យូហ្កា ជាបេសកកម្មមួយ ដែលត្រូវការទាំងស្មារតី និងកម្លាំងកាយក្នុងការហាត់ពត់ ដោយមានរួមបញ្ចូលសកម្មភាពមួយចំនួនដូចជា របៀបនៃការដកដង្ហើម ការសមាធិ ឬក៏ការបន្ធូរអារម្មណ៍ ជារួមគឺមានរបៀបបែបបទ និងវិធីសាស្រ្តខុសៗគ្នា ទៅតាមអ្នកជំនាញ តាមតំបន់ និងការជ្រើសរើសរបស់បុគ្គលម្នាក់ៗ ដោយផ្អែកតាមស្ថានភាព និងថាមពលដែលពួកគាត់មាន។

អ្នកគ្រូ វន់ អែម ជាគ្រូបង្វឹកយូហ្គា បាននិយាយថា ភាពចម្រុះនៃការហាត់យូហ្គា មានគោលដៅរួមមួយគឺ ដើម្បីពង្រឹងទៅកាន់សុខុមាលភាព នៃការរស់នៅទាំងក្នុងរយៈពេលខ្លី និងក្នុងរយៈពេលវែង។ ហើយយូហ្គាទៀតសោត បានផ្តល់អត្ថប្រយោជន៍ជារួមដូចជា ធ្វើ​ឱ្យចលនានៃរាងកាយមានតុល្យភាពនិងភាពបត់បែន កាត់បន្ថយស្រ្តេសនិងភាពតានតឹង ពង្រឹងនិងកម្តៅសាច់ដុំរាងកាយ សម្រួលដល់សរសៃឈាមបេះដូង កាត់បន្ថយភាពចុករោយ ជំរុញគុណភាពនៃការគេងនិងអារម្មណ៍ល្អ រួមទាំងរក្សាចិត្ត ឬស្មារតីឱ្យស្ថិតក្នុងបច្ចុប្បន្នភាព។

“របៀបនៃការធ្វើយូហ្គា ជួយឱ្យយើងមានសុខភាពល្អ ទាំងកាយ និងចិត្ត និងរបៀបញាំអាហារដែលកាន់តែជួយឱ្យយើងមានសុខភាពល្អ។ តាមរយៈបទពិសោធន៍ ក្នុងការអនុវត្តន៍យូហ្គាជាមួយយុវជន ជាមួយកុមារ និងអ្នកមានបញ្ហាផ្លូវចិត្ត ក៏ដូចជាការធ្វើការជាមួយមនុស្សទូទៅ និងយូហ្គាដោយខ្សែអង្រឹង ខ្ញុំកាន់តែមើល៍ឃើញពីសារៈសំខាន់របស់យូហ្កា”

អ្នកគ្រូ វន់ អែម ជាគ្រូបង្វឹកយូហ្គា

អ្នកគ្រូ វន់ អែម បន្ថែមថា សុខភាពហិរញ្ញវត្ថុក៏សំខាន់ ក្ដីស្រឡាញ់ក៏សំខាន់ ហើយបញ្ហាផ្លូវចិត្តក៏សំខាន់។ ប៉ុន្តែអ្វីដែលកាន់តែសំខាន់ តើយើងខ្លួនឯងផ្ទាល់នឹងធ្វើបែបណាដើម្បីឱ្យមានតុល្យភាព? តើយើងនឹងចាប់ផ្តើមពីត្រង់ណា?

អ្នកគ្រូបង្វឹកយូហ្គារូបនេះ ក៏បានរំលេចបន្ថែមអំពីអត្ថប្រយោជន៍ នៃការធ្វើសមាធិបែបខ្លីៗថា គឺមានភាពពាក់ព័ន្ធនឹងសុខុមាលភាព និងសុខភាពផ្លូវចិត្ត ដោយសារតែសមាធិខ្លីៗបានរួមចំណែកក្នុងការគ្រប់គ្រងអារម្មណ៍ ជួយក្នុងការផ្តោត និងការឆ្លុះបញ្ចាំងពីខ្លួនឯងបានច្រើនជាងមុន។

ទន្ទឹមគ្នានោះ អ្នកគ្រូ វន់ អែម ក៏បានលើកឡើងអំពីប្រភេទអាហារ ដែលនាំឱ្យការរស់នៅមានភាពរីករាយផងដែរ។ ដើម្បី​ឱ្យសុខភាពចិត្ត និងកាយ មានភាពរឹងមាំទៅបាន ការបរិភោគអាហារពុំមែនដើម្បីបំពេញចំណង់នៃការឃ្លានតែមួយមុខនោះទេ ហើយការហាត់យូហ្កា ឬហាត់ប្រាណ ក៏ពុំអាចជួយរាងកាយបានទាំងស្រុងដែរ ប្រសិនបើមិនមានការរៀបចំ របបអាហារឱ្យ​ស្របតាមតម្រូវការនៃរាងកាយរបស់មនុស្សម្នាក់ៗ។ អាហារដែលបរិភាគប្រចាំថ្ងៃ ចាំបាច់មានបន្លែបង្ការ ផ្លែឈើ គ្រាប់ធញ្ញជាតិ និងត្រីសាច់ក្នុងកម្រិតមួយដែលមិនលើសពីតម្រូវការរបស់រាងកាយ ហើយដើម្បីឱ្យកាន់តែមានប្រសិទ្ធភាព នៃការបរិភោគ គួរមានការពិនិត្យសុខភាព និងការពិគ្រោះជាមួយអ្នកជំនាញ ក៏ដូចជាការសង្កេតទម្លាប់នៃការទទួលទានប្រចាំថ្ងៃ៕