ការសន្សំលុយ ពុំមែនជារឿងសាមញ្ញពេកទេ ជាពិសេសចំពោះយុវវ័យ ទោះបីជាកើតមកក្នុងកម្រិតជីវភាពសមរម្យក៏ដោយ​។ តាមរយៈគេហទំព័រ​ Work And Money គេ​បានរកឃើញថា យុវវ័យ​ភាគច្រើន បានប្រើប្រាស់ចំណូលស្ទើរតែទាំងអស់ក្នុងមួយខែៗរបស់ពួកគេដោយគ្មានការសន្សំ ដែលនេះគឺជាហានិភ័យមួយក្នុងរយ:ពេលវែង។

ត្បិតការសន្សំ មិនត្រូវជាមួយស្ថានភាពគ្រប់គ្នា ប៉ុន្តែការសន្សំ ក៏ដូចជាការចាយវាយឱ្យត្រូវខ្ទង់​ ឬចាយឱ្យឆ្លើយតបនឹងតម្រូវការចាំបាច់មានភាពសំខាន់ ចំពោះអ្នកមានកម្រិតជីវភាពមិនធូរធារ​ រួមទាំងកម្រិតមធ្យមជាដើម។

យ៉ាងណាក៏ដោយ​គេ​បានរកឃើញទម្លាប់​មិន​ល្អបី ដែលយុវវ័យគួរជៀសវាង ដើម្បីរំដោះខ្លួនពីទម្លាប់ចាយវាយដែលមិនល្អ ៖

១. មិនខ្វាយខ្វល់អំពីចំនួនទឹកប្រាក់ផ្ទាល់ខ្លួន ៖ ការដែលមិនពិនិត្យតាមដានចំនួនថវិកាដែលមាន ក៏ដូចជាការមិនបានតាមដានរាល់ការចំណាយប្រចាំថ្ងៃ នោះនឹងរុញឱ្យមានទម្លាប់ចាយលើសចំណូលដោយមិនដឹងខ្លួន។ ការតាមដានចំណូលចំណាយបានទៀងទាត់ វាគួរឱ្យខ្លាចតែពេលចាប់ផ្តើមដំបូងៗទេ ប៉ុន្តែយូរៗទៅ អាចជាសកម្មភាពមួយ ដែលផ្តល់ការកម្សាន្តខ្វះមិនបាន។ ប្រសិនបើមិនតាមដាន នោះក៏ពិបាកក្នុងការគ្រប់គ្រងសុខភាពហិរញ្ញវត្ថុ។​ ទម្លាប់តាមដានបែបនេះ ដូចគ្នាទៅនឹងទម្លាប់សន្សំដែរ​ នៅពេលសន្សំកាន់តែយូរ គឺកាន់តែជក់ចិត្តក្នុងការបន្តសន្សំ នៅពេលដែលតាមដានដឹងថាការចំណាយដែលមិនសមទំនងកើតឡើង នោះនឹងមានភាពសោកស្តាយ ហើយភាពសោកស្តាយត្រង់ចំណុចនេះហើយ កាន់តែជំរុញចិត្តឱ្យបន្តសន្សំមានរបៀបជាងមុន។

២. ការផ្តល់របស់ល្អចំពោះខ្លួនឯង ៖ សម្ភារៈគុណភាព​ អាហារឆ្ងាញ់ កន្លែងកម្សាន្តប្រណិតៗ មិនមែនជាចំណោទបញ្ហា ឬការហាមប្រាមដើម្បីឱ្យសល់ថវិកានោះទេ ព្រោះចំណែកទាំងអស់នេះបានផ្តល់នូវមេរៀន បទពិសោធន៍ជីវិត ក៏ដូចជាការលើកទឹកចិត្តខ្លួនឯង និងការទាញថាមពលមកវិញ។ យ៉ាងណាមិញ ក្នុងការបញ្ចៀសពីផលលំបាកផ្នែកហិរញ្ញវត្ថុនៅពេលអនាគត គឺការថ្លឹងថ្លែងឱ្យមានតុល្យភាពរវាងចំណូល និងចំណាយ ប្រសិនបើចំណាយលើភាពប្រណិតល្អៗញឹកញញពេក ដែលលើសពីពីសាច់ប្រាក់ដែលរកបាន វាបង្កើតបានជាវិបត្តិនៃការចំណាយចំពោះខ្លួនឯងទៅពេលខាងមុខ។

៣. គ្មានទម្លាប់សន្សំ ៖​ ហានិភ័យដែលគ្មានទម្លាប់សន្សំ​ ប្រៀបដូចជាការបើកបរ ដោយបិទភ្នែក ព្រោះគ្រោះអាសន្ន អាចកើតមានគ្រប់ពេលដោយមិនដឹងខ្លួន ត្បិតថាការសន្សំពុំអាចដោះស្រាយបញ្ហាបានទាំងស្រុង ប៉ុន្តែការសន្សំជាទម្លាប់មួយកាត់បន្ថយបញ្ហា ជាការបង្រួមបញ្ហាធំឱ្យនៅតូច និងកាត់បន្ថយសម្ពាធផ្លូវចិត្តផងដែរ។ ចាប់ផ្តើមសន្សំថ្ងៃនេះ​ ដើម្បីផ្តល់រង្វាន់ធំជូនខ្លួនឯងនៅពេលក្រោយ៕