ចំពោះអ្នកដែលធ្លាប់ឆ្លងកាត់អារម្មណ៍ភ័យខ្លាចភាពទំនេរ នៅពេលឈប់សម្រាក គឺបានដឹងរួចហើយថា វាមានអាការថប់បារម្ភ និងភាពតានតឹងយ៉ាងណា ហើយជះឥទ្ធិពលទៅកាន់ពេលវេលាសម្រាក និងការរក្សាតុល្យភាពនៃផលិតភាព។ ជារឿយៗ​មនុស្ស​មួយ​ចំនួន​បាន​ប្រឈមនឹងការប្រើប្រាស់ពេលវេលានៅចុងសប្តាហ៍ទាំងមិនសប្បាយចិត្ត ដោយសារពេលខ្លះគ្រាន់តែចំណាយពេលបោសសម្អាតផ្ទះ ឬរៀបចំរបស់របរបន្តិចបន្តួច និងទំនួលខុសត្រូវមិនចាំបាច់នានា ក៏ដល់ពេលដែលត្រូវបំពេញការងារវិញទៅហើយ។

ការចំណាយពេលចុងសប្តាហ៍គឺឱកាសដ៏មានតម្លៃសម្រាប់ការសម្រាកលំហែផ្លូវចិត្ត និងការបណ្តុះឱ្យមានថាមពលឡើងវិញបន្ទាប់ពីប្រើប្រាស់អស់ជាច្រើនថ្ងៃ។ ក្រៅពីនោះក៏ជាពេលដ៏ល្អមួយ ក្នុងការសម្រួចគោលដៅផែនការសកម្មភាព និងគម្រោងផ្ទាល់ខ្លួន។ តាមរយៈគេហទំព័រ Yourtango បានបង្ហាញអំពីសាច់រឿងមួយចំនួន ដែលជួយរក្សាការប្រើប្រាស់ពេលវេលានៅចុងសប្តាហ៍ប្រកបដោយភាពរីករាយ និងថាមពលសម្រាប់ថ្ងៃបន្ទាប់។

១.ធ្វើសកម្មភាពដែលផ្តល់កម្លាំងជំរុញចិត្ត ៖ ការដែលបន្តអនុវត្តន៍សកម្មភាពដើម្បីបណ្តុះនូវកម្លាំងជំរុញចិត្ត នៅចុងសប្តាហ៍ គឺបានរួមចំណែកឱ្យផលិតភាពនៅថ្ងៃចន្ទមានប្រសិទ្ធភាពបន្ថែម។ តាមរយៈ Harvard Business Review បានបង្ហាញឱ្យដឹងថា ការប្រើប្រាស់ពេលសម្រាក និងធ្វើសកម្មភាពដែលនាំនូវផលិតភាពដូចជា ធ្វើផែនការទុកមុន ចូលរួមសកម្មភាពដែលផ្តល់នូវអត្ថន័យជីវិត និងថែទាំខ្លួនឯងតាមលទ្ធភាព និងស្ថានភាពជាក់ស្ដែងតាមរយៈការគេងឱ្យបានគ្រប់គ្រាន់ និងហាត់ប្រាណឱ្យបានទៀងទាត់ជាដើម។ បន្ថែមពីនោះ ការឆ្លុះបញ្ចាំងនិងបណ្តុះថាមពលផ្ទាល់ខ្លួនសុទ្ធសឹងតែជាចំណែកសំខាន់។ ប្រសិនបើសកម្មភាពទាំងនេះអនុវត្តន៍បានទៀងទាត់ នោះនឹងជំរុញឱ្យរក្សាបាននូវភាពរីករាយ​ ក៏ដូចជាទឹកចិត្តវិជ្ជមានជាប្រចាំ។

២.រក្សាផ្នត់គំនិតវិជ្ជមាន ៖ មានកត្តាមួយចំនួនដែលជំរុញឱ្យមានផ្នត់គំនិត​វិជ្ជមានតាមរយៈវប្បធម៌ការងារ ការបារម្ភអំពីភាពខ្វះខាតអ្វីមួយដែលជាឧបសគ្គក្នុងការស្វែងរកភាពរីករាយ បើទោះបីជាមានពេលគ្រប់គ្រាន់ក៏ដោយ។ មួយវិញទៀត កាលដែលមិនបានធ្វើផែនការប្រចាំសប្តាហ៍ គឺជាចំណែកនាំឱ្យមានភាពធុញទ្រាន់ ងាយត្រឡប់ទៅធ្វើទម្លាប់មិនល្អចាស់ៗ និងប៉ះពាល់ដល់ផលិតភាព។ ក្រៅពីនោះ បញ្ហាហិរញ្ញវត្ថុក៏បានបង្កផលប៉ះពាល់ទៅកាន់ការគិតផងដែរ ព្រោះតែមនុស្សបានចំណាយពេលជាច្រើនទៅធ្វើការថែមម៉ោង ឬក៏ការចំណាយពេលចុងសប្តាហ៍ទៅបង្ហើយការងារដែលនៅសល់ចាស់ៗ ដែលកត្តានេះ ធ្វើឱ្យភាពរីករាយដែលពួកគេទទួលបានហាក់មានកម្រិតតិចតួច។

៣.ស្ថិតនៅជាមួយនឹងបច្ចុប្បន្នភាព ៖ ការមានស្មារតីរឮកជាប្រចាំក្នុងការប្រើប្រាស់ជីវិតប្រចាំថ្ងៃ និងកាត់បន្ថយការធ្វើកិច្ចការដែលមិនចាំបាច់ ឬកិច្ចការមិនសូវសំខាន់ទុកមួយឡែកសិន ជំនួសមកវិញនូវការទុកពេលសម្រាកឱ្យបានច្រើនដើម្បីប្រមូលកម្លាំងធ្វើការ និងការស្រូបយកផលិតភាពសម្រាប់ថ្ងៃបន្ទាប់។

នៅមានហេតុផលជាច្រើនទៀត ក្នុងការបង្កើនប្រសិទ្ធភាព ពេលសម្រាកចុងសប្តាហ៍ដូចជា វិនិយោគទៅលើការអភិវឌ្ឍន៍ខ្លួនឯងតាមរយៈរៀនជំនាញបន្ថែម សាកល្បងសកម្មភាពដែលប៉ងជាច្រើនដង តែពុំធ្លាប់អនុវត្តន៍ពីមុនមក ឬក៏ហាត់ប្រាណ អានសៀវភៅ ទៅសារមន្ទីរ និងទៅកន្លែងដែលបណ្ដុំដោយការអប់រំចិត្ត៕