ឆ្នាំថ្មីផ្តល់នូវក្ដីសង្ឃឹមថ្មី ដោមផ្តើមចេញពីខ្លួនឯង ហើយរឿងដែលអាចធ្វើបានគឺផ្តល់ឱកាសឱ្យខ្លួនឯងសាកល្បងសកម្មភាពថ្មីៗ ទៅរកមជ្ឈដ្ឋានថ្មីៗ។  ឆ្នាំចាស់បានបញ្ចប់ទៅ វាក៏ជាពេលវេលាដែលយើងត្រូវឆ្លុះបញ្ចាំងអំពីអ្វីដែលបានកើតឡើង ​​​​​​​​​​​​​​​​​​​​​​​​​​​​និងគិតអំពីសកម្មភាពដែលធ្វើឱ្យជីវិតយើងកាន់តែល្អប្រសើរ។ យោងតាមគេហទំព័រ onlymyhealth បានចែករំលែកគន្លឹះ១០ចំណុច ដើម្បីជំរុញឱ្យការរស់នៅឱ្យ​មានសុខុមាលភាព និងការរស់នៅកាន់តែប្រសើរជាងមុនសម្រាប់ឆ្នាំថ្មី។

១. ក្រោកពីគេងលឿន ៖ ការក្រោកពីគេងបានលឿនរហ័ស ផ្តល់អត្ថប្រយោជន៍ជាច្រើនចំពោះការចាប់ផ្តើមថ្ងៃថ្មី ហើយយើងនឹងមានឱកាសធ្វើកិច្ចការជាច្រើនក្នុងរយៈពេលពេញមួយថ្ងៃ។ យើងអាចចាប់ផ្តើមតាំងពីថ្ងៃដំបូង ដោយការអនុវត្តសន្សឹមៗ និងផ្តោតទៅលើការប្រើប្រាស់ពេលក្នុងមួយថ្ងៃពេញរបស់យើងឱ្យបានហ្មត់ចត់។ ក្រោកពីព្រលឹម វាមិនធ្វើឱ្យអ្នកមានអារម្មណ៍វិលវល់ ឬស្លន់សស្លោនៅពេលព្រឹកនោះឡើយ ដែលចំណុចនេះហើយ អាចជួយឱ្យអ្នកមានភាពស្ងប់ស្ងាត់ចំពោះស្ថានភាពផ្លូវចិត្ត និងរក្សាភាពនឹងធឹង។

២. ឆ្លុះបញ្ចាំង និងពិនិត្យខ្លួនឯង ៖ ស្ថិតក្នុងសភាពអ៊ូអរពេញមួយថ្ងៃ ពេលខ្លះយើងស្ទើរតែមិនបានដឹងពីអារម្មណ៍ជាក់ស្ដែង ដែលកំពុងតែកើតមាននោះទេ ដោយផ្តោតតែទៅលើភាពមមាញឹកជាមួយនឹងការងារជាច្រើនដែលត្រូវបំពេញមិនឈប់ឈរ។ ដូច្នេះទុកចន្លោះទម្លាក់រឿងដែលសំខាន់ៗទាំងអំបាលម៉ានទុកមួយដុំសិន ដើម្បីឆ្លុះបញ្ចាំងពីសមិទ្ធផលដែលសម្រេចកន្លងមក និងរៀបចំឱ្យបានប្រសើរជាងមុន ដោយការនៅជាមួយខ្លួនឯង ស្វែងយល់ពីខ្លួនឯងឱ្យបានច្រើន ស្វែងយល់អំពីទិសដៅ ដែលយើងប្រុងនឹងឆ្ពោះទៅមុខ ថា តើចង់ទៅចាប់ក្ដីស្រមៃបែបណា ប្រភេទណា និងកម្រិតណា ហើយយើងចង់ឱ្យរបត់ជីវិតនៅឆ្នាំខាងមុខមានការផ្លាស់ប្តូរអ្វីខ្លះ។ កាលដែលឆ្លុះបញ្ចាំងជាមួយខ្លួនឯង ប្រើពេលជាមួយខ្លួនឯង ជាវិធីម្យ៉ាងបញ្ចៀសការវិនិច្ឆ័យពីមជ្ឈដ្ឋានខាងក្រៅមកកាន់រូបយើង។ ដូច្នេះចំណុចសំខាន់ៗ ដែលត្រូវអនុវត្តន៍ គឺ ផ្តល់ភាពស្មោះត្រង់ជាមួយខ្លួនឯង ហើយព្យាយាមដកដង្ហើមឱ្យវែងៗ ធ្វើអារម្មណ៍ឱ្យស្រស់ស្រាយ ជាពិសេសស្វែងយល់ពីខ្លួនឯងឱ្យបានច្រើនជាងមុនតាមដែលអាចធ្វើបាន។

៣. បន្ថែមសកម្មភាពចលនារាងកាយ ៖ ការជំរុញនិងធ្វើឱ្យរាងកាយមានចលនាបានច្រើនជាងមុន គឺមានតែខ្លួនឯងម្នាក់ប៉ុណ្ណោះដែលមានលទ្ធភាពសម្រេច និងចាប់ផ្តើមអនុវត្តន៍នៅពេលណាក៏បាន តាមរយៈការរត់ ដើរ រាំ និងធ្វើលំហាត់ប្រាណជាដើម។ អ្នកអាចចាប់ផ្តើមតែម្នាក់ឯង ឬក៏ជាក្រុម គឺអាស្រ័យលើទំនោ និងស្ថានភាពផ្ទាល់ខ្លួន។ យ៉ាងណា ចូរធ្វើខ្លួនឱ្យមានភាពសកម្ម និងអនុវត្តន៍ឱ្យបានទៀងទាត់ ពីព្រោះរាងកាយមានចលនា ជួយឱ្យអរម៉ូនសុភមង្គលកាន់តែកើន ដែលវានឹងបង្កឱ្យមានភាពរីករាយ មានកម្លាំងជំរុញចិត្ត និងជួយឱ្យរាងកាយមានភាពស៊ាំ និងរឹងមាំ។

៤. ផ្តល់ភាពសំខាន់ចំពោះរបបអាហារល្អៗពេលព្រឹក ៖ អាហារដំបូងដែលចូលក្នុងរាងកាយមុនគេ គឺពេលព្រឹកនេះឯង អាហារពេលព្រឹកមានតួនាទីចម្បងក្នុងការផ្តល់ថាមពលពេញមួយថ្ងៃ។ ដូច្នេះការជ្រើសរើសរបបអាហាល្អវាពិតជាសំខាន់ខ្លាំងណាស់។

៥. រៀបចំកន្លែងរស់នៅ ៖ វាមិនស្រួលពេក ហើយក៏មិនពិបាកពេកដែរ តាមរយៈការសិក្សាមួយបានបង្ហាញថា បរិយាកាសជុំវិញខ្លួនយើង វាផ្តល់ផលប៉ះពាល់ទៅកាន់សុខភាពផ្លូវចិត្ត ខួរក្បាល ក៏ដូចជាផលិតភាព។ នៅពេលដែលកាត់បន្ថយសម្ភារៈដែលបង្កនូវភាពរញ៉េរញ៉ៃ និងមិនចាំបាច់ចោល នោះវាក៏ជាវិធីសាស្រ្តមួយជួយកាន់បន្ថយភាពតានតឹង តប់ប្រមល់ និងភាពច្របូកច្របល់ជាដើម។

៦. រក្សារាងកាយឱ្យមានជាតិទឹក ៖ នៅពេលដែលយើងពិសាកាហ្វេ ពេលខ្លះវាអាចបណ្តាលឱ្យភ្លេចបរិភោគទឹក ខណៈទឹកជាផ្នែកមួយសំខាន់ក្នុងការទ្រទ្រង់រាងកាយឱ្យមានសុខភាពល្អ និងប្រព័ន្ធសំខាន់ៗទាំងអស់នៃរាងកាយ។

៧. កំណត់ពេលគេងនិងអនាម័យកន្លែងគេង ៖ គេងបានគ្រប់គ្រាន់ និងគេងបានស្ងប់ជាទ្រព្យដ៏គាប់ប្រសើរមួយក្នុងស្ថានភាពដ៏មមាញឹកនេះ។ ផលជះពីការប្រើប្រាស់ប្រព័ន្ធផ្សព្វផ្សាយ បរិយាកាសដែលបង្កការរំខាន កាតព្វកិច្ចក្នុងសង្គម កាលកំណត់របស់ការងារនិងកិច្ចការផ្ទាល់ខ្លួន សុទ្ធសឹងតែ ជាហេតុផលដែលនាំឱ្យការគេងមិនទទួលបានភាពស្ងប់ស្ងាត់ល្អ។​ ប៉ុន្តែប្រសិនបើអ្នកបានរៀបចំវាឱ្យមានតុល្យភាព និងចេះចាត់អទិភាពទៅលើប្រភេទការងារនីមួយៗ វាគឺជាវិធីសាស្រ្តមួយជួយឱ្យការគេងមានគុណភាព។ ហើយនៅពេលទទួលទានដំណេកបានល្អនិងគ្រប់គ្រាន់ វាក៏ជួយជំរុញផលិតភាពនៅពេលបំពេញភារកិច្ចការរៀងរាល់ព្រឹកដែរ។

៨. ថែទាំខ្លួនឯង ៖ ការថែទាំខ្លួនឯង វាពាក់ព័ន្ធនឹងរាងកាយ ផ្លូវចិត្ត ស្ថានភាពសង្គម អារម្មណ៍ ការគិត សេដ្ឋកិច្ចហិរញ្ញវត្ថុ និងជាច្រើនផ្នែកទៀតនៃដំណើរជីវិត ដែលវាមិនត្រឹមតែការយល់អំពីខ្លួនឯងប៉ុណ្ណោះទេ ប៉ុន្តែការមានវិន័យ និងការយកចិត្តទុកដាក់អំពីការជំរុញចិត្ត ក៏ជាផ្នែកមួយនៃការថែទាំខ្លួនឯងដែរ។

៩. កំណត់ផែនការ និងអទិភាពកិច្ចការនីមួយៗ ៖ យើងអាចនឹងមានមោទកភាព នៅពេលមានការងារច្រើននៅក្នុងដៃ។ មានការងារច្រើនអាចធ្វើឱ្យអ្នកសប្បាយចិត្តនឹងធ្វើណាស់នៅពេលដំបូង ប៉ុន្តែបន្តបន្ទាប់មក វាក៏បង្កនូវផលវិបាកជាច្រើនដែលបង្កបានជាភាពហត់នឿយ និងភាពលើសលប់ក្នុងរយៈពេលវែង ហើយពេលខ្លះទៀត ក៏ធ្វើឱ្យខួរក្បាលមានភាពចុះខ្សោយផងដែរ។ ហើយបើបន្ត មិនកំណត់ផែនការ និងអាទិភាពនៃប្រភេទការងារនីមួយៗទេ នោះវានឹងប៉ះពាល់ទៅកាន់សុខភាពផ្លូវចិត្ត និងប៉ះពាល់ដល់ផលិតភាពទាំងការងារផ្ទាល់ខ្លួន និងអាជីពវិជ្ជាជីវៈផងដែរ។ ដូច្នេះហើយ ការកំណត់ប្រភេទការងារ រង់ចាំឱ្យបញ្ចប់មួយសិន សឹមបន្តចាប់ផ្តើមធ្វើមួយទៀតដោយការផ្តោត និងយកចិត្តទុកដាក់ វាប្រសើរជាងធ្វើរឿងជាច្រើនក្នុងពេលតែមួយ ប៉ុន្តែរកចំណុចបញ្ចប់គ្មានសូម្បីតែមួយ ថែមទាំងបង្កផលប៉ះពាល់ដល់ខួរក្បាលទៀតផង។

១០. ពេញចិត្ត ដឹងគុណ និងអរគុណ ៖ កាលដែលមានមហិច្ឆតាចង់មាន ចង់បានខ្លាំង និងចង់ឱ្យប្រសើរជាងមុន វាជារឿងល្អមួយផ្នែកហើយ។ ប៉ុន្តែទន្ទឹមគ្នានោះ យើងក៏មិនត្រូវបំភ្លេចចោលនូវការចេះពេញចិត្ត ដឹងគុណ និងអរគុណ ចំពោះអ្វីដែលបានកើតឡើងរួចរាល់មកហើយនោះដែរ ព្រោះវាក៏ជាផ្នែកមួយសំខាន់ ដើម្បីឱ្យយើងដឹងថា តើយើងមានអ្វីខ្លះ ឬមានរឿងអ្វីដែលនាំឱ្យស្ដាយក្រោយនិងត្រូវបំពេញបន្ថែម ។ ដូច្នេះជាកិច្ចបន្ទាប់គឺ ចាប់កាន់ប៊ិចនិងសៀវភៅឥឡូវនេះ បន្ទាប់មកបរិភោគទឹកមួយកែវ និងដកដង្ហើមឱ្យវែងៗ រួចចាប់ផ្តើមសរសេរអំពីអ្វីដែលពាក់ព័ន្ធនឹងខ្លួនឯង និងការចង់ឃើញខ្លួនឯងប្រសើរជាងមុនក្នុងរូបភាពបែបណា គឺសរសេរបែបនោះចេញមក៕