ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
”ក្រុមភ្លេងកាយរឹទិ្ធ មានអត្ថន័យលើសពីសិល្បៈតន្រ្តី ដែលជាវិធីសាស្រ្តអប់រំមួយដ៏មានប្រសិទ្ធភាពក្នុងការអភិវឌ្ឍបុគ្គលិកលក្ខណៈ ការងារជាក្រុម ការគោរពវិន័យ ការទទួលខុសត្រូវ និងភាពជាអ្នកដឹកនាំ», នេះជាការគូសបញ្ជាក់របស់ ឯកឧត្តម ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា និងជាប្រធានកាយរឹទ្ធិជាតិកម្ពុជា ក្នុងព្រឹត្តិការណ៍ប្រកួតក្រុមភ្លេងកាយរឹទិ្ធថ្នាក់ជាតិ លើកទី៣ ក្រោមប្រធានបទ «ភ្លេងកាយរឹទិ្ធ ដើម្បីសន្តិភាពនិងការអភិវឌ្ឍ»។
ក្នុងឱកាសនោះ ឯកឧត្តមបណ្ឌិតសភាចារ្យ ហង់ជួន ណារ៉ុន បានសម្តែងនូវការកោតសរសើរ និងវាយតម្លៃខ្ពស់ចំពោះប្រតិភូ និងក្រុមភ្លេងកាយរឹទិ្ធទាំង ១៣ រាជធានី-ខេត្ត ដែលបានយកចិត្តទុកដាក់លើការហ្វឹកហាត់តូរ្យតន្រ្តី បច្ចេកទេសសម្តែង និងសិក្សាស្រាវជ្រាវផ្សេងៗអស់រយៈពេលជាច្រើនខែ កន្លងមកនេះ រហូតអាចកសាងសមត្ថភាពគ្រប់គ្រាន់ ចូលរួមការប្រកួតក្រុមភ្លេងកាយរឹទិ្ធថ្នាក់ជាតិលើកទី៣។
ដើម្បីឱ្យការអភិវឌ្ឍក្រុមភ្លេងកាយរឹទ្ធិនេះមានប្រសិទ្ធភាព និងចីរភាពទៅថ្ងៃអនាគត ឯកឧត្តមបានផ្តល់អនុសាសន៍ណែនាំចំនួន ២ ចំណុចសំខាន់ៗ៖ ១) ក្រុមប្រឹក្សាកាយរឹទិ្ធ រាជធានីខេត្ត សូមបន្តជួយកៀរគរមូលនិធិពីសប្បុរសជន និងក្រុមហ៊ុនឯកជននានា ដើម្បីបង្កើតក្រុមភ្លេងកាយរឹទិ្ធរាជធានី ខេត្ត និងនៅតាមគ្រឹះស្ថានសិក្សា និងសហគមន៍។ ២) នាយកដ្ឋានសហប្រតិបត្តិការកាយរឹទិ្ធ បន្តកិច្ចសហការជាមួយកាយរឹទិ្ធរាជធានី ខេត្ត រៀបចំចងក្រងក្រុមគ្រូភ្លេងកាយរឹទិ្ធនៅថ្នាក់ជាតិ និងរាជធានី ខេត្ត តាមរយៈ ការប្រមូលចងក្រងក្មួយៗកាយរឹទិ្ធរៀមច្បង ដែលមានជំនាញតូរ្យតន្រ្តី និងភ្លេងព្យុហយាត្រាកាយរឹទិ្ធ ដើម្បីបន្តការងារស្ម័គ្រចិត្ត ជួយបង្វឹកដល់ក្រុមភ្លេងកាយរឹទិ្ធរាជធានី ខេត្ត ដែលបង្កើតថ្មីៗ។
គួររំលឹកផងដែរថា ឆ្លងកាត់ការជម្រុះយ៉ាងស្វិតស្វាញពី ១៣ ក្រុម កាលពីថ្ងៃទី ១៤-១៥ ខែមិថុនា គណៈកម្មការបានស្វែងរកឃើញក្រុមខ្លាំងចំនួន ៦ ដើម្បីឡើងមកប្រកួតវគ្គផ្តាច់ព្រ័ត្រកាលពីព្រឹកថ្ងៃទី១៦ មិថុនា។ ជាលទ្ធផល ក្រុមភ្លេងកាយរឹទ្ធិដែលដណ្តើមបានជ័យលាភីកំពូលទាំង ៣ រួមមាន៖ ជ័យលាភី លេខ ១ បានទៅលើ ក្រុមភ្លេងកាយរឹទ្ធិ រាជធានីភ្នំពេញ, ជ័យលាភី លេខ ២ បានទៅលើ ក្រុមភ្លេងកាយរឹទ្ធិ ខេត្តឧត្តរមានជ័យ និង ជ័យលាភី លេខ ៣ បានទៅលើ ក្រុមភ្លេងកាយរឹទ្ធិ ខេត្តបាត់ដំបង៕
