ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បច្ចុប្បន្នបច្ចេកវិទ្យាបញ្ញាសិប្បនិម្មិត (AI) បាននិងកំពុងដើរតួនាទីយ៉ាងសំខាន់ក្នុងការផ្លាស់ប្តូរ និងសម្រួលដល់ការងាររបស់មនុស្សស្ទើរតែគ្រប់វិស័យ។ ស្របពេលដែលប្រព័ន្ធបច្ចេកវិទ្យា AI កំពុងរីកចម្រើនយ៉ាងឆាប់រហ័ស ក៏មានការលើកឡើងមួយចំនួនថា តើមនុស្សដែលប្រើប្រាស់ AI គឺជាមនុស្សអន់ ឬមនុស្សខ្ជិល ឬយ៉ាងណា?
ឆ្លើយទៅនឹងសំណួរ ខាងលើនេះ លោកបណ្ឌិត ឈត ប៊ុនថង មានប្រសាសន៍ថា បញ្ហានេះមិនមែនបែបនេះនោះទេ ព្រោះការប្រើប្រាស់ AI (Artificial Intelligence) មិនមែនមានន័យថា មនុស្សនោះជាមនុស្សអន់ ឬខ្ជិលឡើយ ផ្ទុយទៅវិញ នៅក្នុងយុគសម័យឌីជីថលនេះ ការចេះប្រើប្រាស់ AI គឺជាសញ្ញានៃភាពឆ្លាតវៃ និងការដើរទាន់បច្ចេកវិទ្យា។
លោកបណ្ឌិតបានពន្យល់ថា AI គឺជាឧបករណ៍ មិនមែនជាខួរក្បាលជំនួសទេ មនុស្សបង្កើតឧបករណ៍ឡើងដើម្បីជួយសម្រាលកម្លាំង និងបង្កើនល្បឿនការងារ។ លោកបានលើកជាឧទាហរណ៍ថា «កាលពីមុន យើងដើរ ក្រោយមកបង្កើតកង់ បន្ទាប់ឡាន យន្តហោះ… ដើម្បីធ្វើដំណើរទៅមុខឱ្យបានលឿនជាងមុន។ ពីមុន មនុស្សគិតលេខដោយដៃ ក្រោយមកប្រើម៉ាស៊ីនគិតលេខ (Calculator) ហើយឥឡូវនេះ មនុស្សប្រើ AI ដើម្បីជួយស្រាវជ្រាវ រកគំនិតច្នៃប្រឌិត និងរៀបចំទិន្នន័យផ្សេងៗ»។
ត្រង់ចំណុចនេះ លោកបណ្ឌិតបន្ថែមថា «ការប្រើឡានមិនមែនមានន័យថា ជើងយើងអន់នោះទេ ហើយការប្រើ AI ក៏មិនមែនមានន័យថា ខួរក្បាលយើងអន់ដែរ វាគ្រាន់តែជាឧបករណ៍បង្កើនប្រសិទ្ធភាព (Productivity Tool) តែប៉ុណ្ណោះ»។
មិនតែប៉ុណ្ណោះ គុណភាព នៃ AI អាស្រ័យលើសមត្ថភាពរបស់អ្នកប្រើ, AI មិនអាចគិតជំនួសមនុស្សទាំងស្រុងបានទេ ប្រសិនបើអ្នកប្រើប្រាស់ជាមនុស្សគ្មានចំណេះដឹង។ អ្នកប្រើប្រាស់កម្រិតខ្ពស់ ឬអ្នកប្រើប្រាស់ឈ្លាវៃ (Smart Users) ប្រើ AI ដូចជាជំនួយការម្នាក់។ បានន័យថា ពួកគេមានគំនិតផ្ទាល់ខ្លួនរួចជាស្រេចទៅហើយ ហើយពួកគេប្រើ AI ឱ្យជួយពង្រីកគំនិត ជួយពិនិត្យកំហុស ឬជួយសរសេរឱ្យមានរបៀប ព្រោះ AI ក៏អាចប្រាប់ព័ត៌មានខុសខ្លះ និងសរសេរខុសអក្ខរាវិរុទ្ធខ្លះដែរ ដូច្នេះមានតែមនុស្សដែលមានចំណេះដឹងពិតប្រាកដទេ ទើបអាចផ្ទៀងផ្ទាត់ និងកែតម្រូវទិន្នន័យរបស់ AI បាន។
អ្នកជំនាញទស្សនៈវិជ្ជារូបនេះ បន្ថែមថា ការផ្លាស់ប្តូរផ្នត់គំនិតក្នុងយុគសម័យថ្មីនៅក្នុងពិភពលោកបច្ចុប្បន្ន និងទៅអនាគត មនុស្សដែលកោតសរសើរមិនមែនជាមនុស្សដែលចាំរឿងគ្រប់យ៉ាងក្នុងក្បាល ឬធ្វើអ្វីៗគ្រប់យ៉ាងដោយដៃទទេ និងធ្វើដោយខ្លួនឯងទាំងអស់នោះទេ។ ប៉ុន្តែគឺជា មនុស្សដែលចេះចាត់ចែង និងបញ្ជាឧបករណ៍ទំនើបៗឱ្យធ្វើការងារបានលឿន និងមានប្រសិទ្ធភាពបំផុត។
លោកបណ្ឌិត ឈត ប៉ុនថង បានគូសបញ្ជាក់ថា ការប្រើប្រាស់ AI មិនបានវាស់វែងថាមនុស្សម្នាក់អន់ ឬខ្លាំង ខ្ជិល ឬឧស្សាហ៍នោះទេ អ្វីដែលសំខាន់គឺ គោលបំណង និងរបៀបនៃការប្រើប្រាស់។ ព្រោះប្រសិនបើប្រើ AI ដើម្បី Copy-Paste ទាំងស្រុងដោយមិនព្រមរៀនសូត្រ ឬមិនព្រមគិតដោយខ្លួនឯងសោះ នោះទើបជាការប្រើប្រាស់ដែលធ្វើឱ្យសមត្ថភាពយើងធ្លាក់ចុះ។ ប៉ុន្តែប្រសិនបើប្រើ AI ដើម្បីពង្រីកចំណេះដឹង បង្កើនល្បឿនការងារ និងស្វែងរកគំនិតថ្មីៗ នោះអ្នកគឺជា «អ្នកធ្វើការងារវៃឆ្លាត (Smart Worker)» ក្នុងយុគសម័យសេដ្ឋកិច្ចឌីជីថល៕
