សាកលវិទ្យាល័យវិទ្យាសាស្ត្រសុខាភិបាល (ស.វ.ស) ប្រកាសផ្ដល់មូលនិធិសម្រាប់ការស្រាវជ្រាវដែលទាក់ទងនឹងប្រធានបទជំងឺមហារីក សម្រាប់ឆ្នាំ ២០២៥-២០២៦ ដោយផ្ដល់ថវិកាអតិបរមា បីពាន់ដុល្លារអាមេរិក សម្រាប់មួយគម្រោង មានរយៈពេលមួយឆ្នាំ។

ការផ្ដល់មូលនិធិសម្រាប់ការស្រាវជ្រាវដែលទាក់ទងនឹងប្រធានបទជំងឺមហារីកនេះ ក្នុងគោលបំណងដើម្បីគាំទ្រដល់ការស្រាវជ្រាវថ្មីៗប្រកបដោយភាពច្នៃប្រឌិត ចម្រុះវិធីសាស្ត្រ ដែលមានសក្តានុពលក្នុងការទទួលបានជំនួយថវិកាពីប្រភពខាងក្រៅ ឬសម្រេចបាននូវលទ្ធផលវិទ្យាសាស្ត្រ ដ៏មានអត្ថប្រយោជន៍នៅសាកលវិទ្យាល័យវិទ្យាសាស្ត្រសុខាភិបាល។

លក្ខខណ្ឌសម្រាប់ការជ្រើសរើស ៖ ជាគ្រូពេញម៉ោង ឬវេលាកាល មកពីគ្រប់មហាវិទ្យាល័យ ផ្នែកទាំងអស់ នៃសាកលវិទ្យាល័យវិទ្យាសាស្ត្រសុខាភិបាល ឬជាមន្ត្រី បុគ្គលិក នៃសាកលវិទ្យាល័យវិទ្យាសាស្ត្រសុខាភិបាល។ លើកទឹកចិត្តក្នុងការរៀបចំគម្រោងស្រាវជ្រាវដែលមានលក្ខណៈជាអន្តរប្រធានបទ (interdisciplinary) ឬគម្រោងស្រាវជ្រាវដែលមានកិច្ចសហប្រតិបត្តិការរវាងជំនាញផ្សេងៗដែលពាក់ព័ន្ធ (collaborative project)។

ការស្រាវជ្រាវដែលត្រូវបានផ្ដល់អាទិភាព រួមមាន ៖ ស្រាវជ្រាវគ្លីនិកពាក់ព័ន្ធនឹងជំងឺមហារីក (Cirical research on cancer)​ និងស្រាវជ្រាវអំពីអេពីដេមីសាស្ត្រនៃជំងឺមហារីក (Epidemiological research on cancer)។

បេក្ខជន បេក្ខនារី ដែលមានបំណងចូលរួមក្នុងការលើកគម្រោងស្រាវជ្រាវដើម្បីទទួលបានមូលនិធិនេះត្រូវដាក់ពាក្យស្នើសុំនិងភ្ជាប់ជាមួយ គម្រោងសិក្សាស្រាវជ្រាវពេញលេញ (Ful Proposal) ដែលរៀបចំតាមទម្រង់រួមមាន ៖ ក្របមុខដែលមានចំណងជើង, រយៈពេលនៃការអនុវត្តគម្រោង និងឈ្មោះក្រុមស្រាវជ្រាវ, សេចក្តីសង្ខេបគម្រោង (Abstract) ៖ ចំនួន ៣៥០ ពាក្យជាភាសារអង់គ្លេស + Proposal (យ៉ាងច្រើន ១០ ទំព័រ) រួមបញ្ចូលទាំង Background and rationale, Specific aims and novel contributions, Methodology, Expected outcomes and impact, Timeline and roles of team members, References, ប្រវត្តិរូបរបស់អ្នកស្រាវជ្រាវបង្គោល, ឯកសារផ្សេងៗដែលចាំបាច់ (ឧទាហរណ៍ វិធីសាស្ត្រស្រាវជ្រាវ, គម្រោងផែនការនៃការគ្រប់គ្រងទិន្នន័យ) និងទទួលបានការអនុម័តយល់ព្រមពីប្រធាន ឬព្រឹទ្ធបុរស មុនពេលដាក់ស្នើ។

សម្រាប់ ផែនការថវិកា (Budget Plan)៖ ត្រូវផ្ដល់ផែនការថវិកាលម្អិតក្នុងទម្រង់ជា Excel រួមមាន ការរៀបចំសរសេរគម្រោង (Proposal development), សម្ភារៈផ្សេងៗសម្រាប់អនុវត្តគម្រោង (Equipment and supplies), ការធ្វើដំណើរសម្រាប់ការចុះប្រមូលទិន្នន័យ (Travel for data collection ), ការចំណាយលើសេវាមន្ទីរពិសោធន៍ (Laboratory services), ការសំអាតនិងវិភាគទិន្នន័យ ឬការសរសេរបាយការណ៍របស់គម្រោង (Data management and analysis/Report writing), ការចំណាយសម្រាប់ការបោះពុម្ភផ្សាយ (Publication less )។

រាល់ការកែប្រែផ្សេងៗទាក់ទងនឹងគម្រោងថវិកា ឬគោលបំណងនៃគម្រោងស្រាវជ្រាវ ដែលបានអនុម័តពី ស.វ.ស ត្រូវមានការអនុម័តលើការកែប្រែជាលាយលក្ខណ៍អក្សរ។ អ្នកស្រាវជ្រាវនឹងគោរពតាមគោលការណ៍ក្រមសីលធម៌ និងបទបញ្ហាទាំងអស់ដែលពាក់ព័ន្ធ។ ចំណាំ៖ មិនមានផ្តល់បៀវត្សរ៍ ជូនក្រុមអ្នកស្រាវជ្រាវនោះទេ។

ការដាក់ពាក្យស្នើដែលយឺត ឬមិនពេញលេញនឹងមិនត្រូវបានទទួលការពិនិត្យឡើយ។ ដាក់ពាក្យស្នើសុំ និងសួរព័ត៌មានបន្ថែម តាមរយៈអ៊ីម៉ែល៖ research.seed.grant@uhs.edu.kh ។ ទទួលពាក្យ ចាប់ពីថ្ងៃជូនដំណឹងនេះ រហូតដល់ ថ្ងៃទី៣០ ខែឧសភា ឆ្នាំ២០២៥ វេលាម៉ោង ១៧និង០០ នាទី ជាកំហិត៕