ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ទីបំផុតទៅ ក្រសួងព័ត៌មានបានរកឃើញម្ចាស់ជ័យលាភីលេខ១ ក្នុងការប្រកួតនៅវគ្គផ្ដាច់ព្រ័ត្រ មហោស្រពតន្ត្រី និងចម្រៀងកុមារ ពានរង្វាន់ក្រសួងព័ត៌មាន ឆ្នាំ២០២៥ ដោយបានទៅលើក្រុមមកពីសាលាបឋមសិក្សាព្រះនរោត្តម។
ក្នុងពិធីប្រគល់ពានរង្វាន់កាលពីពេលថ្មីៗនេះ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានបង្ហាញសេចក្តីសោមនស្សក្រៃលែង និងមានមោទនភាព ដែលបានឃើញទេពកោសល្យដ៏អស្ចារ្យ និងគំនិតច្នៃប្រឌិតរបស់ក្មួយៗកុមារដែលបានបង្ហាញសមត្ថភាពតាមរយៈសិល្បៈចម្រៀង និងតន្ត្រីដ៏រស់រវើក។ ជាមួយគ្នា ឯកឧត្តមក៏បានអរគុណ និងអបអរសាទរយ៉ាងកក់ក្តៅបំផុតចំពោះក្មួយៗទាំង ២៩ក្រុម ដែលបានចូលរួមប្រឡងក្នុងមហោស្រពនេះ ពោរពេញដោយសេចក្តីរីករាយ និងភាពជឿជាក់។
រដ្ឋមន្ត្រីក្រសួងព័ត៌មាន បន្ថែមថា មិនថាក្មួយៗបានឈានដល់វគ្គផ្តាច់ព្រ័ត្រ ឬយ៉ាងណានោះទេ ក្មួយៗម្នាក់ៗបានចូលរួមចំណែកនូវអ្វីដែលមិនអាចកាត់ថ្លៃបាន គឺសំឡេង ស្មារតី និងភាពអង់អាចក្លាហានរបស់ក្មួយៗ។
“ក្មួយៗបានផ្តល់ឱ្យយើងនូវការសម្តែងដែលមិនអាចបំភ្លេចបាន ហើយពូអាចនិយាយបានថា ក្មួយៗទាំងអស់គ្នាគឺជាអ្នកឈ្នះនៅក្នុងក្រសែភ្នែករបស់យើង”
ឯកឧត្តម នេត្រ ភក្ត្រា បានចាត់ទុកមហោស្រពនេះ មិនមែនគ្រាន់តែជាការប្រកួតប្រជែងប៉ុណ្ណោះទេ វាក៏ជាវេទិកាមួយសម្រាប់ផ្តល់ឱកាសឱ្យក្មួយៗបានបង្ហាញសមត្ថភាព និងបានជួបប្រាស្រ័យជាមួយមិត្តភក្តិថ្មីៗ ប្រកបដោយក្តីសប្បាយរីករាយ។ តាមរយៈគំនិតផ្តួចផ្តើមនេះ យើងមានគោលបំណងបង្កើតព្រឹត្តិការណ៍មួយសម្រាប់ក្មួយៗកុមារដែលមានអាយុចន្លោះពី៨ ទៅ ១៣ឆ្នាំ អាចស្វែងយល់អំពីចំណង់ចំណូលចិត្តសិល្បៈរបស់ខ្លួន និងអភិវឌ្ឍទំនុកចិត្តក្នុងការបញ្ចេញមតិរបស់ពួកគេតាមរយៈបទចម្រៀង។
គួរជំរាបជូនថា ក្នុងមហោស្រពតន្ត្រី និងចម្រៀងកុមារពានរង្វាន់ក្រសួងព័ត៌មាន ឆ្នាំ២០២៥ មានជ័យលាភីចំនួន៥ក្រុម រួមមាន ជ័យលាភីលេខ១ បានទៅលើក្រុមមកពីសាលាបឋមសិក្សា ព្រះនរោត្តម, ជ័យលាភីលេខ២ បានទៅលើក្រុមមកពីសាលាបឋមសិក្សា វត្តរាជបូណ៌, ជ័យលាភីលេខ៣ បានទៅលើក្រុមមកពីសាលាបឋមសិក្សា វត្តកោះ, ជ័យលាភីលេខ៤ បានទៅលើក្រុមមកពីសាលាបឋមសិក្សា មីគីវ៉េ និងជ័យលាភីលេខ៥ បានទៅលើក្រុមមកពីសាលាបឋមសិក្សា គៀនឃ្លាំង៕
