ការថែទាំខ្លួនឯងមិនមែនជារឿងខ្ជះខ្ជាយពេលវេលានោះទេ ប៉ុន្តែវាគឺជាការវិនិយោគលើសុខភាពផ្លូវកាយ និងផ្លូវចិត្ត ដើម្បីឱ្យអ្នកអាចរស់នៅ និងបំពេញការងារបានយ៉ាងល្អប្រសើរបំផុត។ អ្នកជំនាញបានលើកឡើងថា ការយល់ដឹងពីតម្រូវការខ្លួនឯងគឺជាជំហានដំបូង ប៉ុន្តែការអនុវត្តវាឱ្យទៅជាទម្លាប់ពិតប្រាកដ ទើបជាគន្លឹះសំខាន់។

តើអ្វីទៅជាការថែទាំខ្លួនឯង (Self-Care)?

តាមប្រសាសន៍របស់លោកស្រី Kelsey Patel អ្នកជំនាញផ្នែកសុខុមាលភាពបានឱ្យដឹងថា «ការថែទាំខ្លួនឯង គឺការស្ដាប់បង្គាប់រាងកាយ ពិនិត្យមើលស្ថានភាពផ្លូវចិត្ត និងការផ្អាកពីភាពមមាញឹក ដើម្បីឱ្យជីវិតមានតុល្យភាព»។ ការថែទាំខ្លួនឯងមិនមែនមានន័យត្រឹមតែការញ៉ាំអាហារល្អៗ ឬហាត់ប្រាណប៉ុណ្ណោះទេ ប៉ុន្តែវារួមបញ្ចូលទាំង ការធ្វើអ្វីដែលខ្លួនឯងចូលចិត្ត ដូចជាការស្តាប់តន្ត្រី ការជួបជុំមិត្តភក្តិ ឬការម៉ាស្សា, ការទទួលខុសត្រូវលើខ្លួនឯង ដែលសូម្បីតែកិច្ចការដែលមិនសូវរីករាយ ដូចជាការសម្អាតផ្ទះ ឬការទៅពិនិត្យសុខភាពប្រចាំឆ្នាំ ក៏រាប់ចូលជាការថែទាំខ្លួនឯងដែរ ព្រោះវាផ្ដល់នូវសេចក្តីសុខក្នុងចិត្តនៅពេលក្រោយ។

ជំហានទាំង ៥ ដើម្បីបង្កើតទម្លាប់ថែទាំខ្លួនឯងឱ្យជាប់លាប់

ដើម្បីឱ្យការថែទាំខ្លួនឯងក្លាយជាផ្នែកមួយនៃជីវិតប្រចាំថ្ងៃ អ្នកអាចអនុវត្តតាមវិធីសាស្ត្រខាងក្រោម៖

១. ស្វែងរកអ្វីដែលធ្វើឱ្យអ្នកមានអារម្មណ៍ល្អ ៖ ចូរចាប់ផ្តើមសរសេរបញ្ជីរាយនាមនូវអ្វីៗដែលនាំមកនូវក្ដីសុខដល់អ្នក (ឧទាហរណ៍៖ ពណ៌ដែលអ្នកចូលចិត្ត, ក្លិនក្រអូប, ឬសកម្មភាពកម្សាន្តផ្សេងៗ)។

២. បញ្ចូលសកម្មភាពទាំងនោះទៅក្នុងជីវិតប្រចាំថ្ងៃ ៖ អ្នកមិនចាំបាច់ធ្វើរឿងធំដុំភ្លាមៗនោះទេ។ ចាប់ផ្តើមពីចំណុចតូចៗ ដូចជាការតុបតែងកន្លែងធ្វើការដោយពណ៌ដែលអ្នកចូលចិត្ត ឬការចំណាយពេលខ្លីៗធ្វើរឿងដែលអ្នកស្រឡាញ់។

៣. កំណត់គោលដៅឱ្យច្បាស់លាស់៖ បង្កើតគោលដៅដែលអាចវាស់វែងបាន និងមិនបង្ខំខ្លួនឯងពេក។ ប្រសិនបើអ្នកចង់សម្រាកពីទូរស័ព្ទ ចូរចាប់ផ្តើមត្រឹម ២០ នាទីក្នុងអំឡុងពេលញ៉ាំបាយ រួចសឹមបង្កើនពេលនៅសប្តាហ៍បន្ទាប់។

៤. ស្វែងរកអ្នកគាំទ្រ៖ ការមានមិត្តភក្តិ ឬក្រុមគ្រួសារដែលចូលចិត្តធ្វើសកម្មភាពដូចគ្នា នឹងជួយឱ្យអ្នកមានកម្លាំងចិត្តអនុវត្តវាបានយូរអង្វែង។

៥. បត់បែនទៅតាមស្ថានភាព៖ តម្រូវការរបស់មនុស្សម្នាក់ៗផ្លាស់ប្តូរទៅតាមពេលវេលា។ បើវិធីសាស្ត្រខ្លះមិនស័ក្តិសមសម្រាប់ពេលនេះ អ្នកអាចកែសម្រួល ឬប្តូរទៅធ្វើអ្វីផ្សេងដែលផ្តល់ផលវិជ្ជមានជាង។

សរុបមកវិញ កាលណាអ្នកថែទាំខ្លួនឯងបានល្អ អ្នកនឹងមានថាមពលកាន់តែច្រើនសម្រាប់ចែករំលែកសេចក្តីល្អ ក្តីមេត្តា និងភាពរឹងមាំទៅកាន់មនុស្សជុំវិញខ្លួន៕