ក្រុមម្ចាស់ជ័យលាភីលេខ១ នៃការប្រកួតគំនិតស្ថាបត្យកម្ម លើប្រធានបទ “លំនៅដ្ឋានមានតម្លៃសមរម្យ” ដែលសុទ្ធសឹងតែជាស្ថាបត្យករវ័យក្មេង បានបង្ហាញពីគំនិត​ដ៏​គួរ​ឱ្យ​ចាប់អារម្មណ៍ ក្នុងការ​សង់លំនៅដ្ឋាន​តម្លៃសមរម្យ ដោយ​បានគិត​ទៅ​ដល់ផាសុកភាពរបស់អ្នករស់នៅ បរិស្ថានបៃតង ការ​រស់នៅជាសហគមន៍ ព្រមជាមួយ​តម្លៃដ៏សមរម្យដោយគិតគូរ​ដល់​អ្នក​មានជីវភាព​សមរម្យ និងជីវភាព​កម្រិតទាប។

កញ្ញា កែន មណីនាថ និស្សិតស្ថាបត្យកម្ម មកពី​សាកលវិទ្យាល័យលីមកុកវីង ជាសមាជិកក្រុម​និយាយថា សម្រាប់គម្រោងលំនៅឋានតម្លៃសមរម្យនេះ ក្រុមរបស់ខ្លួន​បាន​ឱ្យ​ឈ្មោះថា The Belong House ។ គម្រោង​នេះ គឺផ្ទះមានតម្លៃតែត្រឹម ៣ម៉ឺនដុល្លារប៉ុណ្ណោះ ដោយ​បានគិតគូរទាំងសម្ភារៈ កម្លាំងពលកម្ម ដី និងលក្ខណៈរបស់ទីផ្សារ។ មណីនាថ បញ្ជាក់ថា គោលគំនិតសំខាន់ក្នុងគម្រោងលំនៅឋាននេះមានចំនួន ៥ រួមមាន ៖ ១.ការរស់នៅប្រកបដោយផាសុកភាព, ២.ការគិតលើលំហ និងតម្លៃ, ៣.ភាពយូរអង្វែង, ៤.ការរស់នៅជាសហគមន៍ និង ៥.វប្បធម៌ និងស្ថាបត្យកម្មខ្មែរ។

ដោយឡែកបើនិយាយពីលក្ខណៈពិសេសរបស់ផ្ទះនេះ គឺធ្វើនៅលើដីឡូត៍ដែលមានប្រវែង ៩គុណនឹង២០ម៉ែត្រ ហើយរក្សាទុកដីឱ្យនៅសល់ ៥គុណនឹង៤ម៉ែត្រ ក្នុងនោះលំហខាងមុខមានប្រវែង៥ម៉ែត្រ លំហខាងក្រោយ៤ម៉ែត្រ និងលំហសងខាង២ម៉ែត្រ។ ផ្ទះនេះបានបែងចែកចេញជា២ជាន់ ដោយជាន់ខាងក្រោមជាលំហទូលាយ និងជាន់ខាងលើជាបន្ទប់សម្រាប់រស់នៅ។ លើសពីនេះ ក៏បានសិក្សាទៅលើអាកាសធាតុដើម្បីឱ្យមានខ្យល់ចេញចូលទៅក្នុងផ្ទះផងដែរ។

លោក អាង ម៉េងលាង និស្សិតផ្នែកស្ថាបត្យកម្ម នៃវិទ្យាស្ថានស៊ីតិក ជាសមាជិកក្រុម បានបន្ថែមថា គំនិតនៃការរចនាលំនៅឋានតម្លៃសមរម្យនេះ គឺរៀបចំយ៉ាងណាឱ្យគ្រួសារផ្សារភ្ជាប់ទំនាក់ទំនងគ្នាបានល្អ ហើយ​ជាមួយ​គ្នា​លំនៅឋាននេះ​ ក៏ផ្ដល់ភាពងាយស្រួលក្នុងការបង្កើតអាជីវកម្មខ្នាតតូច ឬពង្រីកអាជីវកម្ម ក៏ដូចជាការកែលម្អបន្ថែមនាពេលអនាគត។

ចំពោះការ​គិតគូរពីបរិស្ថាន លំនៅឋាន​តម្លៃសមរម្យនេះ ​បានរចនាឱ្យមានលំហបៃតងនៅជុំវិញផ្ទះ ផ្ដល់ជាកន្លែងដាំដំណាំហូបផ្លែផ្សេងៗ ដែលជាផ្នែកជួយសន្សំសំចៃថវិកា ហើយ​នៅ​ផ្នែកខាងក្នុងផ្ទះប្រើបង្អួច និងទ្វារកញ្ចក់បត់បាន និងមានកម្ពស់ខ្ពស់ ដើម្បីឱ្យសមាជិកគ្រួសារងាយស្រួលនិយាយទាក់ទងគ្នា។

បើនិយាយអំពីតួផ្ទះវិញ ផ្ទះតម្លៃសមរម្យនេះ នៅផ្នែកជាន់ខាងក្រោមត្រូវ​បាន​រៀបចំឱ្យមានផ្ទះបាយនៅខាងក្រោយ ដោយកាត់ផ្ដាច់ពីបន្ទប់ទឹកមួយទៀត ដើម្បីកាត់បន្ថយផ្សែង និងក្លិនរំខាន។ ចំណែកនៅជាន់ខាងលើ ជាបន្ទប់មេគ្រួសារមានទីតាំងនៅខាងមុខ និងមានរានហាល ដើម្បីភ្ជាប់ជាមួយធម្មជាតិ និងមានបន្ទប់ទឹកនៅចំណុចកណ្ដាល។ សម្រាប់បន្ទប់កូនៗត្រូវ​បានរចនា​ឱ្យ​នៅខាងក្រោយ មានតុរៀនដែលភ្ជាប់ជាមួយធម្មជាតិ។

យ៉ាងណាក៏ដោយ បើតាមប្រសាសន៍​របស់ ឯកឧត្តម ប៉ែន សុផល រដ្ឋលេខាធិការក្រសួងដែនដី នគរូបនីយកម្ម និងសំណង់ លំនៅឋាន ជាកត្តាសុភមង្គល ដូច្នេះស្ថាបត្យករត្រូវធ្វើយ៉ាងណាដើម្បីជួយសម្រួលដល់ការរស់នៅរបស់ប្រជាជនទូទៅ ដោយគិតទាំងបរិស្ថានជុំវិញ និងតម្លៃសមរម្យ។

គួរជំរាបជូនថា ការប្រកួត​លើការសិក្សាប្លង់ស្ថាបត្យកម្មលំនៅដ្ឋានដែលមានតម្លៃសមរម្យ បានធ្វើឡើង​កាលពីកំឡុង​ខែសីហាកន្លងទៅថ្មីៗនេះ ដោយផ្តោត​ទៅលើទស្សនៈសុខដុមរមនាបុរីជនបទ បរិយាបន្ន សុខុមាលភាព នវានុវត្ដន៍ និងបរិយាកាសរស់នៅដ៏ល្អត្រកាល។ ការប្រកួតនេះគាំទ្រ​ដោយ​ក្រសួងរៀបចំដែនដី នគរូបនីយកម្ម និងសំណង់៕