ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បច្ចុប្បន្នពិភពលោកបានចាត់ទុកកីឡាជាផ្នែកមួយដ៏សំខាន់នៃការអប់រំសុខភាពរាងកាយ និងសុខភាពផ្លូវចិត្តរបស់មនុស្ស ។ ទម្លាប់ហ្វឹកហាត់កីឡាជួយឱ្យរាងកាយមានចលនាសកម្មភាព កាត់បន្ថយភាពតានតឹងក្នុងជីវិត ព្រមទាំងបន្ធូរសម្ពាធផ្លូវចិត្តយ៉ាងប្រសើរ ។ សារៈសំខាន់នៃកីឡាជួយឱ្យបុគ្គលសម្រេចបានតុល្យភាពការងារ និងការរស់នៅប្រចាំថ្ងៃ ។ ខាងក្រោមជាគុណតម្លៃទាំង ៥ចំណុចរបស់កីឡាជួយដល់សុខភាពផ្លូវចិត្ត និងប្រសិទ្ធភាពការងារយុវជន ។
១. ភាពរីករាយ ៖ លេងកីឡាជួយឱ្យរាងកាយសកម្ម ព្រមទាំងបង្កើតភាពរីករាយតាមរយៈអរម៉ូន Endorphins ដែលជាសារធាតុគីមីមួយប្រភេទនៅក្នុងខ្លួនជួយឱ្យមនុស្សមានភាពរីករាយ ។ អរម៉ូន Endorphins ជួយឱ្យមនុស្សរីករាយពេញមួយថ្ងៃ ហើយវាបញ្ចេញតាមរយៈសកម្មភាពហាត់ប្រាណ លេងកីឡាជាក្រុម ដើរ ឬរត់ជាដើម ។ ភាពរីករាយដែលទទួលបានពីការហាត់កីឡាជួយឱ្យមនុស្សមានថាមពលជំរុញឱ្យការងារមានប្រសិទ្ធភាពខ្ពស់ ។ មិនថាតែលេងកីឡានោះទេ ស្មារតីគាំទ្រកីឡាក៏អាចឱ្យមនុស្សទទួលបានគំនិតវិជ្ជមានក្នុងទំនាក់ទំនង និងការងារផងដែរ ។
២. ស្ងប់ដំណេក ៖ ធ្វើលំហាត់ប្រាណជាទៀងទាត់ជួយឱ្យមនុស្សស្ងប់ដំណេក ឬគេងលក់ស្រួលប្រកបដោយថាមពល ។ ស្ងប់ដំណេកកើតឡើងដោយសារមនុស្សស្ងប់អារម្មណ៍ ឬមានអារម្មណ៍រីករាយ ។ ស្ងប់ដំណេកផ្តល់ប្រយោជន៍យ៉ាងខ្លាំងដល់សុខភាពផ្លូវចិត្ត និងប្រសិទ្ធភាពការងារ ។
នៅប្រទេសអភិវឌ្ឍបញ្ហាដំណេកជាចំណោទសុខុមាលភាពសង្គមដែលត្រូវយកចិត្តទុកដាក់ខ្លាំង ពីព្រោះមនុស្សបានចំណាយពេលវេលាជាច្រើនលើការងារប្រចាំថ្ងៃរបស់ពួកគេ ។ ដូច្នេះហើយមធ្យោបាយដ៏ល្អបំផុតដើម្បីឱ្យដំណេកស្ងប់ល្អ គឺប្រជាជនជ្រើសរើសយកកីឡាជាអាទិភាពក្នុងសកម្មភាពប្រចាំថ្ងៃ ។
៣. បន្ថយបញ្ហាថប់បារម្ភ ៖ កីឡាជួយឱ្យមនុស្សអាចកាត់បន្ថយភាពតានតឹងចិត្ត (stress) យ៉ាងមានប្រសិទ្ធភាព ។ តាមរយៈលំហាត់ប្រាណជួយឱ្យមនុស្សរំដោះខ្លួនបន្តិចម្តងៗ ពីរឿងរ៉ាវដែលធ្វើឱ្យចិត្តជាប់ក្នុងសម្ពាធ ដោយសារពេលវេលារវល់នឹងកីឡាធ្វើឱ្យមនុស្សរំដោះខ្លួនបន្ទុកការងារទាំងឡាយ ។ ស្ថានភាពថប់បារម្ភរបស់បុគ្គលនឹងវិវត្តន៍កាន់តែធ្ងន់ធ្ងរ ប្រសិនបើបុគ្គលមិនមានកីឡាជួយទ្រទ្រង់ ។
៤. រហ័សរហួន ៖ ស្មារតីរហ័សរហួននេះអាចប្រៀបធៀបបានរវាងអ្នកហាត់កីឡា និងអ្នកមិនហាត់កីឡា ។ អ្នកហាត់កីឡាអាចប្រើប្រាស់រាងកាយទប់ទល់នឹងពេលវេលាលេងកីឡាបានយូរជាងអ្នកមិនមានកីឡានៅក្នុងខ្លួន ។ ទន្ទឹមគ្នានេះ គេអាចប្រៀបធៀបភាពឆ្លាតវៃ គំនិតច្នៃប្រតិដ្ឋ ភាពបត់បែនរបស់មនុស្សតាមរយៈអ្នកមានកីឡា និងអ្នកគ្មានកីឡា ។ អ្នកដែលមានកីឡាតែងមានគំនិតច្នៃប្រតិដ្ឋជានិច្ចក្នុងការងារ (innovative) ព្រមទាំងគំនិតបង្កើតថ្មី (creative) ។
៥. បង្កើនទំនុកចិត្ត ៖ កីឡាមិនត្រឹមតែធ្វើឱ្យមនុស្សមានទំនុកចិត្តក្នុងពេលប្រកួតនោះទេ សូម្បីតែបំពេញការងារប្រចាំថ្ងៃក៏ជួយឱ្យមនុស្សមានទំនុកចិត្តខ្លាំងដែរ ។ លេងកីឡាជួយឱ្យមនុស្សមានទំនុកចិត្តលើខ្លួនឯង (cconfident), លើកទឹកចិត្តខ្លួនឯង (self – motivation), និងគាំទ្រអ្នកដទៃដោយវិជ្ជមានជានិច្ច ។ លើសពីទំនុកចិត្តមនុស្សអាចបង្កើតទំនាក់ទំនងកាន់តែប្រសើរជាមួយមនុស្សជុំវិញខ្លួនតាមរយៈសកម្មភាពលេងកីឡា និងស្មារតីកីឡា ៕
