សេចក្ដីអាក់អន់ចិត្តគឺជាផ្នែកមួយនៃធម្មជាតិរបស់មនុស្ស ហើយការកើតទោមនស្សតែងតែដក់ជាប់ជាមួយអារម្មណ៍ដែលប្រមូលផ្តុំទៅដោយការភ័យព្រួយ និងភាពអវិជ្ជមាន។ ចំណុចទាំងនេះងាយស្រួលសង្កេតឃើញចំពោះអ្នកដទៃ ប៉ុន្តែបែរជាពិបាកក្នុងការកត់សម្គាល់ពេលកើតមានចំពោះខ្លួនឯងទៅវិញ។ យ៉ាង​ណាមិញ គេអាចកត់សម្គាល់អារម្មណ៍ដែលមានសេចក្ដីទោមនស្សដូចជា មិនមានអារម្មណ៍សុវត្ថិភាពចំពោះខ្លួនឯង បង្កើនការប្រៀបធៀប ឬក៏មើលមកខ្លួនឯងអន់ជាងអ្នកដទៃជាដើម។ បើតាមគេហទំព័រ 21ninety បានបង្ហាញវិធីសាស្រ្តមួយចំនួន ក្នុងការអនុវត្តនៅពេលមានអារម្មណ៍អន់ចិត្តកើតមាន ចំពោះបុគ្គលណាម្នាក់ ឬមជ្ឈដ្ឋានអ្វីមួយ។

១. ត្រូវមានភាពស្មោះត្រង់នឹងខ្លួនឯង ៖ មានមនុស្សមួយចំនួនហាក់ មិនទទួលស្គាល់ថា ខ្លួនមានអារម្មណ៍កើតទុក្ខមិនសុខចិត្តឡើយ ហើយអារម្មណ៍បែបនេះ គឺពុំបានផ្តល់នូវផាសុកភាពនោះទេ។ ជារឿយៗ វាកើតមានដោយសារតែមនុស្សយល់ថា សេចក្តីឃ្នើសចិត្តទាំងឡាយនោះ បណ្តាលមកពីអ្នកដទៃផ្តល់មកកាន់ខ្លួន។ យ៉ាងណាមិញ ប្រសិនបើលោកអ្នកគេចវេស ឬក៏ធ្វើដូចជាមិនមានរឿងអ្វីកើតឡើង នោះវាពុំបានជួយឱ្យអ្នកក្រោកចេញពីបញ្ហានេះ បានលឿននោះទេ។ ជំនួសមកវិញ លោកអ្នកត្រូវស្មោះត្រង់ជាមួយនឹងខ្លួនឯង ដោយគិតថា អារម្មណ៍អន់ចិត្ត ឬច្រណែននេះ វាជារឿងធម្មតារបស់មនុស្សនិងកើតឡើងដោយធម្មជាតិ​ឯងៗ ហើយអារម្មណ៍បែបនេះ អាចកើតមានដោយសារបុព្វហេតុអ្វីមួយ ប៉ុន្តែវានឹងរសាយ ឬក៏ការផ្លាស់ប្រែជាបន្តបន្ទាប់។

២. ដឹងឱ្យច្បាស់ពីអ្វីដែលខ្លួនចង់បាន ៖ នៅពេលអ្នកស្មោះត្រង់នឹងអារម្មណ៍ខ្លួនឯងហើយ នោះគឺអាចជួយកំណត់រាល់អ្វីដែលអ្នកចង់បាននៅក្នុងជីវិត ហើយកាលដែលដឹងច្បាស់ពីអ្វីដែលលោកអ្នកចង់បាន នោះវាជាជំហានដំបូង ជួយឱ្យអ្នកបង្កើតផែនការសកម្មភាព ដើម្បីសម្រេចការរំពឹងទុក និងកាត់បន្ថយសេចក្ដីសោកសៅបានមួយផ្នែក។

៣. ក្នុងករណីចាំបាច់គឺផ្តាច់ខ្លួនចេញតែម្តង ៖ បើអ្នកសង្កេតឃើញថា បច្ចុប្បន្នកំពុងកើតទុក្ខមិនសុខចិត្តមានអត្រាកើនឡើង កាន់តែច្រើនទៅៗ ហើយរំខានការគិតរបស់អ្នក សូមទុកពេលសម្រាក ឬផ្តាច់ខ្លួនចេញមួយខណៈពីបុគ្គល ឬមជ្ឈដ្ឋាននោះ។ មានន័យថានៅឱ្យឆ្ងាយពីមនុស្សដែលអ្នកមិនមានអារម្មណ៍ល្អ ឬក៏ចាកចេញពីបណ្តាញសង្គមណា ដែលបង្កបាននូវអារម្មណ៍ច្របូកច្របល់។

៤. ធ្វើខ្លួនឱ្យរវល់ប៉ុន្តែអនុវត្តន៍សកម្មភាពដែលស្របនឹងបំណងប្រាថ្នា ៖ នៅពេលលោកអ្នកមិនមានសកម្មភាពដើម្បីធ្វើខ្លួនឱ្យឯងរវល់នោះទេ គឺជាកត្តាមួយដែលដាក់អន្ទាក់លោកអ្នក ឱ្យស្ថិតក្នុងស្ថានភាពមិនស្រស់ស្រាយសប្បាយចិត្ត ពីព្រោះអ្នកហាក់ប្រើប្រាស់អារម្មណ៍ ជំនួសឱ្យខួរក្បាលច្រើនជាង។ អនុញ្ញាតឱ្យខ្លួនឯងស្ថិតនៅក្នុងស្ថានភាពជាក់ស្ដែង ស្ថិតជាមួយនឹងការងារដែលអាចជួយឱ្យអ្នកមានអារម្មណ៍សុវត្ថិភាពជាមួយនឹងបច្ចុប្បន្ន បើទោះជាមិនទាន់សម្រេចអ្វីដែលបានដៅទុកក៏ដោយ ។ ហើយត្រូវតែប្រាកដថា សកម្មដែលធ្វើដើម្បីបន្លប់ភាពក្នក់ក្នុងចិត្តនោះ ឆ្លើយតបនឹងគោលដៅ ហើយមានផាសុកភាព និងភាពវិជ្ជមានផងដែរ។

៥. ពេញចិត្តចំពោះសមិទ្ធផលកន្លងមក ៖ វិធីសាស្រ្តដ៏ល្អមួយដើម្បីបង្ហាញទៅកាន់ពិភពខាងក្រៅ ឬបញ្ជាក់ប្រាប់ខ្លួនឯងថា អ្នកអាចទ្រទ្រង់នឹងស្ថានភាពអន់ចិត្តបាន គឺរៀនពេញចិត្តនឹងអ្វីដែលកំពុងតែមានក្នុងពេលបច្ចុប្បន្ន ដែលពេលខ្លះអ្នកកំពុងនឹកភ្នកទៅដល់អ្វីដែលរំពឹងទុកកាលពីមុន ប៉ុន្តែមិនទាន់មាននៅក្នុងដៃនៅឡើយ។ ជំនួសមកវិញ សូមលោកអ្នកគិតថា យ៉ាងហោចណាស់ ក៏នៅមានជីវិតក្នុងការបន្តដុសខាត់សមត្ថភាពដើម្បីសម្រេចរាល់អ្វីដែលបានដៅទុក។ ដោយអ្នកគ្រាន់តែក្រឡេកមួយកន្ទុយភ្នែកមើលទៅលើ ចំណុចណាមួយនៃខ្លួនឯង គិតអំពីរឿងល្អៗ ឬចំណុចដែលមានមោទកភាពជាងគេ។ ស្របពេលកំពុងព្យាយាមយ៉ាងខ្នះខ្នែង ដើម្បីចាប់យកនៅអ្វីដែលខ្លួនរំពឹងទុក សូមកុំភ្លេចផ្តោតចំពោះអ្វីដែលលោកអ្នកកំពុងមានក្នុងពេលបច្ចុប្បន្ន៕