ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យោងតាម លោកស្រី Li-Huei Tsai សាស្ត្រាចារ្យផ្នែកប្រព័ន្ធប្រសាទ ដែលផ្ដោតលើជំងឺភ្លេចភ្លាំង នៃវិទ្យាស្ថានបច្ចេកវិទ្យាម៉ាសាជូសេត (MIT) និងជានាយកនៃវិទ្យាស្ថាន The Picower Institute for Learning and Memory បានលើកឡើងថា គន្លឹះធ្វើឱ្យមុខងារខួរក្បាលមានសុខភាពល្អ និងមានសមត្ថភាពចងចាំខ្លាំង នៅវ័យចាស់មិនមានអាថ៌កំបាំងនោះទេ។
សាស្ត្រារូបនេះបន្ថែមថា ចំពោះការណែនាំរបស់អ្នកជំនាញទូទៅវិញ ដើម្បីធ្វើឱ្យមុខងារចងចាំរបស់ខួរក្បាលមានសុខភាពល្អ យើងត្រូវធ្វើលំហាត់ប្រាណជាប្រចាំ មានទំនាក់ទំនងល្អក្នុងសង្គម និងមានរបបអាហារត្រឹមត្រូវ ប៉ុន្តែអ្វីដែលពិបាកនោះ គឺការអនុវត្តទម្លាប់ទាំងនេះឱ្យបានជាប់លាប់ និងការគោរពវិន័យដែលខ្លួនឯងបានកំណត់ បើទោះមានឧបសគ្គក៏ដោយ។
ទន្ទឹមនឹងនេះ ការសិក្សាថ្មីមួយ ដែលត្រូវបានចេញផ្សាយនៅលើ BMJ ដែលបានតាមដានមនុស្សជិត ៣ម៉ឺននាក់ក្នុងប្រទេសចិនអស់រយៈពេល ១០ឆ្នាំ បានរកឃើញថា ការមានទម្លាប់រស់នៅល្អ គឺជាកត្តាសំខាន់បំផុត ដើម្បីពង្រឹងសមត្ថភាពចងចាំ។
អ្នកស្រាវជ្រាវជាច្រើន ក៏បានស្រាវជ្រាវរកឃើញកត្តាសំខាន់ៗដូចទៅនឹងការរកឃើញរបស់សាស្ត្រាចារ្យ Li-Huei Tsai ដែរ។ លទ្ធផលនៃការស្រាវជ្រាវទាំងនោះបានបញ្ជាក់ថា របបអាហារជំនួយសុខភាព លំហាត់ប្រាណទៀងទាត់ ទំនាក់ទំនងល្អក្នុងសង្គម សកម្មភាពដែលពង្រឹងមុខងារយល់ដឹងខួរក្បាល និងការជៀសវៀងការជក់បារី និងគ្រឿងស្រវឹង គឺសំខាន់បំផុតក្នុងការពង្រឹងមុខងារចងចាំរបស់ខួរក្បាល។
យ៉ាងណាមិញ សាស្ត្រាចារ្យ Li-Huei Tsai សង្កត់ធ្ងន់ថា បើទោះជាដឹងអំពីអ្វីដែលត្រូវធ្វើក៏ដោយ ប៉ុន្តែការអនុវត្តឱ្យបានខ្ជាប់ខ្ជួន និងការមានវិន័យលើខ្លួនឯងគឺសំខាន់បំផុត ប្រសិនបើអ្នកចង់មានសុខភាពខួរក្បាលល្អនៅវ័យចំណាស់៕
