អាកាសធាតុកាន់តែក្តៅខ្លាំង កុមារតូចៗ និងក្មេងជំទង់ដែលមានអាយុក្រោម១៨ឆ្នាំ គឺជាក្រុមមនុសដែលស្ថិតក្នុងចំណោមប្រភេទងាយរងផលប៉ះពាល់ដល់សុខភាពខ្លាំងជាងគេ បញ្ហានេះកើតមានដោយសារតែរាងកាយ និងសុខភាពផ្លូវចិត្តកុមារកំពុងតែត្រូវការអភិវឌ្ឍ ពួកគេមិនទាន់មានភាពធន់ និងមិនទាន់បន្សាំនឹងអាកាសធាតុក្តៅខ្លាំង ឬមិនទាន់បន្សាំនឹងខ្យល់ដែលគ្មានគុណភាពនៅឡើយទេ។ បន្ថែមពីនោះ កុមារត្រូវការចំណាយពេលជាច្រើន ក្នុងលំហបរិយាកាសខាងក្រៅ ដោយប៉ះពាល់ផ្ទាល់ទៅនឹងអាកាសធាតុមិនល្អ ហើយវ័យនេះផងដែរ កុមារត្រូវការពឹងផ្អែកលើមនុស្សធំជាចាំបាច់ក្នុងការថែទាំសុខភាពរបស់ពួកគាត់។

តាមរយៈគេហទំព័រ EPA ( United State Environmental Protection ) បានណែនាំទៅកាន់អាណាព្យាបាល និងអ្នកថែទាំកុមារទាំងឡាយ មិនថាឪពុកម្តាយ អ្នកថែទាំក្មេងៗ គ្រូបង្រៀនកុមារតូច និងអ្នកគ្រប់គ្រងសាលាជាដើម គួរដឹងពីវិធានការមួយចំនួន ដើម្បីកាត់បន្ថយផលប៉ះពាល់សុខភាព នៃការប្រែប្រួលអាកាសធាតុចំពោះកុមារ ៖

១. រក្សារាងកាយកុមារឱ្យមានសំណើម ៖ ការរក្សារាងកាយកុមារ ឱ្យមានសំណើមជាមូលដ្ឋានគ្រឹះដំបូង ដែលអ្នកថែទាំកុមារគួរអនុវត្តន៍ កុមារដែលមានជាតិទឹកគ្រប់គ្រាន់នៅក្នុងខ្លួន មានលទ្ធភាពទប់ទល់ពីអាការជំងឺផ្សេងៗបានមួយផ្នែក ជាពិសេសនៅពេលសីតុណ្ហភាពចាប់ផ្តើមឡើងកម្តៅខ្ពស់។ វិធីសាស្រ្ត រក្សាសំណើមរាងកាយចំពោះកុមារមានដូចជា ជំរុញឱ្យក្មេងៗទទួលទានទឹកឱ្យបានញឹកញាប់ ប៉ុន្តែហូបក្នុងល្បឿនមួយយឺតៗទើបទទួលបានប្រសិទ្ធភាព ក្រៅពីនោះធ្វើឱ្យបរិយាកាសផ្ទះ ឬសាលាមានសភាពត្រជាក់តាមដែលអាចធ្វើបាន និងអនុញ្ញាតិឱ្យកូនលេងនៅក្នុងបរិយាខាងក្រៅតែពេលណាដែលសីតុណ្ហភាពធ្លាក់ចុះ។ មួយវិញទៀត សូមការជៀសវាងការទុកឱ្យក្មេងៗនៅកន្លែងចតឡាន ព្រោះកម្តៅចេញពីបរិយាកាសទាំងនោះ មានកម្តៅផង និងមានផ្សែងពុលផង ដែលងាយបង្កគ្រោះថ្នាក់ទៅកាន់សុខភាពកុមារ។

២. ឧស្សាហ៍ពិនិត្យមើលកម្រិតកម្តៅ និងគុណភាពខ្យល់នៅតាមតំបន់ ៖ ដឹងអំពីការឡើងចុះ នៃសីតុណ្ហភាព ផ្តល់ភាពងាយស្រួលក្នុងការត្រៀមខ្លួនទុកជាមុន ដែលជាហេតុត្រូវឱ្យមានការត្រួតពិនិត្យតាមដានជាប្រចាំ។ បម្រែបម្រួលអាកាសធាតុ មិនត្រឹមតែបង្កើនកម្តៅនោះទេ សូម្បីខ្យល់ក៏មានការប្រែប្រួលដែរ ប៉ុន្តែពេលខ្លះពុំអាចដឹងដោយការមើលឃើញនឹងភ្នែក ឬដឹងភ្លាមៗដូចកម្តៅ ដែលជាហេតុត្រូវការតាមដានពិនិត្យមើលសន្ទស្សន៍ ឬប្រភេទគុណភាពខ្យល់ ជាពិសេសនៅពេលមានភ្លើងឆេះព្រៃ មានការបង្ហុយផ្សែងពីមជ្ឈដ្ឋានណាមួយ។

៣. ប្រឹក្សាជាមួយគ្រូពេទ្យ ឬអ្នកជំនាញផ្នែកកុមារតូច ៖ បន្ទាប់ពីយកចិត្តទុកដាក់ការពារ ជាបឋមដោយខ្លួនឯងហើយ ប៉ុន្តែសុខភាពកុមារ នៅតែមិនប្រក្រតី ឬមិនស្រួលខ្លួន មិនថាការធ្លាក់ចុះនៃសុខភាពផ្លូវកាយ ឬផ្លូវចិត្តនោះទេ សូមទៅជួបជាមួយអ្នកជំនាញផ្នែកកុមារតូច ឬប្រឹក្សាជាមួយគ្រូពេទ្យដែលនៅជិតជាមុន៕