ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នេះជាបទពិសោធន៍ផ្លាស់ប្តូរការសិក្សាលើកដំបូងរបស់កញ្ញា សន សុវណ្ណកាអូរី ដែលបានចំណាយពេលវេលាស្ទើរតែកន្លះឆ្នាំ ទៅសិក្សានៅប្រទេសជប៉ុនតាមរយៈអាហារូបករណ៍រដ្ឋាភិបាលជប៉ុនក្នុងគម្រោងអាស៊ីកាកេហាស៊ី (Asia Kakehashi) ហើយបទពិសោធន៍ទាំងនោះបានជួយយុវតី សុវណ្ណកាអូរី យ៉ាងច្រើនទាំងការសិក្សា និងការរស់នៅប្រចាំថ្ងៃ។
“នៅទីនោះ (ប្រទេសជប៉ុន) វាមិនដូចជានៅផ្ទះរបស់យើងដែលចង់ចចេស រឹងរូស ឬធ្វើអ្វីតាមចិត្តនោះទេ។ ខ្ញុំបានរៀនបត់បែន រៀនមើលចិត្តមនុស្សថា គេនោះចង់បានអ្វីហើយខ្ញុំគួរធ្វើបែបណា ! រីឯសីលធម៌ផ្ទាល់ខ្លួនវិញ ខ្ញុំក៏ត្រូវចេះបន្ទន់អាកប្បកិរិយាទៅតាមប្រភេទមនុស្សដែលខ្ញុំបានជួបផងដែរ”
កញ្ញា សន សុវណ្ណកាអូរី បាននិយាយដូច្នេះនៅពេលដែល AMS បានសួរនាំពីបទពិសោធន៍ផ្លាស់ប្តូរការសិក្សារយៈពេលបួនខែរស់នៅប្រទេសជប៉ុន។ សីលធម៌ផ្ទាល់ខ្លួន និងរបៀបរៀបចំខ្លួនឱ្យសមស្របទៅតាមកាលទេស: ជាអ្វីដែលយុវតីកម្ពុជារូបនេះទទួលបាន និងបានអនុវត្តន៍រហូតក្លាយជាទម្លាប់។
យុវតី សុវណ្ណកាអូរី បានបន្តថា នៅប្រទេសជប៉ុនប្រជាជនមានទម្លាប់គោរពពេលវេលាទៀងទាត់បំផុត ហើយរបៀបរស់នៅគោរពពេលវេលានេះបានជះឥទ្ធិពលយ៉ាងខ្លាំងដល់ដំណើរជីវិតរបស់កញ្ញា។ យុវតីវ័យ ១៧ឆ្នាំរូបនេះ បានរៀបរាប់ថា សិស្សជប៉ុនក្រៅគោរពពេលវេលា ចូលចិត្តស្រាវជ្រាវ និងយល់ដឹងពីបរិស្ថានរស់នៅខាងក្រៅបានទូលំទូលាយ។ ពួកគេមិនរៀនក្នុងសៀវភៅតែមួយមុខនោះទេ ព្រមទាំងតាំងចិត្តខ្ពស់ដើម្បីសម្រេចបំណងប្រាថ្នាអ្វីមួយ។
កញ្ញា សន សុវណ្ណកាអូរី
“ខ្ញុំបានចាប់អារម្មណ៍ពាក្យស្លោករបស់សាលានៅប្រទេសជប៉ុន គេសរសេរថា “Serious Challenge” ដែលមានន័យថា យើងត្រូវតែមានឆន្ទ:មោះមុតចំពោះអ្វីដែលយើងចង់បាន ដោយគិតថាវាជាការប្រកួតប្រជែងមួយដែលយើងត្រូវតែយកឈ្នះឱ្យបាន”
ក្នុងដំណើរផ្លាស់ប្តូរបទពិសោធន៍សិក្សា សុវណ្ណកាអូរី មិនត្រឹមតែបានរៀនសូត្រពីវប្បធម៌និងការរស់នៅរបស់ជនជាតិជប៉ុនប៉ុណ្ណោះទេ ថែមទាំងបានបង្ហាញពីវប្បធម៌កម្ពុជាឱ្យប្រជាជនជប៉ុនបានស្គាល់ទៀតផងដែរ។ តាមរយៈការផ្លាស់ប្តូរការសិក្សានេះ សុវណ្ណកាអូរី បានក្លាយទៅជាតំណាងកម្មវិធី Hiroshima Junior International Forum ជាកម្មវិធីមួយរបស់ជប៉ុន ដែលទាក់ទងនឹងការផ្សព្វផ្សាយអំពីសន្តិភាពពិភពលោក។
និយាយពីឈ្មោះ សុវណ្ណកាអូរី ស្រដៀងនឹងឈ្មោះជនជាតិជប៉ុន ប៉ុន្តែកាអូរីបានបង្ហើបប្រាប់ថា ខ្លួនជាកូនអ្នកភ្នំពេញ មានដើមកំណើតខ្មែរសុទ្ធសាធ និងទើបតែរៀនភាសាជប៉ុនបានប្រហែលពីរឆ្នាំប៉ុណ្ណោះ។ ថ្វីត្បិតកញ្ញាធ្លាប់រៀនភាសាជប៉ុន និងចេះនិយាយភាសាជប៉ុនពិតមែន ដោយសារការអនុវត្តភាសាផ្ទាល់ជាមួយជនជាតិជប៉ុនខុសគ្នាពីការសិក្សានៅសាលា។ សម្រាប់កញ្ញា សុវណ្ណកាអូរី ការលំបាកផ្នែកភាសាខ្លះៗមិនមែនជាឧបសគ្គខ្លាំងនោះទេ។
កញ្ញា សន សុវណ្ណកាអូរី
“ខ្ញុំបានបំពេញគ្រប់បំណងប្រាថ្នាខ្លួនឯងដែលចង់ផ្លាស់ប្ដូរការសិក្សា វាជាជោគជ័យមួយសម្រាប់ខ្លួនឯង និងមោទនភាពជូនគ្រួសារ។ ខ្ញុំចង់ឱ្យប្រជាជនលើពិភពលោកស្គាល់ពីប្រទេសខ្មែរឱ្យបានទូលំទូលាយ។ ជនជាតិជប៉ុននិយាយថា “ខ្ញុំមិនស្គាល់ពីខ្មែរទេ” ពាក្យទាំងនេះធ្វើឱ្យខ្ញុំកាន់តែចង់បង្ហាញពួកគាត់ពីអរិយធម៌ខ្មែរទៅកាន់ពួកគាត់”
កញ្ញា សន សុវណ្ណកាអូរី ជាសិស្សថ្នាក់ទី១១ នៃវិទ្យាល័យទឹកល្អក់ រាជធានីភ្នំពេញ បានផ្លាស់ប្តូរការសិក្សាតាមរយៈអាហារូបករណ៍គម្រោងអាស៊ីកាកេហាស៊ី ទៅកោះហុកកៃដូ ប្រទេសជប៉ុន កាលចុងខែតុលា ឆ្នាំ២០២០។ ដំណើរសិក្សានេះត្រូវបានយកចិត្តទុកដាក់ពីភាគីពាក់ព័ន្ធ មានគាំទ្រលើកទឹកចិត្តពីក្រុមគ្រួសារ និងមិត្តភក្តិ។
យុវតីសម្តីស្រទន់ សន សុវណ្ណកាអូរី បានចែករំលែកមុននឹងបញ្ចប់កិច្ចសន្ទនាថា ការផ្លាស់ប្តូរកម្មវិធីសិក្សាទៅក្រៅប្រទេសជាមិនមែនឱកាសដើរលេងកម្សាន្ត ឬជាពេលវេលាសប្បាយរីករាយនោះទេ។ ផ្ទុយទៅវិញមានបញ្ហាប្រឈមជាច្រើនដែលយុវជនត្រូវរកដំណោះស្រាយ។ “ក្នុងនាមជាយុវជនមានឱកាសច្រើនណាស់ដើម្បីចូលរួមចំណែកបង្ហាញពីកម្ពុជាទៅកាន់ពិភពលោក តាមរយៈការផ្លាស់ប្តូរកម្មវិធីសិក្សាទៅក្រៅប្រទេស”៕
ជីវប្រវត្តិ: កញ្ញា សៅ សុធារ៉ា កំពុងសិក្សាផ្នែកប្រព័ន្ធផ្សព្វផ្សាយនិងសារគមនាគមន៍ នៅសាកលវិទ្យាល័យភូមិន្ទភ្នំពេញ។ កញ្ញាធ្លាប់ជាអ្នកសរសេរអត្ថបទជាភាសាខ្មែរ និងបកប្រែឲ្យស្ថាប័នឯកជនមួយកន្លែង។ បច្ចុប្បន្ន សុធារ៉ា ជាអ្នកយកការព័ត៌មានអប់រំឲ្យសារព័ត៌មាន AMS Education។
របាយការណ៍សំខាន់
ព័ត៌មានទូទៅ
អ្នកជំនាញខ្មែរ និងអាល្លឺម៉ង់ រួមគ្នារកដំណោះស្រាយបញ្ហាកម្ដៅ ដើម្បីបង្កើនផាសុកភាពទីក្រុងភ្នំពេញ
“AI មិនត្រូវធ្វើឱ្យមនុស្សគិតដូចម៉ាស៊ីនទេ” អ្នកជំនាញអំពាវនាវឱ្យលើកកម្ពស់ សតិ បញ្ញា និងករុណា
កម្ពុជា-ឡាវ គ្រោងចុះ MoU ពង្រីកកិច្ចសហប្រតិបត្តិការលើវិស័យអប់រំ
វិធីសាស្ត្រទាំង ៩ ដែលឪពុកម្តាយគួរប្រើ ដើម្បីគ្រប់គ្រងការមើលទូរស័ព្ទរបស់កូនៗ
រៀនជំនាញបច្ចេកទេស ១៣ជំនាញ ឥតគិតថ្លៃ នៅវិទ្យាស្ថានពហុបច្ចេកទេសខេត្តកំពង់ឆ្នាំង
ជប៉ុន ផ្តល់ហិរញ្ញប្បទានឥតសំណងជាង ៤លានយ៉េន លើគម្រោងអាហារូបករណ៍ JDS
អង់គ្លេសសាកល្បងនាំប្រព័ន្ធ Efekta ដើរដោយ AI មកអនុវត្តនៅកម្ពុជា ដើម្បីបង្កើនសមត្ថភាពភាសាអង់គ្លេសរបស់សិស្សានុសិស្ស និងគ្រូបង្រៀន
នេប៉ាល់ចេញច្បាប់ថ្មី ៖ ហាមសាលារៀនបង្ខំសិស្សឱ្យកាត់សក់
លោកជំទាវ គឹម សេដ្ឋានី ៖ “ការវិនិយោគលើកុមារតូចនៅថ្ងៃនេះ គឺជាការកសាងគ្រឹះសម្រាប់សន្តិសុខ និងសេដ្ឋកិច្ចជាតិនៅថ្ងៃស្អែក”
ស្វ័យសិក្សា ជំនាញតែមួយគត់ដែលជួយឱ្យយុវជនបោះជំហានទៅមុខជានិច្ច
កម្មវិធីពិសេសរបស់ AMS EDUCATION
ព័ត៌មានសង្ខេប
