ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ទម្លាប់នៃការទទួលទានស្រា កំពុងធ្លាក់ចុះច្រើន ក្នុងចំណោមមនុស្សជំនាន់ Z (GenZ) បើធៀបទៅនឹងមនុស្សជំនាន់មុន។
ក្រុមមនុស្សជំនាន់ Z ធំធាត់ឡើង នៅអំឡុងពេលដែលមានការផ្សព្វផ្សាយ និងអប់រំយ៉ាងទូលំទូលាយអំពីចំណេះដឹងសុខភាព សុខុមាលភាព និងការយល់ដឹងអំពីការវិវត្តន៍នៃសង្គម។ ការទទួលបានចំណេះដឹងទាំងនេះ កំពុងធ្វើឱ្យមនុស្សជំនាន់ Z មានទំនោរទទួលទានគ្រឿងស្រវឹងតិច។
ការស្រាវជ្រាវរបស់ Statista បានបង្ហាញថា GenZ ទទួលទានស្រាបៀរ និងស្រាក្រហម តិចជាង ១/៣ នៃមនុស្សជំនាន់មុនៗ។ ពួកគេកំពុងងាកទៅរកការទទួលទានភេសជ្ជៈគ្មានជាតិអាល់កុល ជំនួសឱ្យការទទួលទានគ្រឿងស្រវឹងវិញ។
និន្នាការនេះ ត្រូវបានគេសង្កេតឃើញជាលើកដំបូង នៅអាម៉េរិកខាងជើង នាដើមទសវត្សរ៍ឆ្នាំ ២០០០ បន្ទាប់មកក៏បានក្លាយជានិន្នាការសកល។ តើមានហេតុផលចម្បងអ្វីខ្លះ នាំឱ្យ GenZ ទទួលទានស្រាតិច?
ការប្រុងប្រយ័ត្ន និងការយល់ដឹងអំពីការថែទាំសុខភាព
យោងតាមអង្គការសុខភាពពិភពលោក គ្រឿងស្រវឹង គឺមានទំនាក់ទំនងទៅនឹងបញ្ហាសុខភាពច្រើនជាង ២០០ រួមទាំងបញ្ហាមហារីក និងជំងឺថ្លើមផងដែរ។
បច្ចុប្បន្ន ការយល់ដឹងជាសាធារណៈអំពីហានិភ័យទាំងនេះ បានធ្វើឱ្យការកើតមហារីក ដែលបណ្ដាលមកពីការទទួលទានគ្រឿងស្រវឹងបានថយចុះ។ ការពិនិត្យឡើងវិញមួយ អំពីការសិក្សាចំនួន ៣២ នៅប្រទេសចំនួន ១៦ បានរកឃើញថា ការយល់ដឹងអំពីហានិភ័យនៃគ្រឿងស្រវឹង ជាកត្តាបណ្ដាលឱ្យកើតជំងឺមហារីក បានធ្វើឱ្យអត្រាជំងឺមហារីកទូទៅថយចុះ ជាមួយនឹងការប្រែប្រួលមួយចំនួន នៅតំបន់ជាច្រើន។
កិច្ចខិតខំប្រឹងប្រែង ដើម្បីបិទគម្លាតចំណេះដឹងនេះ មានសន្ទុះយ៉ាងខ្លាំង ក្នុងរយៈពេលប៉ុន្មានឆ្នាំចុងក្រោយនេះ។ ខណៈដែល GenZ ជាជំនាន់ ដែលធំធាត់ឡើងក្នុងយុគសម័យឌីជីថល ដែលព័ត៌មានអំពីចំណេះដឹងសុខភាព ងាយស្រួលស្វែងរកជាងជំនាន់មុន។ ពួកគេ ហាក់ដូចជា ដឹងអំពីឥទ្ធិពលអវិជ្ជមាន នៃគ្រឿងស្រវឹង ច្រើនជាងមនុស្សជំនាន់មុនៗ។
ការយល់ដឹងអំពីការថែទាំសុខភាពផ្លូវចិត្ត ក៏ដើរតួនាទីសំខាន់ផងដែរ ក្នុងការនាំឱ្យមានការផ្លាស់ប្ដូរនេះ។ GenZ មានអត្រាអ្នកមានវិបត្តិថប់បារម្ភ និងជំងឺបាក់ទឹកចិត្ត ខ្ពស់ជាងមនុស្សជំនាន់មុន។ ជាមួយនឹងអត្រានេះ GenZ និង Gen Y មានទំនោរស្វែងរកជំនួយ និងការព្យាបាលផ្លូវចិត្ត ពីអ្នកជំនាញ ច្រើនជាងអ្នកជំនាន់មុន ហើយការជជែកដោយបើកចំហរ អំពីឥទ្ធិពល នៃគ្រឿងស្រវឹងលើសុខភាពផ្លូវចិត្ត ក៏មានច្រើនផងដែរ។
ជាមួយគ្នានេះ យុវជនកាន់តែច្រើន កំពុងបង្កើតវិធីដែលធ្វើឱ្យពួកគេសប្បាយ ដោយមិនចាំបាច់មានគ្រឿងស្រវឹង។ សម្រាប់មនុស្សជំនាន់ថ្មី ការបង្កើតបទពិសោធន៍សង្គម ដែលមានអត្ថន័យ គឺមិនមែនទាល់តែអនុវត្តតាមអ្វី ដែលសង្គមធ្លាប់ធ្វើពីមុនមកទេ៕
