នៅពេលដែលពិភពលោកកាន់តែងាយស្រួលទំនាក់ទំនងគ្នាទៅវិញទៅមក បានធ្វើឱ្យការយល់ដឹង និងដំណោះស្រាយទៅលើ ការគំរាមកំហែង និងគ្រោះថ្នាក់ដោយសារឌីជីថលកាន់តែមានសារៈសំខាន់។ យោងតាមការស្ទង់មតិអំពីសុវត្ថិភាពអ៊ីនធឺណិតសកលឆ្នាំ២០២៣ ដោយក្រុមហ៊ុន Microsoft លើបុគ្គលិកជាង ១៦,០០០ នាក់ ក្នុងប្រទេសចំនួន ១៦ បានបង្ហាញថា ៦៩ភាគរយ នៃអ្នកចូលរួមបានជួបប្រទះនឹងហានិភ័យតាមអ៊ីនធឺណិត។ ស្ថិតិនេះ បានគូសបញ្ជាក់អំពីលក្ខណៈរីករាលដាលនៃគ្រោះថ្នាក់ឌីជីថល ដែលមានដូចជា ព័ត៌មានមិនត្រឹមត្រូវ (Misinformation), ព័ត៌មានប្រឌិត (Disinformation), ការគំរាមកំហែងតាមអ៊ីនធឺណិត, ការនិយាយដែលនាំឱ្យមានការស្អប់គ្នា (hate speech) និងការគំរាមកំហែងប្រើអំពើហិង្សា។

ការបង្កើតសម្ព័ន្ធសកលសម្រាប់សុវត្ថិភាពឌីជីថល

ដោយទទួលស្គាល់ពីសារៈសំខាន់នៃការគំរាមកំហែងទាំងនេះ វេទិកាសេដ្ឋកិច្ចពិភពលោក បានបង្កើតឱ្យមានសម្ព័ន្ធសកលសម្រាប់សុវត្ថិភាពឌីជីថល (Global Coalition for Digital Safety)។ ការបង្កើតសម្ព័ន្ធនេះ បង្ហាញពីការសម្រេចចិត្តដ៏សំខាន់ ដើម្បីឆ្ពោះទៅរកការលើកកម្ពស់សុវត្ថិភាពឌីជីថល។

សម្ព័ន្ធនេះ កំពុងដឹកនាំក្នុងការជំរុញកិច្ចសហការសកលសម្រាប់ពង្រឹងសុវត្ថិភាពឌីជីថល, គំនិតនេះ បានផ្ដួចផ្ដើមពីភាគីពាក់ព័ន្ធជាច្រើនរួមមាន ក្រុមហ៊ុនបច្ចេកវិទ្យាយក្សដូចជា Meta, Amazon, TikTok និង Google, ក្រុមហ៊ុន eSafety Activefence, ភាពជាដៃគូសុវត្ថិភាព និងទំនុកចិត្តឌីជីថល មានដូចជា រដ្ឋាភិបាលនៃប្រទេសប៊ែលហ្សិក និងសិង្ហបុរី, និយតករនៅចក្រភពអង់គ្លេស និងអូស្ត្រាលី, សាកលវិទ្យាល័យដូចជា Oxford និង Stanford; និងទីភ្នាក់ងារអង្គការសហប្រជាជាតិដូចជា UNICEF និង UNOCT ។

សម្ព័ន្ធកំពុងជួយក្រុមហ៊ុន អ្នកបង្កើតគោលនយោបាយ អ្នកជំនាញ និងសង្គមស៊ីវិល តាមរយៈការបង្កើតឱ្យមានការគាំទ្រជាក់ស្ដែង, ការបណ្ដុះបណ្ដាល ជំនាញ សមត្ថភាព និងធនធាន, រួមទាំងធនធាន ដើម្បីបង្កើតប្រព័ន្ធអេកូឌីជីថល ដែលមានសុវត្ថិភាពជាងមុន។ សកម្មភាពនេះ គឺជាការឆ្លើយតបយ៉ាងស្វាហាប់ ចំពោះការកើនឡើង នៃមាតិកាភារវករ និងអំពើហិង្សា, ការកេងប្រវ័ញ្ចលើកុមារ, ការគំរាមកំហែងតាមអ៊ីនធឺណិត, ការបៀតបៀន, ការនិយាយដែលនាំឱ្យមានការស្អប់, ព័ត៌មានមិនត្រឹមត្រូវ (Misinformation) និងភាពស្មុគស្មាញ ដែលកំពុងលេចឡើង ដោយសារការប្រើប្រាស់បច្ចេកវិទ្យា metaverse និង បញ្ញាសិប្បនិម្មិត (generative AI) ។

គោលបំណងចម្បង នៃការបង្កើតសម្ព័ន្ធនេះ គឺ ដើម្បីធានាឱ្យបាននូវតុល្យភាពនៃការគោរពសិទ្ធិមូលដ្ឋានដូចជា សេរីភាពនៃការបញ្ចេញមតិ ឯកជនភាព និងសុវត្ថិភាពឌីជីថល។ ទន្ទឹមនឹងនេះ កិច្ចខិតខំប្រែងរបស់សម្ព័ន្ធ គឺផ្ដោតលើការបង្កើតការយល់ដឹងរួមគ្នា អំពីហានិភ័យបច្ចេកវិទ្យាឌីជីថល។

ការឆ្ពោះទៅរកសុវត្ថិភាពឌីជីថល

ដើម្បីឆ្ពោះទៅរកការសម្រេចគោលដៅ សម្ព័ន្ធសកលសម្រាប់សុវត្ថិភាពឌីជីថល ផ្ដោតលើផ្នែកសំខាន់ៗចំនួន ៣ មានដូចជា ៖

ទី១ ការកំណត់ និងវាស់វែងព្រំដែន ដែលអាចវាស់វែងបានច្បាស់លាស់ ដែលអនុញ្ញាតឱ្យក្រុមការងារ អាចតាមដានពីការវិវត្តន៍ និងឥទ្ធិពលនៃកិច្ចខិតខំប្រឹងប្រែងរបស់សម្ព័ន្ធ។ គោលបំណង គឺដើម្បីបង្កើតភស្ដុតាងជាក់លាក់ ដែលអាចបង្ហាញពីអ្វី ដែលកំពុងដំណើរការ ដោយធានាថា រាល់ជំហាន នៃការអនុវត្ត គឺពិតជាមានប្រសិទ្ធភាព។

ទី២ ការរៀបចំផែនទី នៃការអន្តរាគមន៍ប្រកបដោយប្រសិទ្ធភាពសម្រាប់សុវត្ថិភាពឌីជីថល ដោយផ្ដោតលើគោលការណ៍សុវត្ថិភាព តាមរយៈការរចនា និងការអនុវត្តល្អបំផុត ដើម្បីកំណត់អត្តសញ្ញាណ និងកាត់បន្ថយហានិភ័យឌីជីថល ប្រកបដោយសុវត្ថិភាព ការការពារគ្រោះថ្នាក់ និងការលើកកម្ពស់ទំនុកចិត្ត។

ទី៣ ការបង្កើនកិច្ចខិតខំប្រឹងប្រែង ក្នុងការកែលម្អរបៀបចែករំលែកព័ត៌មាន និងជំរុញការយល់ដឹងអំពីប្រព័ន្ធផ្សព្វផ្សាយព័ត៌មាន។ ក្នុងយុគសម័យ ដែលព័ត៌មានប្រឌិត (Disinformation) រីករាលដានដូចផ្សិត, មនុស្សគ្រប់គ្នា ត្រូវមានជំនាញ ដើម្បីវិនិច្ឆ័យព័ត៌មានលើប្រព័ន្ធអ៊ីនធឺណិត ថា ជាព័ត៌មានពិត ឬប្រឌិត។ តាមរយៈការអប់រំ និងការផ្សព្វផ្សាយ សម្ព័ន្ធសកលសម្រាប់សុវត្ថិភាពឌីជីថល (Global Coalition for Digital Safety) មានបំណងផ្ដល់សិទ្ធិអំណាយដល់មនុស្ស និងស្ថាប័នផ្សេងៗ ឱ្យមានចំណេះដឹង និងសម្ភារៈសំខាន់ៗ ដើម្បីប្រើប្រាស់បច្ចេកវិទ្យាឌីជីថល ដោយសុវត្ថិភាព និងទំនុកចិត្ត។

ភាពស្មុគស្មាញ និងវិបត្តិនៃព័ត៌មានប្រឌិត ព័ត៌មានមិនត្រឹមត្រូវ មិនមែនជាការទទួលខុសត្រូវរបស់បុគ្គល ឬស្ថាប័នណាមួយនោះទេ ប៉ុន្តែទាមទារឱ្យមានកិច្ចខិតខំប្រឹងប្រែងរួមគ្នា គ្រប់វិស័យទាំងអស់៕