គោលដៅ ឬផែនការអាជីពការងារ មានសារៈសំខាន់ក្នុងការសម្រួចសេចក្ដីប៉ងប្រាថ្នា ការប្រើប្រាស់សមត្ថភាព ឬការសម្រួចជំនាញនីមួយៗ ។ សម្រាប់និស្សិតដែលកំពុងត្រៀមបញ្ចប់ការសិក្សា ឬយុវវ័យកំពុងស្វែងរកឱកាសការងារ គួរតែចាប់ផ្តើមកំណត់នូវគោលដៅក្នុងការចាប់យកប្រភេទការងារពេលអនាគត។ នេះជាប្រសាសន៍របស់ អ្នកស្រី គីម តាន់ ជាស្ថាបនិក និងនាយកប្រតិបត្តិ នៃក្រុមហ៊ុន Grow4growth Consultant ។

ការចាប់ផ្តើមការងារ   

បើតាមអ្នកស្រី គីម តាន់ ស្ថិតក្នុងវ័យ នៃការចាប់ផ្តើមអាជីពការងារ និងការស្វែងរកសក្តានុពលខ្លួនឯង អ្នកស្រីលើកទឹកចិត្តឱ្យយុវជន បន្សាំខ្លួនជាមួយមជ្ឈដ្ឋានដែលមានភាពចម្រុះគ្នា ចូលរួមកម្មវិធីដែលមានលក្ខណៈប្លែកៗគ្នាពីមួយទៅមួយ បន្ទាប់មកចាប់យកឱកាសនេះដាក់ចិត្តរៀនសូត្រ ចែករំលែក និងកសាងទំនាក់ទំនងជាមួយមនុស្សដែលបានជួប។ ទន្ទឹមគ្នានោះ ការប្រើប្រាស់បណ្តាញសង្គម ឬក៏បច្ចេកវិទ្យាក្នុងការអភិវឌ្ឍសមត្ថភាព និងការពង្រឹងកេរ្តិ៍ឈ្មោះ សុទ្ធសឹងតែ ជាការរួមចំណែកដំណើរនៃការចាប់ផ្តើមការងារដំបូងៗ។

កត្តាប្រឈម និងដំណោះស្រាយ នៅពេលដាក់ពាក្យធ្វើការងារ ចំពោះបុគ្គលខ្លួនឯងផ្ទាល់ គួរប្រកាន់យកនូវទំនួលខុសត្រូវក្នុងនាមជានិយោជិត។ ប្រសិនបើក្រុមហ៊ុន ឬនិយោជកផ្តល់នូវទំនុកចិត្ត និយោជិតត្រូវផ្តល់មកវិញនូវទំនួលខុសត្រូវ។ ទន្ទឹមគ្នានោះ ត្រូវមានការស្រាវជ្រាវបន្ថែមជាប្រចាំពាក់ព័ន្ធនឹងវិស័យដែលកំពុងធ្វើ ឬចង់ធ្វើនៅពេលខាងមុខ។

អ្នកស្រី គីម តាន់

ចំពោះអ្នកមានបំណងបង្កើតក្រុមហ៊ុនផ្ទាល់ខ្លួន ការធ្វើអាជីវកម្ម មិនមែនផ្តោតទៅលើតែប្រាក់ចំណូល និងប្រាក់ចំណេញនោះទេ ប៉ុន្តែមានការគិតគូរអំពីផលវិជ្ជមាន និងដឹងអំពីអ្វីទៅជាសក្តដានុពល និងអ្វីដែលយើងមានបំណងគាំទ្រ។

ការរៀនសូត្រពេញមួយជីវិតពន្លឿនអាជីពការងារ

លោក Josep Font Rodendo ប្រធាននាយកដ្ឋានផ្នែកលក់ និងអ្នកគ្រប់គ្រងក្នុងតំបន់ទ្វីបអាស៊ី នៃ NCT Consultants បានណែនាំឱ្យយុវជន ឬយុវវ័យក្មេងៗ ដែលកំពុងសិក្សានៅមហាវិទ្យាល័យ ឬកំពុងត្រៀមខ្លួនជាមួយនឹងការចេញប្រឡូកជាមួយការងារ កុំបោះបង់ការរៀនសូត្រ ការអភិវឌ្ឍសមត្ថភាព ពោលគឺការរៀនសូត្រពេញមួយជីវិត។ លោកបានរំលេចអំពីអ្វីទៅជាការរៀនក្នុងរយៈពេលវែង ឬការរៀនសូត្រពេញមួយេជីវិតថា ដរាបណានៅមានជីវិត គឺជាការបន្តប្រឹងប្រែងក្រេបចំណេះជាប់ជានិច្ច ក្រៅពីរៀនបន្ថែមថ្មីៗ ត្រូវរំលឹកខ្លួនឯងឱ្យបានជារឿយៗ រួមទាំងសកម្មភាពនៃការអាន។ ហើយការអានទៀតសោត គឺអានទាំងសៀវភៅ និងព័ត៌មាន ក៏ដូចជា តាមដានព្រឹត្តិការណ៍សំខាន់ៗ ក្នុងសង្គមជាប្រចាំ តាមរយៈបណ្តាញសង្គម និងប្រព័ន្ធបច្ចេកវិទ្យាទំនើបមួយចំនួន។

ជាមួយគ្នានោះលោក Soun Satya អ្នកគ្រប់គ្រងការទិញ នៃ ក្រុមហ៊ុន DKSH បន្ថែមថា ការរៀនសូត្រ មិនមែនគ្រាន់តែជាការស្រូបយកព័ត៌មានតែប៉ុណ្ណោះទេ ប៉ុន្តែវាក៏ជាការមានសមត្ថភាព គិតវិភាគឱ្យបានស៊ីជម្រៅដូចគ្នា។ ដោយឡែក ការត្រៀមខ្លួនទៅក្នុងអាជីពការងារដំបូងៗ គួរអនុញ្ញាតិ​ឱ្យខ្លួនឯងមានការសាកល្បងចំពោះប្រភេទការងារដែលមានលក្ខណៈខុសប្លែកគ្នា មិនថាវិស័យបច្ចេកវិទ្យា ការធ្វើអាជីកម្ម និងជំនួញផ្សេងៗ គឺហ៊ានសាកល្បងជាមុនសិន។​ ក្រោយរកឃើញអ្វីដែលខ្លួនពិតជាចង់បាន បន្ទាប់មកធ្វើផែនការនៃការងារដែលខ្លួនត្រូវការ និងពុះបំបែកទៅជាសកម្មភាពដែលអាចធ្វើបាននៅក្នុងជីវិតជាក់ស្តែង និងត្រៀមខ្លួនឱ្យបានរួចរាល់ក្នុងការចាប់ផ្តើមការងារ។

ការជ្រើសការងារផ្តោតលើអ្វីដែលមានន័យទៅកាន់ខ្លួនឯង មានទស្សនៈវិស័យច្បាស់លាស់ នៃអាជីពដែលជ្រើសរើស ហើយត្រូវប្រាកដថា កិច្ចការទាំងនោះបានផ្តល់ជាផលវិជ្ជមានទៅកាន់ខ្លួន​ឯង និងសង្គមជាតិ។

លោក Soun Satya មានតួនាទី គ្រប់គ្រងការទិញ នៃ ក្រុមហ៊ុន DKSH

លោក  Dr. Ng Tek Ming ព្រឹទ្ធបុរសនៃនាយកដ្ឋានបច្ចេកវិទ្យាឌីជីថល នៃសាកលវិទ្យាល័យអាមេរិកាំងភ្នំពេញ (AUPP)  បន្ថែមចំពោះការ​ប្រកបអាជីពការងាររបស់យុវជនក្នុង​ការប្រើប្រាស់ ប្រព័ន្ធបច្ចេកវិទ្យា ឬការប្រើប្រាស់​ AI ដោយថា AI  ផ្តល់ទាំងផលវិជ្ជមាន និងអវិជ្ជមាន ក្នុងការសិក្សា និងការធ្វើការ។ តែយ៉ាងណា លោកបានផ្តល់ជាដំបូន្មានថា AI គឺជាឧបករណ៍ដែលបង្កើតឡើងដោយមនុស្ស និងមានភាពល្បីល្បាញក្នុងពេលបច្ចុប្បន្ននេះ ដូច្នេះមុននឹងប្រើប្រាស់ត្រូវដាក់សំណួរចំពោះខ្លួនឯងជាមុនថា តើចង់រៀនអំពីអ្វី ? យកAI ជាឧបករណ៍ក្នុងការជំនួយ ជំនួសឱ្យការប្រើប្រាស់យកជាលទ្ធផលចុងក្រាយ និងបង្កើតសមត្ថភាព នៃការប្រើប្រាស់ប្រកបដោយភាពបត់បែន៕