ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កាលពីសប្តាហ៍កន្លងទៅនេះ គណៈប្រតិភូកម្ពុជា ដឹកនាំដោយ ឯកឧត្តម សេរី ជំនះ រដ្ឋលេខាធិការក្រសួងអប់រំ យុវជន និងកីឡា បានចូលរួមវេទិកាយុវជនក្រុមប្រឹក្សាសេដ្ឋកិច្ច និងសង្គម របស់អង្គការសហប្រជាជាតិ (ECOSOS Youth Forum) ឆ្នាំ២០២៦។ ក្នុងវេទិកានោះ ឯកឧត្តម សេរី ជំនះ បានបង្ហាញពីការអនុវត្តកម្មវិធីអភិវឌ្ឍយុវជនជាច្រើនរបស់ប្រទេសកម្ពុជា ដើម្បីជួយពួកគេមានភាពជាអ្នកដឹកនាំក្នុងការដោះស្រាយបញ្ហាប្រឈមដ៏ស្មុគស្មាញ នៃសាកលលោកបច្ចុប្បន្ន។
ក្នុងបទអន្តរាគមន៍ទៅកាន់វេទិកា ECOSSOS Youthe Forum ឯកឧត្តម សេរី ជំនះ បានគូសបញ្ជាក់ថា នៅកម្ពុជា យុវជនគឺជាកម្លាំងជំរុញនៃការផ្លាស់ប្តូរ។ ជាង ៦០ ភាគរយនៃប្រជាជនកម្ពុជាមានអាយុក្រោម ៣៥ ឆ្នាំ។ ដូច្នេះ ការពង្រឹងសមត្ថភាពយុវជនគឺស្ថិតនៅចំណុចកណ្ដាលនៃរបៀបវារៈអភិវឌ្ឍន៍របស់កម្ពុជា។ ឯកឧត្តមបន្តថា ផ្អែកលើយុទ្ធសាស្ត្របញ្ចកោណ និងគោលនយោបាយជាតិស្តីពីការអភិវឌ្ឍយុវជនកម្ពុជា កម្ពុជាសម្រេចបានវឌ្ឍនភាពគួរឱ្យកត់សម្គាល់ ក្នុងការពង្រឹងសមត្ថភាពយុវជនលើជំនាញ ចំណេះដឹង និងឱកាស ដើម្បីប្រែក្លាយខ្លួនជាអ្នកដឹកនាំប្រកបដោយទំនុកចិត្ត និងទំនួលខុសត្រូវ។
ក្នុងនោះក្រសួងអប់រំ យុវជន និងកីឡា នៃព្រះរាជាណាចក្រកម្ពុជា បានអនុវត្តកម្មវិធីអភិវឌ្ឍយុវជនជាច្រើន រួមមាន កម្មវិធីមនសិការពលរដ្ឋល្អ, កម្មវិធីជជែកដេញដោលយុវជន, កម្មវិធីស្ម័គ្រចិត្តដើម្បីសហគមន៍ខ្ញុំ, យុវជន២១, ការប្រកួតប្រជែងស្ទែម, កម្មវិធីសមមូលអប់រំកម្រិតមូលដ្ឋានតាមអ៊ីនធឺណិត, ការអប់រំឌីជីថល និងការអប់រំហិរញ្ញវត្ថុ ជាដើម។ គំនិតផ្តួចផ្តើមទាំងនេះ បានជួយយុវជនរាប់ពាន់នាក់នៅទូទាំងប្រទេស ពង្រឹងសមត្ថភាព បំណិន ឱកាសការងារ និងការចូលរួមក្នុងការងារសង្គម។
លើសពីនេះ ក្រុមប្រឹក្សាយុវជន និងកុមារកម្ពុជា និងកងល្បាតកាយរឹទ្ធិ នៅតាមសាលារៀន បានផ្តល់ឱកាសយ៉ាងពិតប្រាកដដល់យុវជន និងកុមារ ក្នុងការរៀនសូត្រ ដឹកនាំ ស្ម័គ្រចិត្ត ធ្វើជាតំណាង និងចូលរួមធ្វើការសម្រេចចិត្តក្នុងក្របខណ្ឌសាលារៀន និងសហគមន៍របស់ពួកគេ។
ជាមួយគ្នានេះ ការលើកកម្ពស់ការអប់រំពហុភាសា ការអប់រំបរិយាបន្ន និងការអប់រំពិសេស ចំពោះកុមារជនជាតិដើមភាគតិច និងកុមារមានពិការភាព ត្រូវបានយកចិត្តទុកដាក់យ៉ាងសំខាន់ពីរាជរដ្ឋាភិបាលកម្ពុជា។
ឯកឧត្តម សេរី ជំនះ ក៏បានបង្ហាញពីការប្តេជ្ញាចិត្តរបស់កម្ពុជា ក្នុងការបន្តផ្តល់ការអប់រំប្រកបដោយគុណភាព និងបរិយាបន្ន, ពង្រឹងពង្រីកការអភិវឌ្ឍជំនាញ និងចំណេះដឹងឌីជីថល, និងបង្កើតឱកាសបន្ថែមសម្រាប់យុវជន ដើម្បីដោះសោរសក្តានុពលរបស់ខ្លួន។ ឯកឧត្តមលើកឡើងថា “ការវិនិយោគលើយុវជន គឺជាការកសាងអនាគតប្រកបដោយចីរភាព បរិយាបន្ន និងភាពធន់សម្រាប់ទាំងអស់គ្នា”៕
