ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ព្រះរាជាណាចក្រកម្ពុជា និងប្រទេសជប៉ុន បានសម្រេចចុះហត្ថលេខាជាផ្លូវការលើលិខិតប្ដូរសារ និងឯកសារពាក់ព័ន្ធ ស្តីពីការផ្តល់ហិរញ្ញប្បទានឥតសំណងរបស់រដ្ឋាភិបាលជប៉ុន ដែលមានទឹកប្រាក់សរុបចំនួន ៤១៦ លានយ៉េន (ប្រមាណ ២,៨ លានដុល្លារអាមេរិក) សម្រាប់អនុវត្តគម្រោងអាហារូបករណ៍អភិវឌ្ឍន៍ធនធានមនុស្ស (JDS)។
ពិធីចុះហត្ថលេខានេះ បានប្រព្រឹត្តទៅនៅថ្ងៃទី០៨ ខែកក្កដា ឆ្នាំ២០២៦ នេះ រវាង ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា និង ឯកឧត្តម UENO Atsushi ឯកអគ្គរាជទូតវិសាមញ្ញ និងពេញសមត្ថភាពនៃប្រទេសជប៉ុន ប្រចាំព្រះរាជាណាចក្រកម្ពុជា។
បើតាមសេចក្តីប្រកាសព័ត៌មានរបស់ក្រសួងការបរទេសកម្ពុជា គម្រោងអាហារូបករណ៍អភិវឌ្ឍន៍ធនធានមនុស្ស (JDS) នេះ នឹងផ្តល់ឱកាសយ៉ាងសំខាន់ដល់មន្ត្រីរាជការវ័យក្មេងរបស់កម្ពុជា ក្នុងការបន្តការសិក្សាថ្នាក់ក្រោយឧត្តមសិក្សា (ថ្នាក់បរិញ្ញាបត្រជាន់ខ្ពស់ និងបណ្ឌិត) នៅតាមសាកលវិទ្យាល័យល្បីៗនៅក្នុងប្រទេសជប៉ុន។
ក្រសួងការបរទេស និងសហប្រតិបត្តិការអន្តរជាតិ បានគូសបញ្ជាក់ថា ហិរញ្ញប្បទានឥតសំណងនេះ គឺស្តែងឱ្យឃើញយ៉ាងច្បាស់ពីការប្ដេជ្ញាចិត្តយ៉ាងមុតមាំរបស់ប្រទេសជប៉ុន ក្នុងការគាំទ្រដល់ការអភិវឌ្ឍធនធានមនុស្សនៅកម្ពុជា។ ការឧបត្ថម្ភនេះ មិនត្រឹមតែជួយជំរុញដល់ការអភិវឌ្ឍសង្គម-សេដ្ឋកិច្ចប៉ុណ្ណោះទេ ប៉ុន្តែថែមទាំងចូលរួមលើកកម្ពស់ទំនាក់ទំនង និងភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រជាជាតិទាំងពីរឱ្យកាន់តែស្អិតរមួតបន្ថែមទៀត។
គួរបញ្ជាក់ថា គម្រោងអាហារូបករណ៍ JDS របស់រដ្ឋាភិបាលជប៉ុន គឺជាកម្មវិធីបណ្តុះបណ្តាលដ៏មានប្រជាប្រិយភាព និងបានចូលរួមចំណែកយ៉ាងធំធេងក្នុងការកសាងសមត្ថភាពមន្ត្រីរាជការកម្ពុជាជាច្រើនជំនាន់មកហើយ ដើម្បីយកចំណេះដឹង និងជំនាញត្រឡប់មកអភិវឌ្ឍស្ថាប័នរដ្ឋ និងមាតុភូមិវិញឱ្យកាន់តែរីកចម្រើន។ តាមរបាយការណ៍ ចាប់តាំងពីបង្កើតនៅកម្ពុជាក្នុងឆ្នាំ២០០០ មកទល់ពេលនេះ មាននិស្សិតចំនួនច្រើនជាង ៥៨០ នាក់ ហើយដែលបាននិងកំពុងសិក្សា ព្រមទាំងបញ្ចប់ការសិក្សាពីប្រទេសជប៉ុន តាមរយៈកម្មវិធីអាហារូបករណ៍ JDS៕
