ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ៖ នៅរាជធានីភ្នំពេញហាងកាហ្វេទំនើបៗមានសន្ទុះកើនឡើងគួរឱ្យកត់សម្គាល់ក្នុងរយៈពេលប៉ុន្មានចុងក្រោយនេះ។ ដើមឡើយអ្នកចូលហាងកាហ្វេទំនើបមានប្រជាប្រិយភាពសម្រាប់តែជនបរទេស ឬអ្នករកស៊ីតែប៉ុណ្ណោះ ប៉ុន្តែបច្ចុប្បន្នហាងកាហ្វេទំនើបមួយចំនួនជាទីកន្លែងទាក់ទាញចិត្តយុវជន រាប់ទាំងសិស្ស-និស្សិតកំពុងសិក្សាជាដើម។ យុវជន ដែលមានលទ្ធភាពចូលហាងកាហ្វេទំនើប បានចាត់ទុកហាងកាហ្វេជាកន្លែងសិក្សា ជួបពិភាក្សាកិច្ចការងារ ខ្លះទៀតក៏ចាត់ទុកជាទីកន្លែងបន្ធូរបន្ថយភាពតានតឹងពីការងារផងក៏មាន។ ហាងកាហ្វេទំនើបមានច្រើន ហើយជម្រើសក៏មានច្រើនសម្រាប់យុវជនដែរ។
តើយុវជនចូលហាងកាហ្វេទំនើបធ្វើអ្វីខ្លះ? កញ្ញា គង់ សុមណីជាតិ ជានិស្សិតផ្នែកសិក្សាអន្តរជាតិ នៃវិទ្យាស្ថានភាសាបរទេស (IFL) យល់ឃើញថា បរិយាកាសនៅហាងកាហ្វេបង្កភាពងាយស្រួលដល់ការពិភាក្សាកិច្ចការសាលា។លើសពីនេះ សុមណីជាតិ បានបន្ថែមថា ទីតាំងហាងកាហ្វេជួយឱ្យនិស្សិតមានពេលវេលាគ្រប់គ្រាន់ក្នុងការពិភាក្សាគ្នា និងងាយស្រួលធ្វើដំណើរទៅរក។
សុមណីជាតិ បានបន្តថា ជាទូទៅរូបគេនិងមិត្តភក្តិតែងចូលហាងកាហ្វេយ៉ាងហោចណាស់ 3-4 ដងក្នុងមួយសប្តាហ៍។
“ពីមុនខ្ញុំទៅញឹក ទើបតែពេល Covid-19 នេះទេ ដែលខ្ញុំនិងមិត្តភក្តិអត់សូវទៅហាងកាហ្វេ។ ពួកខ្ញុំអត់ដឹងទៅណាពេលជួបគ្នានៅទីសាធារណៈ អ៊ីចឹងមានតែហាងហ្វេ”
សម្រាប់យុវជន អ៉ិត សេរីវឌ្ឍនៈ ជានិស្សិតនៃសាកលវិទ្យាល័យកម្ពុជា និងកំពុងស្វែងរកអាហារូបករណ៍សិក្សាបន្តនៅក្រៅប្រទេស ក៏យល់ឃើញថា ហាងកាហ្វេជាទីតាំងបន្ធូរបន្ថយបរិយាកាសតានតឹងក្នុងចិត្ត និងជំរុញប្រសិទ្ធភាពការគិតឱ្យកាន់តែប្រសើរ។
“ខ្ញុំចាត់ទុកហាងកាហ្វេជាទីតាំងដែលធ្វើឱ្យអារម្មណ៍ខ្ញុំស្រស់ស្រាយ ហើយផ្ដោតទៅលើកិច្ចការបានល្អ។ ខ្ញុំជ្រើសរើសតែហាងកាហ្វេណាដែលស្ងប់ស្ងាត់ មិនរំខានអារម្មណ៍ ហើយនៅពេលសរសេរឯកសារស្នើសុំអាហារូបករណ៍ទៅសិក្សានៅក្រៅប្រទេស ខ្ញុំធ្វើបានល្អកន្លងទៅ។ ខ្ញុំមិនមែនជាអ្នកញៀនកាហ្វេទេ នៅថ្ងៃអាទិត្យចុងសប្តាហ៍ទើបខ្ញុំទៅហាងកាហ្វេម្ដងប៉ុណ្ណោះ… ហើយខ្ញុំទៅហាងកាហ្វេ ក៏មិនមែនបង្ហាញភាពឡូយឆាយហ៊ឺហាអ្វីដែរ តែខ្ញុំមានគោលដៅច្បាស់លាស់”។
សេរីវឌ្ឍនៈ បានបញ្ជាក់
សេរីវឌ្ឍនៈ បានបញ្ជាក់ពីគោលជំហររបស់ខ្លួនមុននឹងសម្រេចចិត្តចូលហាងកាហ្វេ។
មិនមែនតែនិស្សិតនោះទេ ដែលយល់ថា ហាងកាហ្វេទំនើបជាទីតាំងសម្រាប់ការសិក្សានិងធ្វើការងារ។ កញ្ញា ចេន សុជាតា បច្ចុប្បន្នជាអ្នកសារព័ត៌មាន ក៏យល់ឃើញដែរថា ហាងកាហ្វេទំនើបជាទីដែលផ្តល់បរិយាកាសស្និទ្ធស្នាលនៅពេលជួបនិងពិភាក្សាការងារជាមួយនរណាម្នាក់។ កញ្ញាបានចាត់ទុកហាងកាហ្វេ ប្រៀបដូចជាការិយាល័យធ្វើការ ហើយពេលខ្លះចំណាយពេលធ្វើការងារនៅហាងកាហ្វេទៀតផង។
“អាចថាខ្ញុំចូលចិត្តហាងកាហ្វេក៏ថាបាន ឬអាចថាខ្ញុំញៀន កាហ្វេក៏បាន ប៉ុន្តែពេលដែលខ្ញុំចូលហាងកាហ្វេខ្ញុំមានអារម្មណ៍ថាស្រស់ស្រាយ។ មិនត្រឹមតែញ៉ាំកាហ្វេទេពេលខ្លះយើងអាចញ៉ាំអ្វីផ្សេងក្រៅពីកាហ្វេ ពិភាក្សាការងារក៏បាន ណាត់ជួបភ្ញៀវសម្ភាសន៍ក៏បាន… និយាយទៅវាដូចជាកន្លែងធ្វើការដែរអញ្ចឹង”
កញ្ញា ចេន សុជាតា
ចេន សុជាតា បានបន្តទៀតថា នៅហាងកាហ្វេមានអ៊ីនធឺណិតគ្រប់គ្រាន់សម្រាប់ស្វែងរកឯកសារ និងធ្វើកិច្ចការផ្សេងៗ។
ស្របនឹងការលើកឡើងនេះ ជាការកត់សម្គាល់នៅរាជធានីភ្នំពេញនាពេលបច្ចុប្បន្ន មានយុវជនជាសិស្ស-និស្សិតជាច្រើននិយមចូលហាងកាហ្វេ។ អ្នកខ្លះបានចាត់ទុកខាងកាហ្វេជាទីតាំងសម្រាប់ការកម្សាន្តរបស់ខ្លួន ឯខ្លះទៀតចាត់ទុកហាងកាហ្វេជាទីតាំងជួយសម្រួលដល់ប្រសិទ្ធភាពការងារនិងការសិក្សា។ សម្រាប់ការចំណាយប្រាក់និងពេលវេលានៅហាងកាហ្វេ ដើម្បីបំពេញតម្រូវការខាងលើ ក៏យុវជនកម្ពុជា ពិសេសសិស្ស-និស្សិតមិនគួរមើលរំលងដែរ។
និយាយក្នុងនាមអ្នកចូលហាងកាហ្វេញឹកញាប់ផង និងមានបទពិសោធន៍ជាអ្នកគ្រប់គ្រងហាងកាហ្វេឬស្សីត្រឹប នៃរាជបណ្ឌិត្យសភាកម្ពុជាផង កញ្ញា ម៉ៅ សុគន្ធា ក៏បានលើកឡើងដែរថា កញ្ញាចូលចិត្តចំណាយពេលសិក្សានិងធ្វើកិច្ចការនៅតាមហាងកាហ្វេ។
កញ្ញា ម៉ៅ សុគន្ធា ៖
“ការពិតចូលហាងកាហ្វេយើងត្រូវចំណាយលុយច្រើន មិនមែនសម្រាប់ផឹកតែកាហ្វេមួយកែវនោះទេ ព្រោះយើងត្រូវអង្គុយរយៈពេលយូរ ដូច្នេះចំណាយក៏ច្រើនដែរ។ អញ្ចឹងហើយសំណួរសម្រាប់ខ្លួនឯង ថាតើខ្ញុំអាចចំណេញអ្វីខ្លះពេលដែលចូលទៅអង្គុយនៅក្នុងហាងកាហ្វេ ថែមទាំងចាយលុយទៀត។ សម្រាប់ខ្ញុំទាញយកប្រយោជន៍បានច្រើន…។
“ខ្ញុំអាចនិយាយបានថា ជោគជ័យក្នុងការសិក្សាកន្លងទៅ ក៏ដោយសារតែខ្ញុំចូលហាងកាហ្វេដែរ”។
– កញ្ញា ម៉ៅ សុគន្ធា
និយាយផងកាយវិការលើដៃពន្យល់ផង កញ្ញា ម៉ៅ សុគន្ធា បានឱ្យ AMS ដឹងបន្តថា ការជ្រើសរើសប្រភេទហាងកាហ្វេដែលសមស្របតាមចំណង់ចំណូលចិត្ត មានសម្ភារៈនិងបរិយាកាសអំណោយដល់ការសិក្សានិងការងារ ទើបទទួលផលចំណេញពីហាងកាហ្វេពិតប្រាកដ។កញ្ញា សុគន្ធា បានបញ្ជាក់យ៉ាងខ្លីថា ហាងកាហ្វេគួរជាទីកន្លែងផ្ដល់ប្រយោជន៍ដល់យុវជន។
“អាជីវកម្មហាងកាហ្វេមិនត្រូវគិតតែពីរឿងប្រាក់ចំណេញនោះទេ តែក៏ត្រូវផ្ដល់ប្រយោជន៍អ្វីមួយដល់យុវជនដែរ”
គួរបញ្ជាក់ថា សព្វថ្ងៃអាជីវកម្មហាងកាហ្វេហាក់មានសន្ទុះកើនឡើងគួរឲ្យកត់សម្គាល់។ ហាងកាហ្វេទំនើបនីមួយៗមានលក្ខណៈពិសេសដោយឡែកពីគ្នា ដែលរចនាឡើងតម្រូវដល់អតិថិជនជាក្រុមគោលដៅ។ ចំណែក
ទីកន្លែងដែលផ្ដល់បរិយាកាសល្អប្រសើរ ក៏មិនប្រាកដថាមានតែហាងកាហ្វេទំនើបៗដែរ អាស្រ័យលើការថ្លឹងថ្លែង និងលទ្ធភាពផ្ទាល់ខ្លួនម្នាក់ៗតែប៉ុណ្ណោះ៕
ជីវប្រវត្តិ: លោក ម៉ៅ សំណាង ជាការីនិពន្ធផ្នែកអប់រំ និងជាផលិតករព័ត៌មាននៃ AMS Education ។ លោកមានបទពិសោធន៍ការងារជាអ្នកសារព័ត៌មានវិទ្យុ, ពិធីករ និងជាអ្នករាយការណ៍ព័ត៌មានទូរទស្សន៍, និងជាផលិករប្រព័ន្ធផ្សព្វផ្សាយចម្រុះ។
របាយការណ៍សំខាន់
ព័ត៌មានទូទៅ
អ្នកជំនាញ ៖ កម្ពុជាត្រូវការពង្រឹងជំនាញបៃតង ដើម្បីឆ្លើយតបនឹងតម្រូវការការងារនាពេលអនាគត
ការដើរឡើងជណ្តើរជាប្រចាំ អាចកាត់បន្ថយហានិភ័យនៃការស្លាប់មុនអាយុរហូតដល់ ២៥% និងការពារជំងឺបេះដូង
អគ្គនាយកដ្ឋានអប់រំ ជ្រើសរើសនិស្សិតចុះកម្មសិក្សាការងារ ៦រូប លើជំនាញរដ្ឋបាល អប់រំ ទំនាក់ទំនងអន្តរជាតិ និងព័ត៌មានវិទ្យា
យូនីសេហ្វ និងមូលនិធិ ខេ អឹម អេច ចាប់ដៃគូគ្នាដើម្បីពង្រីកការអប់រំកុមារតូចនៅកម្ពុជា
សម្ដេចធិបតី ហ៊ុន ម៉ាណែត ណែនាំសិស្សនិស្សិតកុំពឹងផ្អែកទាំងស្រុងលើ AI, ការប្រើប្រាស់ AI ត្រូវមានព្រំដែនឱ្យច្បាស់
ក្រុមសិស្សមកពីវិទ្យាល័យសុខអានទន្លេបាទី ដណ្តើមបានជ័យលាភីលេខ១ ក្នុងការប្រកួតផលិតវីដេអូអប់រំខ្លីស្ដីពីផលប៉ះពាល់នៃការសេពគ្រឿងស្រវឹង
យូនីសេហ្វ ៖ ៩០% នៃសាលារៀនកម្ពុជាមានសេវាទឹកស្អាតបរិភោគនៅកម្រិតមូលដ្ឋាន
តិចនិកថែសុខភាពក្នុងវ័យ ៣០ ឆ្នាំ ដើម្បីកុំឱ្យស្ដាយក្រោយពេលដល់អាយុ ៧០ឆ្នាំ
សហភាពអឺរ៉ុបផ្តល់អាហារូបករណ៍ពេញថ្លៃ ៣០កន្លែង លើជំនាញវិស័យទឹក ទៅសិក្សានៅសាកលវិទ្យាល័យក្នុងតំបន់អឺរ៉ុប
OCIC និង WCCI សហការបង្កើតសាកលវិទ្យាល័យបច្ចេកវិទ្យាអាកាសចរណ៍ដំបូងបង្អស់នៅកម្ពុជា
កម្មវិធីពិសេសរបស់ AMS EDUCATION
ព័ត៌មានសង្ខេប
