តើអ្នកធ្លាប់ជួបដូចជារកសោផ្ទះមិនឃើញ ឬភ្លេចបញ្ជីទិញទំនិញ ក៏​ដូចជានឹកឈ្មោះមនុស្សដែលទើបនឹងស្គាល់មិនឃើញដែរឬទេ? ការភ្លេចភ្លាំងបន្តិចបន្តួចអាចកើតមានចំពោះមនុស្សគ្រប់គ្នា ប៉ុន្តែការថែរក្សាសុខភាពខួរក្បាល និងការចងចាំ គឺជារឿងដែលមិនគួរមើលរំលង។

ទោះបីជាមិនមានការធានា ១០០% ក្នុងការបង្ការជំងឺភ្លេចភ្លាំង (Dementia) ក៏ដោយ ប៉ុន្តែការអនុវត្តសកម្មភាពសាមញ្ញៗទាំង ៦ ខាងក្រោមនេះ អាចជួយឱ្យការចងចាំរបស់អ្នកកាន់តែមានភាពល្អប្រសើរ៖

១. ធ្វើលំហាត់ប្រាណជារៀងរាល់ថ្ងៃ

ការធ្វើលំហាត់ប្រាណជួយបង្កើនលំហូរឈាមទៅកាន់រាងកាយទាំងមូល រួមទាំងខួរក្បាលផងដែរ។ អ្នកជំនាញណែនាំឱ្យធ្វើលំហាត់ប្រាណកម្រិតមធ្យម (ដូចជាការដើរលឿន) យ៉ាងហោចណាស់ ១៥០ នាទីក្នុងមួយសប្តាហ៍ ឬលំហាត់ប្រាណកម្រិតធ្ងន់ (ដូចជាការរត់ត្រឹកៗ) ៧៥ នាទីក្នុងមួយសប្តាហ៍។

២. ហ្វឹកហាត់ខួរក្បាលឱ្យសកម្ម

ដូចគ្នានឹងរាងកាយដែរ ខួរក្បាលត្រូវការ “ការហាត់ប្រាណ” ដែរ។ អ្នកអាចសាកល្បងលេងល្បែងផ្គុំរូប អានសៀវភៅ រៀនលេងឧបករណ៍តន្ត្រី ឬស្វែងរកចំណូលចិត្តថ្មីៗ ដើម្បីឱ្យខួរក្បាលធ្វើការជានិច្ច។

៣. បង្កើនទំនាក់ទំនងសង្គម

ការចំណាយពេលជាមួយមនុស្សជាទីស្រឡាញ់ និងមិត្តភក្តិ ជួយកាត់បន្ថយភាពតានតឹង និងជំងឺបាក់ទឹកចិត្ត ដែលជាកត្តារួមចំណែកធ្វើឱ្យបាត់បង់ការចងចាំ។ ដូច្នេះការជួបជុំ និងការនិយាយស្តី គឺជាថ្នាំប៉ូវជួយខួរក្បាលដ៏ល្អបំផុត។

៤. រៀបចំទុកដាក់ឱ្យមានសណ្តាប់ធ្នាប់

អ្នកងាយនឹងភ្លេចភ្លាំង ប្រសិនបើផ្ទះរបស់អ្នករញ៉េរញ៉ៃ ឬកំណត់ត្រាមិនមានរបៀប។ គួរប្រើប្រាស់សៀវភៅកត់ត្រា កាលវិភាគ ឬកម្មវិធីទូរស័ព្ទដើម្បីតាមដានការងារ។ អ្វីដែលសំខាន់ គួរទុករបស់ចាំបាច់ដូចជា កាបូបលុយ សោ និងវ៉ែនតា នៅកន្លែងដដែលជានិច្ច។

៥. គេងឱ្យបានគ្រប់គ្រាន់

ការគេងមិនលក់ ឬគេងមិនស្កប់ មានទំនាក់ទំនងយ៉ាងជិតស្និទ្ធទៅនឹងការបាត់បង់ការចងចាំ។ មនុស្សពេញវ័យគួរគេងឱ្យបានពី ៧ ទៅ ៩ ម៉ោងក្នុងមួយយប់។ ប្រសិនបើអ្នកមានបញ្ហាក្នុងការគេង គួរប្រឹក្សាជាមួយគ្រូពេទ្យ ព្រោះវាអាចជាសញ្ញានៃបញ្ហាសុខភាព។

៦. ជ្រើសរើសរបបអាហារដែលជំនួយខួរក្បាល

របបអាហារដែលសម្បូរទៅដោយបន្លែ ផ្លែឈើ និងគ្រាប់ធញ្ញជាតិ គឺល្អសម្រាប់សុខភាពខួរក្បាល។ គួរជ្រើសរើសប្រភពប្រូតេអ៊ីនដែលមានជាតិខ្លាញ់ទាប ដូចជា ត្រី សណ្តែកជាដើម។ ជាមួយគ្នានេះ គួរកម្រិតការទទួលទានគ្រឿងស្រវឹង ព្រោះវាអាចធ្វើឱ្យប៉ះពាល់ដល់ការចងចាំ៕