងារ និងផលិតភាពការងារ ឆ្នាំ២០២៦ មានអ្នកចូលរួមទស្សនាប្រមាណ ១២ម៉ឺននាក់ទាំងផ្ទាល់ និងតាមអនឡាញ ក្នុងនោះអ្នកចូលរួមដោយផ្ទាល់ជិត ៥ម៉ឺននាក់៕
